Yoswa 21 - Mawu a Mulluku

Mizinda dda Alevi

¹ Nllapo nimodda oohoollella a mabanja a nlloko na Levi yaawa wa mullupa mukutho Eleazara, wa Yoswa, mwaana a Nuni ni wa oohoollella a mabanja a malloko mattheene a Aisraele.

² Alevaayo yaallota o Shilo mu ellapo ya Kanani, ellota wi, “Apwiya yaalamula oweella mwa Mose wi hiyaano anivahe mizinda ddookhallamo navettho nave mapuro oochihellamo enama ddahu.”

³ Sika Aisraele yahaavaha Alevaayo ovenyera va yoohallaniiwa moollikana ni nnddo Apwiya yalamulalliiwa mizinda ni mapuro oochihellamo eziweto.

⁴ Woombesa waamorella mabanja a Kohati nave Alevi ayo yaari edduullu dda mullupa mukutho, Aroni yaavahiwe mizinda khumi ni miraru ovenyera m'mallokoni a Yuda, Simeoni ni Benjamini.

⁵ Nave anamwani a Kohati oohallaayo yaavahiwa mwawoombesa ovenyera m'mallokoni a Efuremu ni Dani navettho hafu a nlloko na Manase mizinda khumi.

⁶ Agereshoni yaavahiwa mwawoombesa ovenyera m'mallokoni a Isakara, Ashere, Nafutali ni hafu a nlloko na Manase nookhalla o Bashani mizinda 13.

⁷ Mabanja a Merari yaavahiwa mwawoombesa ovenyera m'mallokoni a Rubeni, Gadi ni Zebuloni mizinda 12.

⁸ Aisraele attheene vamodda yaavelleella mizinda ddenndda wa Alevi mwawoombesa vamoddattho ni mapuro oochihellamo eziweto moollikana ni nnddo yalamulalle Apwiya oweella mwa Mose.

⁹ Vano yaavaha ovenyera va nlloko na Yuda ni na Simeoni mizinda

¹⁰ wa edduullu dda Aroni, o nibanja nimodda na Kohati ayo yaari Alevi vawi woombesa wawaamba wahaamorella.

¹¹ Yahaavaha muzinda wa Kiriyati Araba, (Kiriyati yaari attiitthinnya a Anaki), nnddina naye nimodda tti Hebroni. Muzindooyo waari mu ellapo yamiyangweelle ya Yuda vamoddattho ni mapuro oochihellamo eziweto moowaapheella muzindooyo.

¹² Koma emata dda muzindooyo ni matawoniiwa yaamuvaha Kalebe, mwaana a Yefune wi ekhalle yaaye.

¹³ Sika matawoni mattheene ayo yavahiwe wa edduullu dda Aroni, mullupa mukutho tti, Hebroni, oyo waari muzinda woovulluwellamo muthu oomwiipha muthu oohikhalla mwaphudda ni mapuro oochihellamo eziweto navettho Libina ni mapuro oochihellamo eziweto,

¹⁴ Yatiri ni mapuro oochihellamo eziweto, Eshitemowa ni mapuro oochihellamo eziweto,

¹⁵ Holoni ni mapuro oochihellamo eziweto, Debiri ni mapuro oochihellamo eziweto,

¹⁶ Aini ni mapuro oochihellamo eziweto, Yuta ni mapuro oochihellamo eziweto ni Beteshemeshi ni mapuro oochihellamo eziweto. Mizinda mitthanu ni misese ovenyera mu malloko meellaalla.

¹⁷ Nave ovenyera mu nlloko na Benjamini ddaari Gibiyoni ni mapuro oochihellamo eziweto, Geba ni mapuro oochihellamo eziweto,

¹⁸ Anatoti ni mapuro oochihellamo eziweto ni Alimoni ni mapuro oochihellamo eziweto, mizinda misese.

¹⁹ Allupa mukutho, edduullu dda Aroni, ddaavahiwa mizinda khumi ni miraru, ottakanyiheravo mapuro oochihellamo eziweto.

²⁰ Mabanja mamodda oohalla a Kohati, a nlloko na Levi, mwawoombesa yaavahiwa mizinda ddimodda ovenyera o nlloko na Efuremu

²¹ Yaavahiwa Shekemu ni mapuro oochihellamo eziweto o miyaango dda Efuremu, muzinda woovulluwellamo muthu oomwiipha mukhwaaye oohikhalla mwaphudda ni muzinda wa Gezere ni mapuro oochihellamo eziweto,

²² Kibizaimu ni mapuro oochihellamo eziweto ni Betehoroni ni mapuro oochihellamo eziweto, mizinda misese.

