2 Koranti 9 - Nyaa Shɔɔ Ɓɔɔ Laa a Ɓɛɛ

Zang yi zang ɓɔɔ ri dũng Laa ɓɔɔ ri ka Yahudi naa ka bii

¹ Dàa naa ɓɔɔ n bèé nɔɔ labeenang tɔ̀ɔ́ sasak, ka yuu vuu ɓɔɔ zang kpalɛ zang ɓɔɔ ri dũng doo Laa kɔ, ɓɔɔ ri ka tipi Yahudi ɓɛɛ kpang.

² N zi tɔ, nɔɔ kasɛ nɛɛ nɔɔ yi ri naa katɔ ka bii, a ruu ti rangkɛ ruu tɔ bang bang ka yuu manɛ ka tipi Makidoniya. N kɔɔyi nɛɛ, “Rɛɛ manzung ɓuru ɓɔɔ ri ka gari Akaya ri kpalɛ bii tɔ dòo sáa ɓɔɔ, nɛɛ ri yi zang kaɓa naa ka bii.” Kasɛnang ɓɔɔ nɔɔ kasɛ nɛɛ nɔɔ yi ri naa ka bii zàrɛ̀ zang nimbang tɔ ka teteng ɓarɛ.

³ Kãntang keɓe, n shong nɔɔ nyaa nɛɛ manzung ɓuru keɓe, tɔ̀ɔ ruu bang bang ɓɔɔ ruu rang ka yuu manɛ wu nwàng kaa tɔ̀ɔ́ naa ruu wɔng nyaa waati kpang. N kasɛ nɛɛ ɓɔɔ n arɛ, bɛ̀ɛ́ nɔɔ kpalɛ bii manɛ tɔ piti nɛɛ vuu manɛ, naa ɓɔɔ n kɔɔ ri ɓɛɛ.

⁴ Naa zang Makidoniya ri a nɛɛ n ka bii manɛ, ri ĩiyi nɔɔ kpalɛ bii gn nɛɛ vuu manɛ kpang, yusɛ̃ɛ tuu ruu dɔɔli. Ruu yaa yusɛ̃ɛ ɓɔɔ tuu nɔɔ ɓi ka nɔngkɔ. Ka ruu ɓɔɔ, n kɔɔ ri ruu ka yuu manɛ, nyaa zaa m kpang ɓɛɛ.

⁵ Ka ruu nɔngkɔ, n rɛ̃rɛ ka yeti, n tɔ̀ɔ, naa n dɔ̃ rɛɛ manzung ɓuru keɓe ka tĩng ka bii manɛ, ri daa kpalɛ vuu ɓɔɔ nɔɔ tɔɔ nɔɔ a zang ɓɛɛ wukɔ tɔ̃ɔ. N a m kaa knti. Ɓɔɔ n arɛ bɛ̀ɛ́ nɔɔ kpalɛ vuu tɔ, tɔ̀ɔ, wu nwang kaa naa nɔɔ kasɛ katɔ nɔ́ɔ a zang, zang mã nɔɔ nyaa katɔ kpang.

⁶ Danggn wu ning nɔɔ kpang, zang ɓɔɔ nɛɛ ɓaa jĩng vuu tɔkɔlɔng, ti yee ɓi doo tɔkɔlɔng kɔ. Zang ɓɔɔ nɛɛ ɓaa jĩng vuu dɔɔli, ti naa yee ɓi doo dɔɔli kɔ.

⁷ Zang ɓu a vuu naa ɓɔɔ wu mang ka yeti ɓiɓɛ ɓɛɛ, wu naa zang mã wu nyaa kagn kpang. Wu ti tãa tĩnang katɔ ka ɓɔɔ wu a ɓɛɛ. Ka ruu ɓɔɔ, Laa kasɛ ɓi zang ɓɔɔ tãa tĩnang ka ɓɔɔ wu a vuu ɓɛɛ.

