1 Koranti 7 - Nyaa Shɔɔ Ɓɔɔ Laa a Ɓɛɛ

Ruu Soro Geenang

¹ N tɔɔ, n kɔ̀ɔ́ nɔɔ ruu, ka yuu vuu ɓɔɔ nɔɔ bèe m labeenang ka yuu ɓiɓɛ ɓɛɛ. Naa zang ɓɔɔ nɛɛ wu gee soro kpang, wukɔ tɔ̃ɔ.

² A ka ruu ɓɔɔ dũndũng shang dɔɔli, zang varɛ ɓu wu gee soro ɓiɓɛ, zang soro ɓu wu ti gee varɛ ɓiɓɛ.

³ Zang varɛ wu pàlɛ̀ ɓeeso vuu ɓɔɔ daa naa ɓɔɔ zang varɛ pàlɛ́ soro ɓiɓɛ ɓɛɛ. Zang soro wu ti pàlɛ̀ ɓeevɛ, vuu ɓɔɔ daa naa ɓɔɔ soro pàlɛ́ ɓeevɛ ɓɛɛ.

⁴ Bii zang soro ɓi ɓɔɔ ɓiɓɛ kpang, ɓi ɓɔɔ ɓeevɛ. Bii zang varɛ ɓi ti doo ɓɔɔ ɓiɓɛ kpang kɔ, ɓi ɓɔɔ ɓeeso.

⁵ Ka ruu nɔngkɔ, nɔ́ɔ zãa zɔɔ bii manɛ kpang. Naa nɔɔ kasɛ katɔ, nɔɔ kà zɔɔ diki nɛɛ nɔɔ gaa Laa, tɔ̀ɔ nɔɔ zãa zɔɔ bii. Diki ɓɔɔ nɔɔ ka zɔɔ nɛɛ waa nyaa tɔ, nɔɔ ɓang bii nɛɛ zɔɔ. Ka ruu ɓɔɔ, Sheetang nɛɛ walɛ gbalang wu gãsɛ nɔɔ, wu shing nɔɔ, nɔɔ palɛ vuu shi kpang ɓɛɛ. Ka ruu ɓɔɔ, nɔɔ zunung ɓɔɔ nɔɔ yiti yuu manɛ kpang ɓɛɛ.

⁶ Ruu kɔ n kɔɔ nɔɔ ɓee, n dang nɔɔ wu nyaa nɛɛ, zang ɓu wu gee soro kpang. N kɔ̀ɔ́ nɔɔ m katɔ nɛɛ, n kasɛ tɔ nɛɛ, nɔɔ gee soro.

⁷ Ka jĩng mɛɛ, naa zang ri gee soro kpang, naa wee n gee kpang ɓee, wukɔ tɔ̃ɔ. A Laa palɛ zang kaa bm bm. A zang ɓɔɔ naa, wu palɛ vuu hn, a ti a zang ɓɔɔ naa, wu palɛ vuu ɓi kaa naa ɓɔɔgn.

⁸ Zang ɓɔɔ ri gee soro gn kpang, nɛɛ zang ɓɔɔ gee varɛ gn kpang, a ɓɔɔ rɛɛ suvɔ, n rang yee keɓe nɛɛ rikɔ. Ri nwang nwannang yuu ɓarɛ, ri gee zɔɔ kpang naa wee n nwang ɓee, wukɔ tɔ̃ɔ.

⁹ A zang ɓɔɔ ri nɛɛ kagn ɓɔɔ ri zunung yuu ɓarɛ yitinang kpang, ri gee zɔɔ. Naa zang gee zɔɔ, wukɔ tɔ̃ɔ, ka ɓɔɔ sɛ̃ɛrɛ bii ɓannang nɛɛ soro nɛ̀ɛ́ shaa mɔɔ naa waa ɓɛɛ.

¹⁰ Zang ɓɔɔ ri gee varɛ tɔ ɓɛɛ, n kɔɔ nɔɔ nɛɛ zang soro wu seepaa gãa varɛ ɓiɓɛ kpang. Wu nkɔ kɔɔ nɔɔ ruu keɓe nɛɛ yuu mɛɛ kpang, ɓi Kpanti Yeesɔ Kirisi nɛɛ yuu ɓiɓɛ kɔ kɔɔ nɔɔ.

¹¹ Naa zang soro nɛɛ seepaa doo nɛɛ mani, wu nwang nɔngkɔ, wu gee varɛ takpang. Nɛɛ nɔngkɔ kpang, wu gbãayu ka gãa ɓeevɛ ka nɔng. Zang varɛ wu hing soro ɓiɓɛ kpang tingkiring.

