Yobu 14 - Mawu a Mulluku

¹ Muthu ooyariwa ni mutthiyana tti a mallapo ooyeva, anayarelliwa ohoowa.

² Anaphuwa wonanko malluwa, annanyaalla, khanallekella, anathawa wonanko muuthuuchi.

³ Ethiyo nyu Mulluku ttuumuweha yooyo? Ethiyo ttuumwiipa mullatu?

⁴ Ethiyo ttaani anaakhumihe yaphaama mu yoonanara? Khaavo naari mmodda.

⁵ Mallapo a muthu tti aweerengeya, echiwerengero ya miyeri ddaye eri ni nyuwaano. Mwaamulembella maliraaye, khawora waallupha.

⁶ Muhiyeni oopiwe ephevo wi wonanko aganyu, oone oddiva nllapo nimodda.

⁷ Muteekho onnakhalla ni etiyerello, wakakathiwa onnaphuwa, ddoophuwa ddiwa ddinnavirellella.

⁸ Naari musisiiwa wuulluvalleve, nikoto niwa nunte,

⁹ komave munyezi waphiya, oneerophuwa, oneeromella enthambi wonanko mukitthi.

¹⁰ Koma muthu akhwa, anamallella vaavo. Ethiyo akhwa anaya wuuwi?

¹¹ Wonanko maaddi enamallella munyanja, wonankottho maaddi enawelleella ni wumma,

¹² emoddamoddave yeeyottho muthu annakona oohivenyattho. Ophiyera ddooddullu ddimanlle, khawa avenyattho, apaalle oovenyihiwa o ekhove ddaye.

¹³ Waphaama mwakiipitthiheke mu ellapo ya ookhwa mwakivinttheke vakhwipi ophiyera owallaanyu oviralle. Waphaama mwakihiyenreke enthawi wi vatulli viwa mukuupuwellettho.

¹⁴ Ethiyo muthu akhwa ttuukhallattho ni okumi? Kineerotiyerella mallapo mattheene a ohoosiwa waka, ophiyera ottaphulliwa waka ophiyalle.

¹⁵ Mwakiithana kineerowaakhullani, muneeropaallesesa okoonattho, mutteko wa mattaanyu.

¹⁶ Vawi meetellwaaka mattheene muneerewaapwatha, koma khamweerengella machimwaaka.

¹⁷ Ddoolakwa ddaka ddineerokhululukiwa, machimwaaka mattheene muneerewaakhuneella.

¹⁸ Komave wonanko okumuwa ni onyenyeya wa mwaango, apaalle osusiwa wa nlluku vanipuroni viwa,

¹⁹ wonankottho maaddi oollalliha malluku, apaalle maaddi oosefukella ennakwekweresa ethaya, emoddamoddavettho munnoononga etiyerello ya muthu.

²⁰ Munnamugonjiha, olliye annamalla, munnasintha mooneyellwaaye, munnamutathillella woorekama.

²¹ Anaaye yaariihiwaka, khanadduwellawo, yaavevulliwaka, khanoonawo.

²² M'mwiillini mwaye munnavoreya, anaddinllella yeekha.