⁸ A Laa ti zunung ɓɔɔ wu a nɔɔ vuu piti ɓɔɔ ɓa ɓɔɔ nɔɔ kasɛ ɓɛɛ katɔ, tɔ̀ɔ, nɔɔ walɛ vuu piti ɓɔɔ nɔɔ kasɛ ɓɛɛ kaa nandon. Nɔ́ɔ ti walɛ vuu dɔɔli ɓa ɓɔɔ nɔɔ kasɛ katɔ, tɔ̀ɔ, nɔ́ɔ palɛ̀ zang tɔ̃ɔ kaa nɛɛ mani ka zɔ̃ng zɔ̃ng.

⁹ Naa ɓɔɔ zang bèe ka yeti labeenang Laa ɓɛɛ tɔɔ, “Zang ɓɔɔ a zang ɓɔɔ vuu ka naa ɓarɛ kpang vuu nɛɛ yeti gbete. Danggn tɔ̃ɔ ɓɔɔ Laa palɛ ɓɛɛ, ning Zang kpang gbinggbing.”

¹⁰ Laa kɔ a zang jĩng vuu, zang ɓàayi, wu ti a wu vuu shaanang, wu shaayi. Ka ruu nɔngkɔ, Laa naa a nɔɔ jĩng vuu ɓɔɔ nɔɔ kasɛ ɓaanang ɓɛɛ ditɔ nandon, wu ti shingnɛ, vuu ɓɔɔ takɛ wu bangkɛ. Ka naa weɓe, Laa shingnɛ, vuu ɓɔɔ nɔɔ a zang nɛɛ yeti gbete, nɔ́ɔ a zang kaa dɔɔli.

¹¹ Ti shingnɛ, nɔɔ nwang zang ying, tɔ̀ɔ, nɔ́ɔ alɛ zang vuu kaa diki diki. Tɔ̀ɔ, zang dɔɔli ri zãa Laa kaa ruu vuu ɓɔɔ nɔɔ alɛ ri, nɛɛ bii ɓuru ɓɛɛ.

¹² Ka ruu ɓɔɔ, vuu kɔ nɔɔ palɛ ɓee, a wu zang ɓɔɔ ri dũng Laa kɔ shɛ̃ɛning vuu ɓɔɔ ri kasɛ ɓɛɛ kpang, ti shing jong zang dɔɔli ri zãa Laa.

¹³ Shonang tɔ̃ɔ kɔ nɔɔ palɛ ɓee, wukɔ tusu zang nɛɛ nɔɔ manɛ zang ɓɔɔ ri dũng Laa niizang ɓɛɛ. Zang ɓɔɔ ri dũng dòo Laa kɔ, ri dɔɔ Laa ka ruu naa ɓɔɔ nɔɔ kɔɔ zang Ruu Tɔ̃ɔ Yeesɔ Kirisi, a nɔɔ palɛ vuu ɓɔɔ ruu keɓe kɔɔ ɓɛɛ katɔ ɓɛɛ. Ri ti dɔ̀ɔ Laa ka ruu naa ɓɔɔ nɔɔ basɛ vuu manɛ, nɔɔ á ri nɛɛ yeti gbete, a nɔɔ ti á ɓɔɔ zang ɓɔɔ ri shing danggn tɔ jong ka bii Laa ɓɛɛ.

¹⁴ Ka ɓɔɔ ri gaa Laa ka ruu manɛ, ri kasɛ katɔ gbãng gbãng ri zi nɔɔ, ka ruu tɔ̃ɔ ɓɔɔ bang dɔɔli ɓɔɔ Laa palɛ nɔɔ ɓɛɛ.

¹⁵ Ruu zãa Laa ka ruu vuu ɓɔɔ wu a ruu ɓɛɛ, vuu ɓɔɔ zang ɓɔɔ zunung ɓɔɔ wu gãsɛ kpang ɓɛɛ.