¹² Zang ɓɔɔ ri gee zang ɓɔɔ dũ̀ng Laa kpang ɓɛɛ, n kɔ̀ɔ́ nɔɔ ruu keɓe. Ruu keɓe nkɔ kɔ̀ɔ́ ɓɔɔ yuu mɛɛ, wu nyaa ɓɔɔ Kpanti Yeesɔ Kirisi dang ɓɛɛ kpang. Naa zang ɓɔɔ dũ̀ng Yeesɔ Kirisi gee soro ɓɔɔ dũ̀ng Kirisi ɓi kpang ɓɛɛ. Jaa soro bìí, nɛɛ kasɛ tɔ, nɛɛ wu nwang nɛɛ wu katɔ, zang keɓe wu hing soro bìí kpang.

¹³ A naa zang soro ɓɔɔ gee zang varɛ ɓɔɔ dũ̀ng Laa kpang. Zang varɛ keɓe nɛɛ kasɛ tɔ nɛɛ wu nwang nɛɛ wu katɔ, wu seepaa kpang.

¹⁴ N kɔɔ nɔngkɔ, ka ruu ɓɔɔ, zang varɛ ɓɔɔ dũ̀ng Laa kpang Laa zɔ̃́ng wu ka ruu soro ɓiɓɛ. Laa ti zɔ̃ng jaa soro ɓɔɔ dũng wu kpang ka ruu varɛ ɓiɓɛ. Naa nɔngkɔ kpang, wujɛ ɓarɛ ri nwang ɓarɛ ɓɔɔ Laa kpang. Ɓɔɔ kãntang keɓe Laa tà wujɛ ɓarɛ, ri kaa zang ɓiɓɛ.

¹⁵ Naa zang ɓɔɔ dũ̀ng Laa kpang kasɛ nɛɛ wu yaa zang ɓɔɔ wu gee ɓɛɛ katɔ, wu yaa wu. Ri nɛɛ yaa zɔɔ tɔ, zang ɓɔɔ dũng Laa ka teteng ɓarɛ, nɛɛ zang varɛ, nɛɛ ti zang soro, tá nyaa dannang kpang, ka ruu ɓɔɔ, Laa kasɛ nɛɛ ruu nwang ka nyaa zɔɔ ɓɛɛ.

¹⁶ Ɓɔɔ nɔɔ soro ɓɔɔ ri dũng Laa ɓɛɛ, nɔɔ zi kpang Laa tá yuu varɛ manɛ katɔ, ka ruu manɛ kpang ya? Ɓɔɔ nɔɔ varɛ ɓɔɔ nɔɔ dũng Laa ɓɛɛ nɔɔ zi kpang Laa ta yuu soro manɛ katɔ ka ruu manɛ kpang ya?

Nwang naa ɓɔɔ Laa shingnɛ nɛɛ mɔɔ nwang ɓɛɛ

¹⁷ Zang ɓu wu nwang naa ɓɔɔ Laa ɓaa wu nyaa nɛɛ wu nwang ɓɛɛ. Zang ɓu wu ti nwang naa ɓɔɔ wu nwáng ka tĩng a Laa ɓaa wu nyaa nɛɛ wu naa dũng Yeesɔ Kirisi ɓɛɛ. Wee vuu ɓɔɔ n tusu ka teteng zang Laa nandon nɛɛ zang ri palɛ ɓɛɛ kɔ.

¹⁸ Zang ɓɔɔ nɛɛ kagn ɓɔɔ zang yee wu shaa tɔ, ka ɓɔɔ Laa ɓaa wu nyaa, wu tɔɔ kpang nɛɛ wu gɔ̃ koo bii ka yuu shaa ka nɔng, wu nwang kaa naa bɛ̀ɛ́ wu yee shaa ka takpang kpang. Zang ɓɔɔ nɛɛ ti kagn ɓɔɔ bɛ̀ɛ́ yee shaa gn kpang, ka ɓɔɔ Laa ɓaa wu nyaa ɓɛɛ, wu tɔɔ kpang nɛɛ zang yee wu shaa kpang.

¹⁹ Naa zang yee shaa katɔ, naa zang yee shaa doo kpang, palɛ vuu ɓɔɔ kpang. Vuu ɓɔɔ ɓa weɓe nandon, zang ri dũng rɛɛ nyaa ɓɔɔ Laa dang ɓɛɛ.

²⁰ Zang ɓu wu nwang naa ɓɔɔ wu nwang ka tĩng, a Laa naa ɓaa wu nyaa nɛɛ wu naa dũng Yeesɔ Kirisi ɓɛɛ.