²³ Ovenyera o nlloko na Dani yaavahiwa mizinda dda Eliteke ni mapuro oochihellamo eziweto, Gibetoni ni mapuro oochihellamo eziweto,

²⁴ Ayaloni ni mapuro oochihellamo eziweto ni Gatirimoni ni mapuro oochihellamo eziweto mizinda misese.

²⁵ Ovenyera o hafu a nlloko na Manase woovollowa nndduwa yaavahiwa mizinda dda Taanaki ni mapuro oochihellamo eziweto ni Gatirimoni ni mapuro oochihellamo eziweto.

²⁶ Mizinda ddittheddene dda mabanja oohalla a Kohati ddaari khumi ni mapuro oochihella eziweto.

²⁷ Agereshoni, mulloko mmodda wa nlloko na Levi, yaavahiwa ovenyera o hafu a nlloko na Manase, Golani o Bashani ni mapuro oochihellamo eziweto, muzinda woovulluwellamo muthu oomwiipha mukhwaaye moohikhalla mwaphudda ni Beshetara ni mapuro oochihellamo eziweto, mizinda miilli.

²⁸ Ovenyera o nlloko na Isakara, yaavahiwa muzinda wa Kishiyoni ni mapuro oochihellamo eziweto, Daberati ni mapuro oochihellamo eziweto,

²⁹ Yaramuti ni mapuro oochihellamo eziweto ni Enganimu ni mapuro oochihellamo eziweto, mizinda misese.

³⁰ Ovenyera o nlloko na Ashere yaavahiwa mizinda dda Mishala ni mapuro oochihellamo eziweto, Abidoni ni mapuro oochihellamo eziweto,

³¹ Helekati ni mapuro oochihellamo eziweto ni Rehobu ni mapuro oochihellamo eziweto, mizinda misese.

³² Ovenyera o nlloko na Nafutali yaavahiwa muzinda wa Kedeshi mu Galileya ni mapuro oochihellamo eziweto, muzinda woovulluwellamo arive muthu oomwiipha mukhwaaye moohikhalla mwaphudda ni Hamotidori ni mapuro oochihellamo eziweto ni Karitani ni mapuro oochihellamo eziweto mizinda miraru.

³³ Mizinda ddittheddene dda Agereshoni moollikana ni mabanjiiwa ddaari khumi ni miraru ni mapuro oochihella eziweto.

³⁴ Mabanja mamodda a Merari oohalla a nlloko na Levi, yaavahiwa mizinda ddimodda ovenyera o nlloko na Zebuloni, Yokoneyamu ni mapuro oochihellamo eziweto, Karita ni mapuro oochihellamo eziweto,

³⁵ Dimina ni mapuro oochihellamo eziweto ni Nahalala, Mizinda misese.

³⁶ Ovenyera o nlloko na Rubeni yaavahiwa mizinda dda Bezeri ni mapuro oochihellamo eziweto, Yahazi ni mapuro oochihellamo eziweto,

³⁷ Kedemoti ni mapuro oochihellamo eziweto ni Mefaati ni mapuro oochihellamo eziweto mizinda misese.

³⁸ Ovenyera o nlloko na Gadi yaavahiwa mizinda dda Ramoti o Giliyadi ni mapuro oochihellamo eziweto, muzinda woovulluwellamo muthu oomwiipha mukhwaaye moohikhalla mwaphudda, owaakattho Mahanaimu,

³⁹ Heshiboni ni Yazere, mizinda misese ni mapuro oochihella eziweto.

⁴⁰ Ddittheddenenndda ddaari mizinda dda a Amerari moollikana ni mabanjiiwa, oohalla mwa mabanja a Alevi sika yoohallaniiwa yaari mizinda khumi ni miilli.

⁴¹ Mizinda 48 dda mu ellapo eyo Aisraele yaakhenlliiwa ddaavahiwa wa Alevi ni mapuro oochihellamo eziweto.

⁴² Orive muzinda waakhalla ni mapuro oochihellamo eziweto, sika wi mizinda ddittheddene.

Aisraele enaakha ellapo

⁴³ Sika Apwiya yahaavaha Aisraele ellapo eyo alliwa yalonjezilliiwa moollupella wi eneerewaavaha makhollwiiwa nave yahaakhella yoohallaniiwa ekeraattheya mwemmo.

⁴⁴ Apwiya yahaavaha murendelle variyari va athu amodda attheene oowaapheella moollikana ni nnddo yallupellelliiwa wa makhollwiiwa. Khaavo naari muthu mmodda mwa adaniiwaayo oyo awonre waagonjiha, Apwiya yahaavelleella adaniiwa m'mattani mwiwa.

⁴⁵ Kheyiivo yaaramille va ddeko ddaphaama ddittheddene nnddo Apwiya yalonjezilliiwa wa Aisraele, ddaheereya ddittheddene.