1 Koranti 11 - Nyaa Shɔɔ Ɓɔɔ Laa a Ɓɛɛ

¹ Nɔɔ palɛ vuu doo naa ɓɔɔ n pálɛ̀ ɓɛɛ kɔ. Naa ɓɔɔ n palɛ naa ɓɔɔ Kirisi pálɛ́ ɓɛɛ.

Zang soro ri zuu yuu katɔ, ri nɛɛ gàá Laa ɓɛɛ

² N dɔ̀ɔ́ nɔɔ ka ruu ɓɔɔ danggn ruu mɛɛ nandon, ning nɔɔ kpang ka vuu piti ɓɛɛ. Nɔɔ ti palɛ vuu naa ɓɔɔ n tùsù nɔɔ katɔ ɓɛɛ.

³ A n kasɛ nɔɔ zi vuu keɓe katɔ. Kirisi wukɔ zang bang ka yuu zang varɛ, a zang bang zang soro ɓi kaa varɛ ɓiɓɛ. A zang bang Kirisi ɓi kaa Laa.

⁴ Zang varɛ nɛɛ gaa Laa, naa nɛɛ kɔɔ doo vuu ɓɔɔ Laa kɔɔ wu ɓɛɛ, wu hãa vuu waayu ka yuu kpang. Naa hãayi sèng Kirisi ɓɔɔ wukɔ zang bang ɓiɓɛ kpang.

⁵ Ɓɔɔ zang soro naa gaa Laa, naa nɛɛ kɔɔ vuu ɓɔɔ Laa kɔɔ wu, wu zúu yuu katɔ, wukɔ tɔ̃ɔ. Naa zuu yuu kpang, sèng ɓeevɛ ɓɔɔ wukɔ zang bang ɓiɓɛ kpang. Ɓi gbete nɛɛ zang soro ɓɔɔ zang kpɛ̃ɛ wu yuu ɓiɓɛ katɔ ɓɛɛ.

⁶ Zang soro nɛɛ tɔɔ wu zùu yuu ɓiɓɛ kpang, wu yele suuyuu ɓiɓɛ katɔ kpiikpi. Ruu zi tɔ, naa zang yele suuyuu zang soro naa zang ti kpɛ̃yi, ɓi vuu yusɛ̃ɛ. Ka ruu nɔngkɔ, wu zuu yuu katɔ.

⁷ Ruu ɓɔɔ zang tɔɔ, zang varɛ wu zùu yuu ɓi kpang, ɓi ka ruu ɓɔɔ, Laa mãa ɓi zang varɛ naa bii ɓiɓɛ ɓɛɛ. Zang ti zi bannang Laa ɓi ka bii zang varɛ kɔ ɓɛɛ. A zang zi bannang zang varɛ ɓi ka bii ɓeeso.

⁸ Zang mãa zang varɛ wu nɛɛ bii zang soro kpang. Zang mãa ɓi zang soro kɔ jong nɛɛ bii zang varɛ.

⁹ Laa ti mãa zang soro ka ruu zang varɛ, wu zang varɛ ka ruu zang soro kpang.

¹⁰ Ka ruu nɔngkɔ, zang soro wu zuu yuu ɓiɓɛ katɔ, tɔ̀ɔ, zang ri zi kaa gn nɛɛ ɓeevɛ kɔ zang bang ɓiɓɛ. Tɔ̀ɔ, zang nyaa shonang Laa ɓɔɔ ka lapa ri lasɛ yeti kaa tɔ̀ɔ́ nɛɛ wu kpang.

¹¹ Danggn wu ning nɔɔ kpang, ka wee ruu ɓakɛ zɔɔ tɔ, nɛɛ Kpanti Yeesɔ ɓee, zang soro di bii kaa bii zang varɛ. A zang varɛ ti di bii kaa bii zang soro.

¹² Ka ruu ɓɔɔ, Laa zɔ̃ng kaka zang varɛ a mãa zang soro nɛɛ mani ɓɛɛ. Kãntang keɓe, kaa zang soro yi zang varɛ kati. A vuu piti à ɓi kaa nɛɛ bii Laa.

¹³ Nɔɔ zi ɓu biya ka yeti manɛ viya? Naa zang soro shii paa ka Gãa Laa, gaa Laa, zuu yuu ka takpang tɔ̃ɔ ya?