²¹ Naa Laa ɓaa mɔɔ nyaa bɛ̀ɛ́ mɔɔ jaafoo, mɔɔ tɔɔ kpang nɛɛ vuu ɓɔɔ wu kpãa mɔɔ, ka ruu ɓɔɔ, mɔɔ jaafoo ɓɛɛ kpang. Mɔɔ nɛɛ walɛ gbalang ɓɔɔ mɔɔ yaa jaafoo nwannang katɔ, mɔ́ɔ ti yaayi.

²² Ka ruu ɓɔɔ, naa mɔɔ jaafoo ka ɓɔɔ Laa ɓaa mɔɔ nyaa nɛɛ mɔɔ naa dũng Kpanti Yeesɔ Kirisi kãntang keɓe, mɔɔ ɓaa tɔ̀ɔ́ jaafoo kpang. Ka ruu ɓɔɔ, mɔɔ ɓákɛ́ yuu tɔ nɛɛ Kpanti Yeesɔ Kirisi ɓɛɛ. Doo nɔngkɔ, zang ɓɔɔ nɛɛ jaafoo kpang, ka ɓɔɔ Laa ɓaa wu nyaa, nwáng jaafoo Kirisi tɔ.

²³ Laa ningsi vuu ɓɔɔ tɔ̃ɔ, a hoo nɔɔ nɛɛ mani. Nɔɔ tɔ̀ɔ́ jaafòó shɔnzang kpang, nɔɔ manɛ kaa jaafòó Yeesɔ Kirisi.

²⁴ Rɛɛ manzung, ka ruu nɔngkɔ, n kɔɔ nɔɔ, n tɔɔ, zang ɓu wu yaa naa ɓɔɔ wu nwángnɛ́ ka ɓɔɔ Laa ɓaa wu nyaa ɓɛɛ kpang, wu ɓakɛ yuu ɓi nɛɛ Laa sasak.

Ruu ka yuu zang ɓɔɔ ri gee soro gngn kpang, nɛɛ rɛɛ suvɔ

²⁵ N kɔɔ nɔɔ ruu, ka yuu zang ɓɔɔ ri gee soro gn kpang ɓɛɛ. Ɓi Laa a m nyaa dannang ka yuu ruu keɓe kpang. N kɔ̀ɔ́ nɔɔ m ɓɔɔ yeti mɛɛ. Nɔɔ ɓaa shoo waasɛ̃, ka ruu ɓɔɔ, Kpanti Yeesɔ Kirisi pàlɛ̀ m tɔ̃ɔ, tɔ̀ɔ, n nwang zang ɓɔɔ daa naa ɓɔɔ zang shing gn ka wu katɔ ɓɛɛ.

²⁶ Ɓɔɔ n zi ka yeti mɛɛ, naa zang nwang waati zang gee soro kpang, wukɔ tɔ̃ɔ. N kɔɔ nɔngkɔ, ka ruu ɓɔɔ, diki a ka naa ɓɔɔ zang dang jĩng dɔɔli ɓɛɛ.

²⁷ Zang ɓɔɔ nɛɛ gee soro tɔ, wu tɔɔ kpang nɛɛ, wu hing soro ɓiɓɛ kaa tɔ kpang. Zang ɓɔɔ nɛɛ gee soro gn kpang, wu tɔɔ kpang nɛɛ wu gee soro kpang.

²⁸ Naa n kɔɔ doo nɔngkɔ piti, naa zang ɓɔɔ gee soro palɛ wu vuu shi kpang, kpang. Nɔɔ zi tɔ nɛɛ zang ɓɔɔ ri gee soro tɔ, ri naa dang jĩng dɔɔli, ka koo keɓe. N kasɛ nɛɛ jĩng dannang kaɓa wu à ka yuu manɛ kpang.

²⁹ Manzung, mɔ́ɔ ɓaa shoo ka vuu kɔ n kɔɔrɔ ɓee. Diki ɓɔɔ Laa ka ruu ɓɛɛ, bee takpang, ka ruu nɔngkɔ, vuu ɓɔɔ gaayu nɛɛ lɛɛkɔ, zang ɓɔɔ ri gee soro tɔ, ri nwang naa zang ɓɔɔ soro ɓarɛ kagn kpang ɓɛɛ.

³⁰ Zang ɓɔɔ ri kaa nyavɔ ri nwáng naa zang ɓɔɔ ri kaa nyavɔ kpang ɓɛɛ. Zang ɓɔɔ ri tãa tĩnang, ri nwáng naa zang ɓɔɔ ri tãa tĩnang kpang ɓɛɛ. Zang ɓɔɔ ri hooro vuu, ri nwang naa zang ɓɔɔ vuu ɓarɛ kagn kpang ɓɛɛ.

