2 Koranti 10 - Nyaa Shɔɔ Ɓɔɔ Laa a Ɓɛɛ

Bulu kɔɔ ruu ka yuu shonang ɓiɓɛ

¹ Nkɔ Bulu nɛɛ yuu mɛɛ, n gaa nɔɔ, n ɓɔɔ n palɛ vuu hakaka kpang, n ti tuu yuu mɛɛ kpang, naa Kirisi ɓɛɛ. Zang kɔɔrɔ nɛɛ naa n dòo nɛɛ nɔɔ nɔng gbete, n kaa doo vɔrɔ, a n nɛɛ tɔ̀ɔ́ nɛɛ nɔɔ kpang, n kaa vɔrɔ takpang.

² Ka ruu nɔngkɔ, n gaa nɔɔ katɔ, nɔ́ɔ shing m nɛɛ gbãng gbãng ning, n nɛɛ a tɔ, n pàlɛ̀ nɔɔ vuu nɛɛ gnvɔ kpang. N zi tɔ, n zunung ɓɔɔ naa n pàlɛ́ zang ɓɔɔ ri kɔɔrɔ nɛɛ, ruu palɛ vuu ɓuru naa zang koo ɓɛɛ, vuu katɔ nɛɛ gnvɔ.

³ Ruu nwang ka koo kɔ niizang, a ruu gàa nyaa ɓuru kaa tɔ̀ɔ́ ka doo vuu ɓɔɔ zang koo ri kasɛ ɓɛɛ kpang.

⁴ Ka ruu ɓɔɔ, vuu waa ɓɔɔ ruu tá sĩiri nɛɛ mani, ɓi zɔ̃ng vuu waa ɓɔɔ zang koo keɓe ri ta sĩiri nɛɛ mani kpang ɓɛɛ. Ɓi vuu waa ɓɔɔ Laa a ruu ɓɛɛ, ɓɔɔ ruu ningsi zang ɓɔɔ ri ta sĩiri nɛɛ ruu nɛɛ mani ɓɛɛ.

⁵ Ruu ningsi nyaa laanang nɛɛ yuu tuunang, ɓɔɔ zãa zang nɛɛ zang ri zi Laa kpang ɓɛɛ. Ruu kɔsɔ nɛɛ kaaɓa. Ruu shing ri, ri rɛ̃rɛ rɛ̃rɛnang ka doo vuu ɓɔɔ Yeesɔ Kirisi kasɛ ɓɛɛ.

⁶ Nɔɔ nɛɛ tusu yuu manɛ tɔ nɛɛ, nɔɔ dũng kaa nyaa ɓuru, tɔɔ ruu kpalɛ bii ɓɔɔ ruu dang zang ɓɔɔ ri dũng nyaa ɓuru kpang jĩng kati.

⁷ Nɔɔ pɛ̃ɛrɛ manɛ bii biling vuu kɔ shɛ̃ɛning. Zang ɓɔɔ kagn nɔngkɔ, ɓɔɔ tuu yuu nɛɛ wu ɓi ɓɔɔ Yeesɔ Kirisi ya? Wukɔ tɔ̃ɔ. Zang kaɓa wu rɛ̃rɛ ka yuu ɓiɓɛ tɔkn, ka ruu ɓɔɔ, ruu ɓuru dòo zang Yeesɔ Kirisi kɔ naa wukɔ ɓɛɛ.

⁸ Ka ruu ɓɔɔ, naa n rangkɛ dòo yee bang bang ka yuu naa vuu palɛnang ɓɔɔ Kpanti Yeesɔ Kirisi a ruu ka yuu manɛ, yusɛ̃ɛ tuu m kpang. Ka ruu ɓɔɔ, Laa a ruu naa nɛɛ ruu ningsi nɔɔ katɔ kpang, nɛɛ ruu yi nɔɔ naa ka bii kɔ jong, nɔ́ɔ bangnɛ ɓɛɛ.

⁹ N kasɛ kpang, wu nwang naa ɓɔɔ n shing nɔɔ, nɔ́ɔ kaa vɔrɔ nɛɛ labeenang kɔ n bee nɔɔ ɓee kpang.

¹⁰ Zang ɓɔɔ ri kɔɔ katɔ nɛɛ, “Rɛɛ labeenang Bulu kpiti katɔ, a vuu ɓɔɔ wu kasɛ nɛɛ zang ri palɛ bang dɔɔli. A nɛɛ a tɔ ka bii ɓuru, wu zang ɓɔɔ mɔɔ kaa vɔrɔ ɓiɓɛ kpang. Ruu ɓiɓɛ ti kpãa zang takpang.”

