1 Koranti 14 - Nyaa Shɔɔ Ɓɔɔ Laa a Ɓɛɛ

Bulu gisi ruu ka yuu náa ɓɔɔ Suru Laa alɛ zang, zang palɛ vuu ɓɛɛ

¹ Ka ruu nɔngkɔ, nɔɔ shing jĩng ka zang kasɛnang gbãng gbãng. A nɔɔ ti shing jĩng nɛɛ yeti gbete, Suru Laa wu a nɔɔ naa ɓɔɔ nɔɔ palɛ shonang nɛɛ mani ka teteng zang ɓɔɔ ri dũng Laa ɓɛɛ. Nɔɔ shing jĩng, wu a nɔɔ naa, ɓɔɔ nɔɔ kɔɔ zang ruu ɓɔɔ a nɛɛ bii Laa ɓɛɛ kɔ gbãng gbãng.

² Zang ɓɔɔ Suru Laa a wu naa, a rang yee nɛɛ nyaa ɓɔɔ wu kpɛ̃ɛrɛ katɔ kpang ɓɛɛ, rang yee ɓi nɛɛ Laa, wu nɛɛ shɔnzang kpang. Ka ruu ɓɔɔ, shɔnzang ri tãa ruu ɓɔɔ wu kɔɔ kpàng ɓɛɛ. Kɔɔrɔ ɓi vuu ɓɔɔ Laa wàasɛ̀ zang katɔ, ɓɛɛ nɛɛ naa ɓɔɔ Suru Laa a wu ɓɛɛ.

³ Zang ɓɔɔ kɔɔ ruu ɓɔɔ Laa tusu wu, rang yee ɓi nɛɛ shɔnzang. Ruu ɓɔɔ wu kɔɔ ɓɛɛ, yi zang naa katɔ ka bii. Ruu bìí mã zang danggn katɔ, wu shingnɛ yeti ɓarɛ wu valɛ.

⁴ Ka ruu nɔngkɔ, zang ɓɔɔ rang yee nɛɛ nyaa ɓɔɔ wu kpɛ̃ɛrɛ katɔ kpang yi ɓi yuu ɓiɓɛ naa ka bii. A zang ɓɔɔ kɔɔrɔ zang ruu ɓɔɔ a nɛɛ bii Laa, yi ɓi zang ɓɔɔ ri dũng doo Laa kɔ naa ka bii.

⁵ N kasɛ nɛɛ Suru Laa wu a zang ɓu naa wu kɔɔ ruu nɛɛ nyaa ɓɔɔ wu kpɛ̃ɛrɛ katɔ kpang ɓɛɛ. Naa nɔɔ kɔɔrɔ zang ruu ɓɔɔ a nɛɛ bii Laa, n kàsɛ̀ wukɔ gbãng gbãng. Zang ɓɔɔ kɔɔrɔ zang ruu ɓɔɔ a nɛɛ bii Laa ɓa zang ɓɔɔ rang yee nɛɛ nyaa ɓɔɔ wu kpɛ̃ɛrɛ katɔ kpang katɔ. Zang ɓɔɔ nɛɛ kagn ɓɔɔ nwàngsɛ́ zang ɓɔɔ ri dũng Laa dĩiri ruu bii kpang ɓɛɛ.

⁶ Manzung, ka diki ɓɔɔ n naa a ka nɔng manɛ, naa n ràng nɔɔ yee nɛɛ nyaa ɓɔɔ n kpɛ̃ɛrɛ katɔ kpang, yee mɛɛ yi nɔɔ naa biya ka bii viya? Naa n arɛ, n tusu vuu ɓɔɔ shɔɔ ɓɔɔ Laa tusu m kpang, n ti shing nɔɔ, nɔɔ zi vuu tɔkn gaagaa kpang, naa n kɔɔ nɔɔ ruu ɓɔɔ a nɛɛ bii Laa kpang, a n ti tusu Ruu Laa kpang, ruu mɛɛ yì nɔɔ naa ka bii kpang.

⁷ N gãsɛ nɔɔ vuu, doo nɛɛ vuu ɓɔɔ zang gaarɛ soo nɛɛ mani naa leere, nɛɛ vũngta ɓɔɔ suru ka bii ɓarɛ kpang ɓɛɛ. Naa ri nwángsɛ̀ soo wu tɔ̃ɔ tɔ̃ɔ kpang, zang tã̀á soo ɓɔɔ zang gaa ɓɛɛ biya?

⁸ Naa zang jèe gbòó sĩiri waasɛ̃ kpang, zang tãa biya zang kpalɛ bii sĩiri tanang kaa viya?