¹⁴ Ka gbalang ɓɔɔ Laa mãarɛ vuu ɓɛɛ, naa suuyuu zang varɛ bée dɔɔli palɛ wu vuu yusɛ̃ɛ kpang ya?

¹⁵ Ɓɔɔ zang soro suuyuu beebang ɓi vuu jasang, ka ruu ɓɔɔ, Laa a wu suuyuu beebang tɔɔ, wu zuu yuu ɓiɓɛ nɛɛ mani ɓɛɛ.

¹⁶ Naa zang ɓɔɔ kagn ɓɔɔ bɛ̃ɛ ruu keɓe, wu zirɛ nɛɛ ruu nandon nɛɛ zang Gãa Laa ɓɔɔ ka bm bm nandon, ruu palɛ ɓuru nɔngkɔ.

Ruu ka yuu vuu shaanang ɓɔɔ zang shaayi, zang kpaa danggn vɔrɔ Yeesɔ ɓɛɛ

¹⁷ Ka vuu kɔ n kɔɔ nɔɔ ruu ka yuu ɓiɓɛ ɓee, n dɔ̀ɔ nɔɔ ka yuu vuu keɓe kpang. Ka ruu ɓɔɔ, nɔɔ nɛɛ kpalɛ zɔɔ tɔ nɛɛ nɔɔ bang Laa, nɔɔ pálɛ̀ vuu shi kpang dɔɔli ɓa ɓɔɔ tɔ̃ɔ katɔ.

¹⁸ Vuu ɓɔɔ tĩng shɔɔnang keɓe. Zang ri kɔɔ m nɛɛ, ɓɔɔ nɔɔ dũng Laa ɓɛɛ, nɔɔ nɛɛ kpalɛ zɔɔ tɔ nɔɔ basɛ zɔɔ ka vaa ka bm bm, nɔɔ shing jĩng nɛɛ zɔɔ kpang. N zirɛ mɔɔ kɔɔ nɛɛ ruu keɓe niizang.

¹⁹ Nɔɔ basɛ zɔɔ katɔ, ka ruu ɓɔɔ, naa nɔngkɔ kpang, zang zi zang ɓɔɔ ri dũng Yeesɔ Kirisi nɛɛ yeti gbete kpang ɓɛɛ.

²⁰ Wee nɔɔ palɛ nɔngkɔ ɓee, naa nɔɔ kpalɛ nɛɛ nɔɔ shaa vuu shaanang, nɔɔ kpaa manɛ danggn Kpanti Yeesɔ Kirisi kpang.

²¹ N kɔɔ nɔngkɔ, ka ruu ɓɔɔ nɔɔ nɛɛ shaa vuu shaanang kana, zang ɓu shaa ɓi vuu shaanang ɓiɓɛ ɓɛɛ. Ka ruu nɔngkɔ, ɓɔɔ zang ɓɔɔ nyɔkɔ nyɔ ri ɓarɛ katɔ, zang ɓɔɔ ri ɓoo saa ɓarɛ tɔ, ri puu tɔ, saa yee ri kana.

²² Ayii! Gãa manɛ kagn ɓɔɔ naa nɔɔ shaa vuu, nɔɔ ti ɓoo vuu ɓoonang kagn ɓɛɛ kpang ya? Nɔɔ seng zang Laa kpang ka ruu viya? A nɔɔ ti palɛ zang ɓɔɔ vuu ka naa ɓarɛ kpang vuu yusɛ̃ɛ wiya? N kɔ̀ɔ́ nɔɔ ɓu kaa nɛɛ viya? Nɔɔ shing ɓu ka yeti manɛ nɛɛ n dɔ̀ɔ́ nɔɔ katɔ ka ɓɔɔ nɔɔ palɛ naa weɓe ya? Kpang. N dɔ̀ɔ nɔɔ kpang tingkiring.

²³ Laa tùsù m vuu kɔ n tusu nɔɔ ɓee doo ka tĩng. Tùsù m tɔɔ nɛɛ zĩi, ka diki ɓɔɔ zang nyɔ yuu Kpanti Yeesɔ Kirisi kagn ɓɛɛ. Tuu borodi ka naa,

²⁴ zãa Laa tɔ, a shalɛ. A kɔɔyi nɛɛ, “Wee bii mɛɛ ɓɔɔ n a zang ka ruu manɛ kɔ. Nɔɔ palɛ nɔngkɔ, tɔ̀ɔ, nɔɔ kpaa danggn mɛɛ kaa gn.”

