Zang Shonang Yeesɔ 28 - Nyaa Shɔɔ Ɓɔɔ Laa a Ɓɛɛ

Bulu ka Gari Malita

¹ Ruu wɔ tɔ, a zang naa kɔɔ ruu nɛɛ zang ɓaa nɔng bìí nɛɛ Malita.

² Zang nɔng bìí ri palɛ ruu tɔ̃ɔ dɔɔli. Mii a kana, a sɔɔrɔ ti si katɔ, ka ruu nɔngkɔ, ri tee ruu waa. A ri ti jee ruu nyaa waasɛ̃.

³ Bulu kpalɛ sãnsãng laa a mãrɛ nɛɛ wu loo kaa waa. A sɔkɔ tãa waa, nwangnɛ yeti sãnsãng laa. A kengtɛ ka naa Bulu.

⁴ Ɓɔɔ zang gari Malita ri zi sɔkɔ ka naa Bulu, ri kɔɔrɔ zɔɔ tɔɔ, “Yɔɔ kaɓa zang ɓɔɔ nyɔkɔ zang vɔrɔ ɓɛɛ. Wɔ tɔ nɛɛ waapo, shi kpang ɓɔɔ wu palɛ zang dṹng wu doo naa, vɔ ditɔ nɛɛ mani.”

⁵ Bulu wii naa, a sɔkɔ watɛ ka waa palɛ wu vuu ɓɔɔ kaa takpang.

⁶ Ri gã ɓarɛ kaa ɓɔɔ wu puuyi wu watɛ ka tipi tantɛnang wu vɔrɛ ɓɛɛ. Knti naa beeyi vuu ɓɔɔ palɛ wu kpang, ri risi nyaa tɔɔ, yɔɔ keɓe ɓi vuu gãnti.

⁷ Ka nɔng kɛɓɛ, gãa yɔɔ ɓɔɔ zang ɓaa wu nɛɛ Babiliya, kpanti tipi Malita kagn nɔng naabm. Ta ruu waasɛ̃, ti a ruu vuu shaanang, a ruu nwang zanti ka gãa ɓiɓɛ diki taati.

⁸ Daa Babiliya roo ka latãng bii nwãa wu, a yeti ti tɔ̃̀ɔrɔ wu katɔ. Bulu daa ka yeti gãa ɓɔɔ wu roo ɓɛɛ, gaa wu Laa, a shìng wu naa ka bii, a vuu yaa wu nɔng.

⁹ Ɓɔɔ Bulu palɛ naa weɓe, zang kɔnang ɓɔɔ ri ka gari ri a nandon, a Bulu masɛ ri.

¹⁰ Ri alɛ rùu vuu dɔɔli. Ka diki ɓɔɔ ruu vang laana ruu tɔɔ ruu daa kaa tɔɔ, ri tɛ̃ɛ ruu vuu ɓɔɔ naa ruu kasɛ katɔ ɓɛɛ nandon.

Ruu yupaa nɛɛ Malita, Ruu dàa Rooma

¹¹ Shala ɓa tɔ taati, a ruu naa vang laana ɓɔɔ a nɛɛ tipi Alezandiriya ɓɔɔ zang bee waa nyaating jaa bãnang varɛ ziti ka bii ɓiɓɛ ɓɛɛ. Laana keɓe nwáng ka gari Malita nɛɛ guusi.

¹² Ruu naa shɛ̃ɛ gari Sirakusa, a ruu roo ka nɔngkɔ diki taati.

¹³ Laana ɓuru naa yupaa nɛɛ nɔngkɔ, a ka gari Rejiyu. Nɔng naa gãntɛ tɔ a jasung gaayu ranang nɛɛ dii. Ruu roo diki ziti, a ruu shɛ̃ɛ gari Putiyoli.

¹⁴ Ruu ĩi zang ɓɔɔ ri dũng Laa ka nɔng. Ri gaa ruu nɛɛ ruu nwang nɛɛ ri, diki manziti. A ruu naa seepaa kaa nɛɛ nihn ruu shɛ̃ɛ Rooma kati.

¹⁵ Zang ɓɔɔ ri dũng Laa ka nɔng, ri tãa nyaa nɛɛ ruu a tɔ, ri a sasak ri a ka Lumang Apiyu nɛɛ nɔng ɓɔɔ zang ɓaa nɛɛ Nɔng vuu shaanang taati ɓɛɛ, ri naa kpisi ruu ka nɔngkɔ. Ɓɔɔ Bulu zi ri, zãa Laa, a mã danggn kati.

Bulu ka Rooma

¹⁶ Ɓɔɔ ruu shɛ̃ɛ Rooma, zang yáa Bulu nɛɛ wu nwang ɓi ka bm nɛɛ sɔɔja ɓɔɔ gã wu ɓɛɛ.

¹⁷ Diki ɓuru daa tɔ taati, a Bulu kpalɛ rɛɛ zang bang bang zang Yahudi ɓɔɔ ri ka gari ɓɛɛ. Ri kpalɛ zɔɔ, a kɔɔ ri tɔɔ, “Rɛɛ manzung, n pálɛ̀ rɛɛ zang ɓuru vuu ɓɔɔ kagn kpang. N ti shii bàng nɛɛ gbalang ɓɔɔ rɛɛ dabang ɓuru tusu ruu kpang. Zang mã m ka sãa ka Urushalima, a zang tuu m zang a zang Rooma.