⁹ Nɔɔ manɛ doo nɔngkɔ, zang ri zi vuu ɓɔɔ nɔɔ kɔɔ ruu ka yuu ɓiɓɛ biya nɔɔ nɛɛ kɔɔ nɛɛ nyaa ɓɔɔ zang tãa kpang ɓɛɛ. Rúu manɛ tɛɛ ɓi naa jasung waati.

¹⁰ Nyaa ɓɔɔ zang koo ri rangkɛ dɔɔli. Nyaa keɓe nandon nwang ka doo ruu.

¹¹ N nɛɛ tãa nyaa ɓɔɔ zang rang m kpang, n nwang kaa naa zang zanti ka bii zang ɓɔɔ rang m yee bii ɓɛɛ, a zang ɓɔɔ rang m yee kɛɓɛ ti nwang kaa naa zang zanti kɔ doori ka nɔng mɛɛ.

¹² Ka ruu nɔngkɔ, n kɔ̀ɔ́ nɔɔ, wee nɔɔ shing jĩng ka vuu ɓɔɔ Suru Laa alɛ zang ɓee. Nɔɔ shing jĩng ka vuu ɓɔɔ nɔɔ naa yi zang ɓɔɔ ri dũng Laa naa nɛɛ mani ka bii kɔ gbãng gbãng. Tɔ̀ɔ, ri shii kaa nɛɛ kaka kɔ sasak.

¹³ Ka ruu nɔngkɔ, zang ɓɔɔ rang yee nɛɛ nyaa ɓɔɔ wu kpɛ̃ɛrɛ katɔ kpang ɓɛɛ, wu gaayi Suru Laa wu a wu naa ɓɔɔ wu nwàngsɛ́ zang dĩiri ruu bìí nɛɛ mani ɓɛɛ.

¹⁴ N kɔɔ nɔngkɔ, ka ruu ɓɔɔ, naa zang gàa Laa nɛɛ nyaa ɓɔɔ zang kpɛ̃ɛrɛ katɔ kpang, ɓi Suru ɓiɓɛ gaa Laa ɓiri. A yeti ɓiɓɛ zi vuu ɓɔɔ wu kɔɔ ɓɛɛ ɓi kaa takpang.

¹⁵ A n palɛ ɓu kaa biya? Naa ɓɔɔ n palɛ keɓe. N gaa Laa nɛɛ Suru ɓɔɔ Laa a m ɓɛɛ, n ti gàa Laa jong nɛɛ rɛ̃rɛnang mɛɛ. N gáa soo nɛɛ Suru ɓɔɔ Laa a m ɓɛɛ, n ti gáa soo jong nɛɛ rɛ̃rɛnang mɛɛ.

¹⁶ Nɛɛ nɔngkɔ kpang, naa mɔɔ zãa Laa nɛɛ nyaa ɓɔɔ Suru Laa a mɔɔ ɓɛɛ, a zang ɓɔɔ tãa nyaa kaɓa kpang, tã̀á ɓɔɔ mɔɔ zãa Laa kaa biya wu naa kasɛ nyaa kaa jong nɛɛ mɔɔ nɛɛ “Nɔngkɔ” viya?

¹⁷ Naa mɔɔ zãa Laa doo tɔ̃ɔ tɔ̃ɔ, Laa gaanang ɓaaɓɛ yi zang ɓɔɔ naa ka bii kpang.

¹⁸ N zãa Laa tɔ, ka ruu ɓɔɔ, Suru ɓiɓɛ a m naa tɔ, n ráng yee nɛɛ nyaa ɓɔɔ n kpɛ̃ɛrɛ katɔ kpang, n ɓa nɔɔ katɔ nandon ɓɛɛ.

¹⁹ Naa doo nɔngkɔ piti, naa zang kpalɛ ka Gãa Laa, ɓɔɔ n zi ka yeti mɛɛ naa n kɔɔ ruu maani nɛɛ nyaa ɓɔɔ zang ri tãa katɔ wukɔ tɔ̃ɔ. Ka ɓɔɔ naa n kɔɔ ruu labang kopi nɛɛ nyaa ɓɔɔ zang ri tãa kpang ɓɛɛ.

²⁰ Manzung, nɔɔ rɛ̃rɛ naa wujɛ kpang. Nɛɛ a tɔ ka nɔng shi kpang palɛnang, nɔɔ risi yuu manɛ naa wujɛ ɓɔɔ ri palɛ shi kpang ɓarɛ kpang ɓɛɛ. Nɛɛ a tɔ ka nɔng rɛ̃rɛnang, nɔɔ rɛ̃rɛ kaa rɛ̃rɛnang zang bang.

²¹ Zang bèe ka yeti labeenang Laa nɛɛ, “Laa kɔɔyi tɔɔ, N naa shɔng zang ɓɔɔ ri rang yee nɛɛ nyaa ɓɔɔgn, ri naa kɔ̀ɔ́ zang mɛɛ keɓe ruu mɛɛ. N rang ri yee nɛɛ nyaa zang ɓɔɔ ri zi nung kpang ɓɛɛ. Naa n rang yee doo nɔngkɔ piti, ri ɓaa shoo ri tãa m kpang.”

