1 Timoti 2 - Nyaa Shɔɔ Ɓɔɔ Laa a Ɓɛɛ

Naa ɓɔɔ zang bang Laa ɓɛɛ

¹ Vuu ɓɔɔ n kɔɔ mɔɔ shɔɔnang keɓe. Gaa Laa mɔɔ ti bakɛ wu ka ruu zang piti. Mɔɔ ti zãa Laa ka ruu ɓarɛ nandon.

² Mɔɔ ti gàa Laa ka ruu rɛɛ kpanti, nɛɛ zang ɓɔɔ ri zang bang ɓɛɛ nandon. Tɔ̀ɔ, rùu ɓɔɔ ruu dũng Laa rúu nwang kaa nyaa zɔɔ kikiri nɛɛ zang piti. Tɔ̀ɔ, ruu a Laa bannang kati ruu ti seng zang jong.

³ Zɔ̃̌ng Laa gaanang keɓe, wukɔ tɔ̃ɔ. Laa ɓɔɔ wukɔ ta yuu ɓuru kasɛ zɔ̃ng gaanang keɓe kɔ.

⁴ Ka ruu ɓɔɔ, Laa kasɛ nɛɛ wu ta yuu zang piti, nɛɛ ri ti zi ruu ɓɔɔ niizang.

⁵ Laa ɓi gbete kɔ nwani, a zang ɓɔɔ shɛ̃ɛ ka teteng Laa nɛɛ zang piti ɓi doo gbete kɔ. Zang keɓe wukɔ Yeesɔ Kirisi.

⁶ Wukɔ a yuu ɓiɓɛ, nɛɛ tɔ̀ɔ, wu ta yuu shɔnzang nandon. A yuu ɓiɓɛ teetee ka laa ɓɔɔ bɛ̀ɛ́ Laa kasɛ nɛɛ wu ta yuu zang piti kagn ɓɛɛ.

⁷ Ka ruu nɔngkɔ, Laa shing m, zang ɓɔɔ palɛ shonang ɓɛɛ. Nɛɛ n kɔ̀ɔ zang ɓɔɔ ri zang Isirela kpang Ruu Tɔ̃ɔ Laa, n ti tùsù ri danggn shinang ɓɔɔ niizang ɓɛɛ. N kɔɔ ruu ɓɔɔ niizang kɔ nwani. N suu wu sèé kpang.

⁸ N kasɛ zang varɛ, ri nɛɛ gaa Laa ka nɔng piti ɓɔɔ zang kpalɛ yuu zang gaa Laa ɓɛɛ, ri tuu naa ɓarɛ ka lapa. Yeti ɓarɛ wu lasɛ katɔ kpang, ri ti pálɛ̀ naa ri laa nyaa nɛɛ zɔɔ kpang.

⁹ N kasɛ zang soro ri hãa fɔ̃ɔrɔ ɓɔɔ waasɛ̃ ɓɛɛ, ka ruu yusɛ̃ɛ, tɔ̀ɔ, ri yiti yuu ɓarɛ kaa tɔ̃ɔ. Ri gbárɛ̀ bii wu nɛɛ yuu ɓɔɔ ri ti ka zɔ̃ng zɔ̃ng ɓɛɛ kpang. Wu ti nɛɛ laa shoo, nɛɛ vuu turu ɓɔɔ zang palɛ nɛɛ zinariya ɓɛɛ kpang. Wu ti nɛɛ fɔ̃ɔrɔ ɓɔɔ shaa nyaa dɔɔli ɓɛɛ kpang.

¹⁰ Ri gbárɛ́ bii nɛɛ shonang tɔ̃ɔ ɓɔɔ ri palɛ ɓɛɛ, ɓɔɔ daa naa ɓɔɔ zang ɓɔɔ ri dũng Laa, ri palɛ tɔ ɓɛɛ.

¹¹ Zang soro wu kpɛ̃ɛrɛ vuu nɛɛ nwĩiri. Wu tuu yuu ɓiɓɛ kpang.

¹² N kasɛ kpang, zang soro ɓɔɔ wu tusu zang varɛ vuu kpang. Zang soro wu ti nwàng zang bang ka yuu zang varɛ kpang. Wu nwang ɓi nɛɛ nwĩiri ka nɔng ɓɔɔ zang kpálɛ̀ zɔɔ zang bang Laa ɓɛɛ.

¹³ Ka ruu ɓɔɔ, Laa mãa Adamu kɔ shɔɔnang, a naa mãa Hawawu ɓɛɛ.

¹⁴ A zang ti nwãarɛ wu Adamu kpang. Zang nwãarɛ ɓi Hawawu, a ɓa nyaa ɓɔɔ Laa dang ɓɛɛ.

¹⁵ A zang soro naa ta yuu ɓiɓɛ ɓi kaa jaa ɓɔɔ wu yi ɓɛɛ. Nɛɛ yaa danggn ɓɔɔ wu shing ka bii Yeesɔ kpang, nɛɛ ti kasɛ ruu zang katɔ, nɛɛ ti palɛ shi kpang, kpang, nɛɛ ti yiti yuu ɓiɓɛ waasɛ̃ ɓɛɛ.