¹⁸ Zang Rooma ri hɛ̃ɛlɛ m ruu, a ri nɛɛ ri yaa m naa kaa tɔ, ka ruu ɓɔɔ, ri tɔɔ ri zi vuu ɓɔɔ n palɛ ɓɔɔ daa naa ɓɔɔ zang nyɔ m vɔrɔ kpàng ɓɛɛ.

¹⁹ Zang Yahudi ri kasɛ kpang, ka ruu nɔngkɔ, n tɔɔ zang naa jɛ̃ɛ m ruu ka tĩng Kayisa. Vuu shi kpang ɓɔɔ n ti kɔɔ zang ka yuu zang mɛɛ kagn kpang.

²⁰ N ɓaa nɔɔ nyaa ka ruu ɓiɓɛ kɔ n tɔɔ n rang yee nɛɛ nɔɔ. Ka ruu ɓɔɔ, zang mã m nɛɛ saka keɓe, ka ruu zang ɓɔɔ zang Isirela ri shing gn ka bii ɓiɓɛ kɔ ɓɛɛ.”

²¹ Ri kɔɔ wu nɛɛ, “Zang shong ruu nyaa gn nɛɛ labeenang nɛɛ tipi Yahudi ka yuu ɓaaɓɛ kpang. Rɛɛ manzung ɓɔɔ ri ti a kagn nɛɛ nɔng kaɓa, nɛɛ ruu naa weɓe kpang. Ri ti kɔɔ ruu shi kpang ɓɔɔ ka yuu ɓaaɓɛ kpang.

²² Ruu kasɛ ruu tɔɔ ruu tãa vuu ɓɔɔ ka yeti ɓaaɓɛ ɓɛɛ. Ka ruu ɓɔɔ, ruu zi tɔ zang ráng ruu nɛɛ nɔng piti piti ka ruu gbalang keɓe.”

²³ Ka ruu nɔngkɔ, ri kà zɔɔ diki nɛɛ Bulu. Ɓɔɔ diki ɓɔɔ ri ka zɔɔ naa arɛ zang dɔɔli ri kpalɛ zɔɔ ka nɔng ɓɔɔ Bulu nwàng kagn ɓɛɛ. Bulu nwangsɛ ri dĩiri ruu a ti kɔɔ ri ruu ka yuu Kpanti roonang Laa nɛɛ gãndi sasak nɔng tɔɔ nɛɛ mani. Kasɛ nɛɛ ri ta ruu ɓɔɔ wu kɔɔ ri ka yuu Yeesɔ ɓɛɛ, ka ruu nɔngkɔ, rang ri yee ka yuu ɓiɓɛ ka yeti labeenang Musa nɛɛ ɓɔɔ rɛɛ zang nyaa shonang Laa.

²⁴ Zang ɓɔɔ ri ta ruu ɓiɓɛ katɔ, a zang ɓɔɔ ri ta ɓarɛ kaa takpang.

²⁵ Ka ruu nɔngkɔ, ri daayi, nyaa ɓarɛ daa gbete kpang. Bulu kɔɔ ri ruu keɓe ka gbongkarɛ, a ri tantɛ, tɔɔ, “Suru Laa kɔɔ rɛɛ dabang manɛ ruu ɓɔɔ niizang nɛɛ nyaa Ishaya tɔɔ,

²⁶ “Suru Laa kɔɔyi nɛɛ, ‘Daayi mɔɔ kɔɔ rɛɛ zang keɓe nɛɛ, Nɔɔ ɓáa shoo, nɔɔ ɓaa shoo, nɔɔ zi vuu ɓɔɔ zang kɔɔ kpang. Nɔɔ shu jĩng, nɔɔ shu jĩng, Nɔɔ zi vuu kpang.

²⁷ Ka ruu ɓɔɔ, yeti rɛɛ zang keɓe kpãa nyaa ruu tanang dɔɔli ɓɛɛ. Ri nɔɔ shoo ɓarɛ tɔ, ri ti mung jĩng ɓarɛ tɔ. Jĩng ɓarɛ nɛɛ zi nɔng, shoo ɓarɛ nɛɛ ti tãa ruu, ri nɛɛ zi vuu nɛɛ yeti ɓarɛ. Ri nɛɛ gbãayu ka bii mɛɛ, n nɛɛ masɛ ri.’ ”

²⁸ A Bulu hangsɛ nyaa ruu ɓiɓɛ tɔɔ, “N kasɛ nɛɛ nɔɔ zirɛ nɛɛ Ruu Laa ɓɔɔ ta yuu zang, Laa shong nyaa tɔ nɛɛ mani ka bii zang ɓɔɔ ri zang Isirela kpang ɓɛɛ. Ri ti naa tãa ditɔ.”

²⁹ [Ɓɔɔ Bulu kɔɔ ruu keɓe naa weɓe, zang Yahudi ri daayi, ri laa nyaa nɛɛ zɔɔ ka gbalang nɛɛ gnvɔ ning.]

³⁰ Bulu nwang ka bm ka nɔngkɔ saa ziti, ka gãa ɓɔɔ wu shu saka katɔ ɓɛɛ. Ta zang ɓɔɔ ri alɛ wu nyaa jeenang waasɛ̃.

³¹ Kɔɔ zang ruu ka yuu Kpanti roonang Laa. Ti tusu zang vuu ka yuu Kpanti Yeesɔ Kirisi, kaa vɔrɔ kpang. Zang ɓɔɔ ti zãa wu ruu keɓe kɔɔnang kpang.