²² Ka ruu nɔngkɔ, naa Suru Laa a zang naa, zang rang yee nɛɛ nyaa ɓɔɔ zang kpɛ̃ɛrɛ katɔ kpang, zang ɓɔɔ ri shing danggn gn ka bii Yeesɔ Kirisi kpang, ri zi ka wukɔ nɛɛ ɓi Laa rang yee. Wu ka ruu zang ɓɔɔ ri shing danggn ɓarɛ tɔ ka bii Yeesɔ Kirisi kpang. Zang nɛɛ kɔɔ vuu ɓɔɔ Laa tusu zang, wee ɓi vuu ɓɔɔ Laa a zang ɓɔɔ ri shing danggn tɔ ka bii Yeesɔ Kirisi ɓɛɛ. Wu ka ruu zang ɓɔɔ ri shing danggn gn ka bii Yeesɔ Kirisi kpang, kpang.

²³ Zang ɓɔɔ ri dũng Laa ri nɛɛ kpalɛ zɔɔ tɔ nandon, zang ɓu nɛɛ gaayu yee rannang tɔ nɛɛ nyaa ɓɔɔ wu kpɛ̃ɛrɛ katɔ kpang. Naa zang ɓɔɔ ri zi vuu keɓe kpang nɛɛ zang ɓɔɔ ri dũ̀ng Yeesɔ Kirisi ɓarɛ kpang, ri naa à ka nɔng, ri kɔɔ ɓarɛ nɛɛ shoko takɛ nɔɔ manɛ tɔ kɔ nandon.

²⁴ A naa zang ɓɔɔ ri dũng Laa ri kɔɔrɔ vuu ɓɔɔ Laa tusu ri, naa zang ɓɔɔ ri zi vuu keɓe kpang nɛɛ zang ɓɔɔ dũng Yeesɔ Kirisi ɓi kpang, à ka nɔng. A tãa ruu ɓarɛ kaɓa nandon, ruu kaɓa tusu wu nɛɛ wu ɓi zang ɓɔɔ palɛ vuu shi kpang ɓɛɛ. Ruu kaɓa, ri dɔng wu ruu katɔ.

²⁵ Ruu kaɓa nwàngsɛ́ wu rɛ̃rɛnang ɓɔɔ bɛ̀ɛ́ ka yeti ɓiɓɛ ɓɛɛ. Ruu kaɓa shing wu, wu tang ka tĩng Laa, wu bang Laa. Wu ti kɔɔyi nɛɛ, Laa kagn nɔng ɓɔɔ nɔɔ kpalɛ zɔɔ ɓɛɛ niizang.

Naa ɓɔɔ nɔɔ bang Laa ɓɛɛ

²⁶ Manzung, nɔɔ nɛɛ n kɔɔ nɔɔ ruu biya? Nɔɔ nɛɛ kpalɛ zɔɔ tɔ nɛɛ nɔɔ bang Laa, zang gbete wu tusu soo ɓɔɔ zang gaa ɓɛɛ. Zang gbete wu tùsù zang Ruu Laa. Zang ɓɔɔ wu tùsù zang vuu ɓɔɔ Laa tusu wu ɓɛɛ. Zang ɓɔɔ wu rang yee nɛɛ nyaa ɓɔɔ wu kpɛ̃ɛrɛ katɔ kpang. Zang ɓɔɔ wu ti kɔɔ zang ɓi dĩiri ruu keɓe. Zang ri palɛ vuu piti naa ɓɔɔ yi zang naa ka bii, zang ri zi Ruu Laa kaa gbãng gbãng ɓɛɛ.

²⁷ Zang ɓɔɔ ri nɛɛ kagn nɔng, ɓɔɔ ri rang yee nɛɛ nyaa ɓɔɔ ri kpɛ̃ɛrɛ katɔ kpang. Zang ri ɓa taati kpang, ka teteng ɓarɛ, ri rang yee. Ri ti rang gbete gbete. Zang ɓu nɛɛ rang tɔ, wu yaa zɔɔ nɔng. Zang ɓɔɔ ri ti kɔɔ zang kaa dĩiri ruu bìí, tɔ zang piti ri zi vuu ɓɔɔ ri kɔ̀ɔrɔ̀ ɓɛɛ kati.

²⁸ Zang ɓɔɔ nɛɛ kagn nɔng, ɓɔɔ Laa a wu naa dĩiri ruu ɓɔɔ zang rang nɛɛ nyaa ɓɔɔ zang kpɛ̃ɛrɛ katɔ kpang kaɓa zinang kpang, zang ɓɔɔ ri rang nyaa kaɓa, ri vɔ̃ nyaa katɔ ka nɔng ɓɔɔ zang kpalɛ zɔɔ ɓɛɛ. Ri ráng nyaa bìí nɛɛ Laa ka yeti ɓarɛ.

