Yoswa 13 - Mawu a Mulluku

Ellapo ddoohalla wi ddaakhiwe

¹ Vano Yoswa ahuulluvalla, akhalla ni miyakha ddinchichi. Vano Apwiya yaamulleella wi, “Vanothi weyaano wohuulluvalla, wookhalla ni miyakha ddinchichi nave ellapo eyo ehinaakhiwe tti yuullupalli wi ekhalle yoohallaniiwa.

² Ellapo nnddo ddihanlle tti malire a Afilisti ni a Ageshuri,

³ (ellapo yeella yaambeelle omuhinjeni wa Shihori wookhuma nndduwa wa Iguputo ophiyera omalireni wa Ekeroni ompoto. Ellapo ettheeneeyo yaari m'mattani mwa Akanani. Oolamulella ellapo ya Afilisti akhalla o Gaza, o Ashidodi, o Ashikeloni, o Gati ni o Ekeroni) ni ellapo ya Avimu,

⁴ omwera ellapo ettheene ya Akanani ni ya Meara a o Asidoni ophiya o Afeki, ophiyattho o malire a Aamori.

⁵ Navettho ellapo ettheene ya Agebala ni ya Lebanoni wookhuma nndduwa ovenyera o Baala Gadi vatthi va mwa mwaango wa Heremoni ophiya o Hamati.

⁶ Vookhallattho ellapo ya Asidoni ayo yakhalla mu echigawo yamiyaango ya Lebanoni ni ya Misirefoti Maimu. Athu attheenaayo mi Mulluku kineerowiikariha vamiitthoni va Aisraele. Waakawelle Aisraele ellapo yeella wi ekhalle yoohallaniiwa moollikana ni mmo kuulamulalleemi.

⁷ Vano okawe ellapo ddenndda variyari va malloko matthanu ni masese ni hafu a nlloko na Manase wi ekhalle yoohallaniiwa.”

Ellapo eyo yakawiwe wookhuma nndduwa wa Yordani

⁸ Athu a nlloko na Rubeni ni na Gadi owaakattho hafu a nlloko na Manase yahaakhella ellapo wi ekhalle yoohallaniiwa vakhopella va Yordani, wookhuma nndduwa moollikana ni Mose oorumeyella a Apwiya aavahelleeye.

⁹ Ellapweeyo yaambeelle o Aroere, muzinda oyo waari museresere mwa ntapo na Arinoni navettho o muzinda wookhalla variyari va ntapo owaakattho ntapo na Medeba ophiya o Diboni,

¹⁰ ni mizinda ddittheddene nnddo ddalamuliwa ni Sihoni mwene Aamori oyo alamulella mu Heshiboni ophiya o malire a Amoni

¹¹ owaakattho etawoni ya Giliyadi ni ellapo ettheene ya Ageshuri ni ya Amaakati, owaakattho mwaango muttheene wa Heremoni ni ya Bashani ophiya o Saleka,

¹² omwene muttheene wa Ogi a o Bashani oyo walamulella o Ashitaroti ni o Ederei. (Ogi aari yooyove mwene a Arefaimu oyo ahanllewo). Mose ahaagonjiha athu yaalla awiikariha.

¹³ Koma Aisraele kheyaawiikarihalle Ageshuri ni Amaakati, alliwa enakhalla variyari va Aisraele ophiyera ollello.

¹⁴ Koma Mose khaawaavahille yoohallaniiwa athu a nlloko na Levi. Yoohallaniiwa ya Apwiya Mulluku yaari echigawo ya ddoovelleella dda mukutho wawoosa viikho moollikana ni mmo Apwiya yamulleellelliiwa.

Ellapo ya nlloko na Rubeni

¹⁵ Mose ahaavaha yoohallaniiwa athu a nlloko na Rubeni moollikana ni mabanjiiwa.

¹⁶ Ellapwiiwa yaambeelle o muzinda wa Aroere oyo waari museresere mwa ntapo na Arinoni ni muzinda wa variyari va ntaponno komattho echigawo ettheene ya Medeba,

¹⁷ opwesereravo Heshiboni ni mizinda ddittheddene dda mu echigawo monga Diboni, Bamoti Baala, Bete Baala Meyani,

¹⁸ Yahazi, Kedemoti, Mefaati,

¹⁹ Kiriyataimu, Sibima, Zeretishahara mu mwaango wa mutapo,

²⁰ Betepeori, mookitthella mwaango wa Pisiga Beteyeshimoti.

²¹ Ddenndda sika mizinda dda echigawo ni mizinda ddittheddene dda Sihoni mwene Aamori ayo yalamulella o Heshiboni. Mose aari amugonjihalle Sihoni ni attheene oolamulella a o Midiyani monga Evi, Rekemu, Zeri, Huri ni Reba. Attheenaalla yalamulella ellapweeyo vatthi va mwene Sihoni.

²² Aisraele yaamwiiphattho ni nsupada Balamu mwaana a Beori, oollohella vamodda ni athu amodda.

²³ Muhinje wa Yordani sika waari malire a nlloko na Rubeni. Mizinda ddenndda ni matawoniiwa sika ddavahiwe wa mabanja a nlloko na Rubeni wi ddikhalle yoohallaniiwa.

Ellapo ya nlloko na Gadi

²⁴ Mose ahaavaha yoohallaniiwa athu a nlloko na Gadi moollikana ni mabanjiiwa.

²⁵ Malire a Yazere yaari mizinda dda Giliyadi, hafu a nlloko na Aamoni ophiya o Aroere, wookhuma nndduwa wa Raba.

²⁶ Ellapwiiwa yaambeelle o Heshiboni ophiya o Ramati Mizipe ni Betonimu waambeellattho o Mahanaimu ophiyera omalireni a Lodebara,

²⁷ ntapo na Beteharamu, Betenimura, Sukoti ni Zafoni, hafu a ellapo ya Sihoni mwene a o Heshiboni, Yordani ni maliraaye ophiya wookomella enyanja ya Kinereti okhopella wa muhinje wa Yordani wookhuma nndduwa.

²⁸ Mizinda ddenndda ni matawoniiwa sika ddavahiwe wa mabanja a nlloko na Gadi wi ddikhalle yoohallaniiwa.

Ellapo ya nlloko na Manase wookhuma nndduwa

²⁹ Mose aari aavahille hafu a nlloko na Manase yoohallaniiwa moollikana ni mabanjiiwa.

³⁰ Ellapweeyo yaambeelle o Mahanaimu, o Bashani otthewene, omwene muttheene wa Ogi mwene a o Bashani ni matawoni 60 a o Yairi, o Bashaninko

³¹ hafu a Giliyadi ni Ashitaroti ni Ederei, mizinda dduullupalli dda mwene Ogi a o Bashani. Mizinda ddenndda ddaavahiwa wa mabanja a Makiri mwaana a Manase wi ekhalle yoohallaniiwa ya hafu a Amakiri moollikana ni mabanjiiwa.

³² Mmu tti mmo Mose akawelleeye ellapo ya mu ntapo na Mowabu, wookhuma nndduwa wa muzinda wa Yeriko, okhopella wa muhinje wa Yordani.

³³ Koma Mose khaawaavahille yoohallaniiwa athu a nlloko na Levi vawi Apwiya Mulluku a Israele sika yoohallaniiwa moollikana ni mmo aalleellelleeye.