³¹ Zang ɓɔɔ ri nɛɛ palɛ shonang ɓɔɔ ka koo keɓe, ri shing danggn nandon ka yuu vuu keɓe kpang. Ka ruu ɓɔɔ, koo keɓe naa wee wu kãntang ɓee, waa nyaa kaa tɔ ɓɛɛ.

³² N kasɛ kpang, vuu keɓe ri kpãa nɔɔ kpang. Zang ɓɔɔ gee soro gn kpang, rɛ̃rɛ ɓi ka ruu vuu Kpanti Yeesɔ Kirisi kɔ gbete. Kasɛ nɛɛ Kpanti Yeesɔ wu tãa tĩnang ɓiɓɛ.

³³ A zang ɓɔɔ gee soro tɔ, rɛ̃rɛ ɓi ka yuu vuu koo keɓe. Kasɛ nɛɛ soro ɓiɓɛ wu tãa tĩnang ɓiɓɛ.

³⁴ Ka ruu nɔngkɔ, rɛ̃rɛnang ɓiɓɛ vãarɛ kaa tɔ nɔng ziti. Zang soro ri doo nɔngkɔ. Zang soro ɓɔɔ varɛ ɓiɓɛ tɔ̀ɔ́gn kpang, nɛɛ wujɛ soro ri rɛ̃rɛ ɓarɛ ka yuu vuu Kpanti Yeesɔ Kirisi. Ri tuu yeti ɓarɛ nɛɛ bii ɓarɛ nandon ri a wu. A zang soro ɓɔɔ nɛɛ gee varɛ tɔ rɛ̃rɛ ɓi ka yuu vuu koo keɓe. Kasɛ nɛɛ ɓeevɛ wu tãa tĩnang ɓiɓɛ.

³⁵ N kɔɔrɔ ruu keɓe, ka ruu ɓɔɔ, n kasɛ n yi nɔɔ naa ka bii ɓɛɛ. N kasɛ n nɔ̀ɔ nɔɔ gbalang kpang. N kasɛ nɔɔ palɛ vuu ɓɔɔ daa naa katɔ ɓɛɛ, nɔɔ ti walɛ gbalang ɓɔɔ nɔɔ pàlɛ́ Kpanti Yeesɔ Kirisi shonang nɛɛ yeti gbete ɓɛɛ.

³⁶ Ka ruu zang ɓɔɔ ri shu vuu tɔ ka yuu jaa soro ɓɛɛ. Nɛɛ zirɛ sɛ̃ɛrɛ roonang nɛɛ jaa soro keɓe nɛɛ mãa wu kana dɔɔli, kàsɛ̀ nɛɛ wu nɛ̀ɛ́ tuu soro ɓiɓɛ kaa tɔ, wu tuu soro ɓiɓɛ naa ɓɔɔ wu kasɛ ɓɛɛ. Palɛ wu vuu shi kpang, kpang.

³⁷ Naa zang zɔ̃̀ng nɛɛ yeti zang, zang shing zang wu nɛɛ gbãng gbãng ning kpang, nɛɛ zang gee jaa soro ɓɔɔ wu shu vuu tɔ ka yuu ɓiɓɛ kaɓa kpang, rɛ̃rɛnang keɓe nwang nɛɛ yeti ɓiɓɛ. Ti zi tɔ nɛɛ vuu kɔ wu rɛ̃rɛ ɓee, wukɔ tɔ̃ɔ. Nɛɛ gee jaa soro bìí kpang, wukɔ tɔ̃ɔ.

³⁸ Ka ruu nɔngkɔ, zang ɓɔɔ gee jaa soro ɓɔɔ wu shu vuu tɔ ka yuu ɓiɓɛ, pálɛ̀ tɔ̃ɔ. A zang ɓɔɔ bɛ̃ɛ geenang kɔ pálɛ̀ tɔ̃ɔ ɓa zang ɓɔɔ gee katɔ ɓɛɛ.

³⁹ Zang soro ɓɔɔ gee varɛ tɔ, Laa ɓakɛ wu ɓi tɔ nɛɛ varɛ ɓiɓɛ dòndòng. A naa varɛ ɓiɓɛ vɔrɛ, wàlɛ́ gbalang katɔ wu gee varɛ ɓɔɔgn, ɓɔɔ bii tĩng wu nɛɛ wu ɓɛɛ. Laa kasɛ nɛɛ wu gee doo zang ɓɔɔ dũng Laa katɔ kɔ.

⁴⁰ Ɓɔɔ n zi ka yeti mɛɛ, naa jaa soro kaɓa gee varɛ ɓɔɔ kpang, tãa tĩnang ɓa ɓɔɔ wu nɛɛ gee varɛ ɓɔɔgn katɔ. N zi tɔ, Suru Laa kɔ tusu m vuu kɔ n kɔɔ ɓee.