Yesaya 31 - Mawu a Mulluku

Apwiya eneeromuteteza Yerusalemu

¹ Otulli wa athu ayo enaya o Iguputo wooveka nikavihero. Alliwa enaaroromella akavalwiiwa, waata wa magaretiiwa akhoto ni masiva a akhotwiiwa oowella va akavalo. Koma khenamuroromella Aweella a Israele apaalle oveka nikavihero na Apwiya.

² Komave Apwiya tti eezeru ni oowora woononga. Alliwa khenahokollosa mawiiwa, annallipana ni oonanara navettho athu enaakavihera oonanaraayo.

³ Aiguputo khe milluku koma alliwa tti athu oonanara. Akavalwiiwa khe minepa koma tti enama shisha. Apwiya yattaphurusa nnatta niwa, ookavihera eneerokwakwatuwa nave ookaviheriwa eneeromora nave attheenaayo enaamallelle nimodda.

⁴ Apwiya yaakilleella wi, “Wonanko mukango apaalle musote wa mukango onathurumelliiwa waphara enama, mwawi abusa khewora owiikariha naari ewoopopihe apaalle ekhuwe mwawiidde, emoddamoddave yeeyo khayiivo enaavaanyihe Apwiya Amasiva Mattheene oteteza mwaango wa Ziyoni ni mwanamwaangwiiwa.

⁵ Wonanko epallame ddoovava vaddullu va emphuru ddiwa, Apwiya Amasiva Mattheene eneerewaakiha muzinda wa Yerusalemu. Eneerowuteteza ni owuvullusa nave eneerowuhiya vakhwipi ni owoopolla.”

⁶ Nyu Aisraele, hokollweellani wa Apwiya ayo mwaawukilalleenyu wunchichi.

⁷ Vallethi nllapo nenno muneerotathilla mafanwaanyu asiliva ni agolide ayo mwaapangilleenyu ni mattaanyu oochimwa.

⁸ Aasiriya eneerewoonongiwa vakhotoni ohiri ni masiva a muthu nave eneerewoonongiwa ni nsupada ohiri ni nsupada na muthu. Eneerothawa okhotoni nave asombwiiwa enaakhalle akaporo.

⁹ Mweniiwa aneerothawa ekaamba ya woopopihiwa nave oohoollelliiwa akhoto eneeropallalleya mwawoova wunchichi vawi eneerohiya embendela ddiwa ddakhoto. Enallota ddenndda tti Apwiya ayo munllwiiwa ori mu Ziyoni nave eng'anjwiiwa eri mu Yerusalemu.