¹¹ Zɔ̃ng zang keɓe, ri zi katɔ nɛɛ, vuu ɓɔɔ ruu bee ka yeti labeenang ɓuru, bɛ̀ɛ́ ruu ka nɔng naabm kpang, nɛɛ vuu ɓɔɔ ruu naa palɛ, rùu nɛɛ kaa nɛɛ nɔɔ, ɓi gbete.

¹² Ruu tɔɔ kpang nɛɛ, ruu kusu yuu ɓuru nɔng gbete nɛɛ zang ɓɔɔ ri kɔɔrɔ ruu bang bang ka yuu ɓarɛ ɓɛɛ kpang. Ruu ti gãsɛ yuu ɓuru nɛɛ ri kpang. Ri shing vuu ɓɔɔ ri gãsɛ yuu ɓarɛ kagn nɛɛ yuu ɓarɛ, ri ti jɛ̃̀ɛ́ yuu ɓarɛ ruu ɓi nɛɛ vuu ɓɔɔ ri gãsɛ yuu ɓarɛ nɛɛ mani ɓɛɛ. Ri ɓarɛ shoko waati.

¹³ Ɓɔɔ ɓuru, yee bang bang ɓɔɔ ruu kɔɔrɔ ka yuu ɓuru ɓa nɔng ɓɔɔ ɓi kpang. Di nyaa ɓi ka nɔng ɓɔɔ shonang ɓɔɔ Laa a ruu di nyaa ɓɛɛ. Ɓakɛ kaa nɛɛ shonang ɓɔɔ ruu palɛ ka teteng manɛ ning.

¹⁴ Wee nɔɔ ka teteng nɔng ɓɔɔ shonang ɓuru di nyaa ɓee, rukɔ a ka bii manɛ nɛɛ Ruu Tɔ̃ɔ ɓɔɔ ka yuu Yeesɔ Kirisi ɓɛɛ shɔɔnang. Ruu ɓa nɔng ɓɔɔ zang di ruu nyaa kagn ɓɛɛ kpang.

¹⁵ Ka ruu nɔngkɔ, ruu rangkɛ yee bang bang, ruu ɓa nyaa ɓalɛ ɓuru, ruu daa nɛɛ mani ka nɔng ɓɔɔ zang ɓɔɔgn ri pálɛ̀ shonang kagn ɓɛɛ kpang. Ruu shing ɓuru gn kɔ jong nɛɛ, danggn ɓɔɔ nɔɔ shing ɓɛɛ, wu daa nɛɛ tĩng. Ruu tí zunung ɓɔɔ ruu palɛ shonang ɓɔɔ ɓa ɓɔɔ ruu pálɛ́ tɔ ka teteng manɛ ɓɛɛ bannang katɔ. Shonang ɓuru wu baa ka teteng manɛ, tɔɔ ruu ta nyaa ɓalɛ ɓuru kaa takpang ɓɛɛ.

¹⁶ Nɛɛ nwang tɔ nɔngkɔ, ruu zunung katɔ ruu daa nɛɛ tipi ɓɔɔgn ɓɔɔ zang ɓa Koranti ka knti ɓɛɛ, ruu daa kɔ̀ɔrɔ̀ zang Ruu Tɔ̃ɔ Laa ka nɔngkɔ. Zang dɔ̀ɔ ruu ka ruu shonang ɓɔɔ ɓi zang ɓɔɔgn palɛ ɓɛɛ kpang, ka nɔng ɓɔɔ Laa a ɓi zang kaɓa ɓɛɛ.

¹⁷ A zang bèe ɓi ka yeti labeenang Laa nɛɛ, “Zang ɓɔɔ nɛɛ kasɛ nɛɛ wu rangkɛ yee bang bang ka yuu ɓiɓɛ, wu rangkɛ ka yuu vuu piti ɓɔɔ Kpanti Laa palɛ ɓɛɛ.”

¹⁸ Ka ruu ɓɔɔ, Laa ta ɓi zang ɓɔɔ dɔ̀ɔ́ yuu ɓiɓɛ ɓɛɛ kpang. Zang ɓɔɔ Kpanti dɔ̀ɔ́ wu, Laa ta ɓi wukɔ.