²⁵ Zang shaa borodi tɔ, a Kpanti Yeesɔ ti tuu juwa ɓɔɔ mii inabi kagn doo nɔngkɔ, a kɔɔyi tɔɔ, “Wee juwa ɓɔɔ naa tusu zang nɛɛ Laa mã nyaa shɔɔ tɔ, nɛɛ nɔɔ, nɛɛ zĩi mɛɛ ɓɛɛ. Nɔɔ pálɛ́ nɔngkɔ, ka diki ɓɔɔ nɔɔ ɓoo ɓɛɛ, tɔ̀ɔ, nɔɔ kpaa danggn mɛɛ kaa gn.”

²⁶ Ka ruu nɔngkɔ, vuu ɓɔɔ gaayu lɛɛkɔ sasak, diki ɓɔɔ Yeesɔ gbãayu a nɛɛ mani, lee ɓɔɔ nɔɔ shaa borodi naa weɓe, a nɔɔ ɓoo mii inabi naa weɓe. Nɔɔ kɔɔrɔ manɛ zang nɛɛ Kpanti Yeesɔ vɔ ka ruu zang nandon.

²⁷ Ka ruu nɔngkɔ, naa zang ɓɔɔ shaa borodi Yeesɔ keɓe nɛɛ ti ɓoo mii inabi ɓiɓɛ ka gbalang ɓɔɔ daa naa kpang ɓɛɛ. Nwang naa ɓɔɔ palɛ bii Kpanti Yeesɔ nɛɛ zĩi ɓiɓɛ vuu shi kpang ɓɛɛ.

²⁸ Ka ruu nɔngkɔ, zang ɓu wu bengke yeti ɓiɓɛ ka gbongkarɛ waasɛ̃ tɔɔ wu shaa borodi Kpanti Yeesɔ, wu ti ɓoo mii inabi ɓiɓɛ.

²⁹ Zang ɓɔɔ nɛɛ zi dĩiri bii kpanti Yeesɔ keɓe kpang, nɛɛ shaa borodi nɛɛ ti ɓoo mii inabi zang keɓe gɔ̃ jĩng dannang Laa a nɛɛ mani ka yuu ɓiɓɛ.

³⁰ Ka ruu vuu keɓe kɔ, zang dɔɔli ka teteng manɛ vuu palɛ ri katɔ. Nɔɔ ti lakɛ naa ka bii kpang. A zang ɓɔɔ ti vɔlɔ.

³¹ Naa ruu bengke yeti ɓuru waasɛ̃ ka gbongkarɛ, tɔ̀ɔ, ruu shaayi, Laa naa dɔ̀ng rùu ruu kpang.

³² Kpanti Yeesɔ dɔng rùu ruu, a ti gɔ̃ ruu shoo waati kpang, tusu ruu gbalang tɔ̃ɔ nɛɛ ruu palɛ vuu shi kpang tɔ. Tɔ̀ɔ, diki ɓɔɔ wu naa dɔng zang koo ruu kagn wu ɓakɛ ruu kaa tɔ̀ɔ́ nɛɛ ri kpang.

³³ Ka ruu nɔngkɔ, rɛɛ manzung, n kɔɔ nɔɔ ruu keɓe. Ka laa ɓɔɔ nɔɔ kpalɛ zɔɔ nɛɛ nɔɔ shaa vuu shaanang Kpanti Yeesɔ ɓɛɛ nɔɔ gã zɔɔ katɔ.

³⁴ Zang ɓɔɔ nyɔkɔ nɛɛ nyɔ wu dɔɔli, wu shaa vuu shaanang ka gãa ɓiɓɛ ka gbongkarɛ, tɔ̀ɔ wu arɛ. Tɔ̀ɔ, nɔɔ shingnɛ Laa wu dɔng nɔɔ ruu nɛɛ zɔɔ kpalɛnang manɛ kpang. N nɛɛ naa a tɔ ka nɔng manɛ, n naa kɔɔrɔ nɔɔ ruu ditɔ ka yuu vuu ɓɔɔ kagn ɓɛɛ.