²⁹ Zang ɓɔɔ ri kɔɔ zang vuu ɓɔɔ Laa tusu ri, ri nɛɛ ka nɔng ri ziti kɔ taati ri rang yee. Zang ɓɔɔ nimbang ri rɛ̃̀rɛ̀ ɓarɛ kaa tɔ waasɛ̃ ka yuu ruu ɓɔɔ zang kaɓa ri kɔɔ ɓɛɛ.

³⁰ Naa Laa tusu zang ɓɔɔ, vuu shɔɔ ka ɓɔɔ wu nwang ka nɔng ɓɔɔ nɔɔ kpalɛ zɔɔ bɛ̀ɛ́ zang ɓɔɔ shiiyi, kɔɔ vuu ɓɔɔ Laa tusu wu. Zang ɓɔɔ shiiyi, ɓɔɔ rang yee ka nyaa kaɓa wu vɔ̃ nyaa ka gbongkarɛ.

³¹ Zang ɓɔɔ wu kɔɔ vuu ɓɔɔ Laa tusu wu, wu yaa zang ɓɔɔ nɔng, tɔɔ vuu ɓɔɔ ri kɔɔyi wu nwàng zang vuu kati. Tɔ̀ɔ, ruu ɓarɛ wu mã zang piti danggn kati.

³² Zang ɓɔɔ Laa a ri Suru ɓɔɔ ri kɔɔ zang vuu ɓɔɔ wu tusu ri, ri zunung ɓɔɔ ri yiti Suru ɓɔɔ Laa a ri kaɓa katɔ.

³³ Ka ruu ɓɔɔ, Laa tã̀a tĩnang nyaa ɓɔɔ ruu haa kpang ɓɛɛ. Naa ruu nwang ka nyaa zɔɔ, Laa tãa tĩnang wukɔ jong. Ka Gãa Laa ɓɔɔ zang ɓɔɔ ri dũng Laa kagn nandon.

³⁴ Zang soro ri vɔ̃ nyaa katɔ ka nɔng ɓɔɔ nɔɔ kpalɛ zɔɔ nɔɔ bang Laa ɓɛɛ. Ri rang yee ɓarɛ kpang. Ri tuu yuu ɓarɛ katɔ kpang, naa ɓɔɔ zang bee ka yeti labeenang Laa ɓɛɛ.

³⁵ Ri nɛɛ zi vuu ɓɔɔ kpang, ri kasɛ nɛɛ ri hɛ̃ɛ zang, ri yaa gbongkarɛ. Ri nɛɛ shɛ̃ɛ gãa tɔ, ri hɛ̃ɛ varɛ ɓarɛ. Naa zang soro rang yee ka nɔng ɓɔɔ nɔɔ kpalɛ zɔɔ ka Gãa Laa, ɓi vuu yusɛ̃ɛ.

³⁶ Ɓɔɔ nɔɔ zirɛ nɛɛ, Ruu Laa nwang nyaa nɛɛ bii manɛ kɔ ya? Nɔkɔ tãa ruu bìí gbete ya?

³⁷ Zang ɓɔɔ nɛɛ tuu yuu ɓiɓɛ nɛɛ wu zang ɓɔɔ kɔɔ ruu ɓɔɔ Laa tusu wu ɓɛɛ. Nɛɛ ti rɛ̃rɛ ka yeti ɓiɓɛ nɛɛ suru Laa ti a wu naa tɔ. Wu zi katɔ nɛɛ ruu kɔ n bèé nɔɔ ɓee, ɓi Kpanti Yeesɔ Kirisi nɛɛ yuu ɓiɓɛ dang nyaa nɛɛ ruu palɛ vuu keɓe.

³⁸ Zang ɓɔɔ nɛɛ tà ruu keɓe nɔngkɔ kpang, zang ri ɓaa shoo ka ruu ɓiɓɛ kpang jong.

³⁹ Ka ruu nɔngkɔ, manzung, n kɔ̀ɔ́ nɔɔ, nɔɔ shing danggn Suru Laa wu a nɔɔ naa, nɔɔ kɔɔ zang Ruu Laa ɓɔɔ Laa tusu nɔɔ ɓɛɛ. Nɔɔ zãa zang yee rannang nɛɛ nyaa ɓɔɔ ri kpɛ̃ɛrɛ katɔ kpang, kpang.

⁴⁰ Nɔɔ palɛ vuu kaa gbalang ɓɔɔ tɔ̃ɔ, ɓɔɔ zang haa nyaa kagn kpang ɓɛɛ.