Yeremiya 9 - Mawu a Mulluku

¹ Ddaawerokiddivella murwaaka waariki ehime ya maaddi, miitthwaaka yaariki neetuutu a miitthori, wi kiwinllelleke otthaana ni mahiiyu attheene ayo yakhwille a mutundu wa athwaaka.

² Ddaawerokiddivella kaariki ni vookona muchipululuni wi kaahiye ni waathawa athwaaka. Vawi attheene tti ooraruwa, mulloko wa athu awoottha.

³ Ennakhoromaniha nllumi niwa wonanko muura, ellapo yooddalla ni ddawoottha ohiri ddawoona. Apwiya yaallota wi, “Ennavirellella woonjerera ddoonanara, khenakidduwella mi Mullukwiiwa.”

⁴ Arive muthu achenjere ni mukhwaaye, ahimuroromelle naari mbalaaye. Ddawoona, arive muthu annamulleka mbalaaye, annamullota mukhwaaye.

⁵ Arive muthu anamoottottha mukhwaaye, khanallota ddawoona. Eyano ddiwa yaaddiddollweelliha woottha, ennaddivelliwa wunchichi ddoonanara sika wi kheworattho olapa.

⁶ Ennatthinddaanyera machimo vaddullu va machimo makhwiiwa, woottottha va woottottha okhwiiwa. Apwiya yaallota wi, “Athu ennakhoota okidduwella.

⁷ Ekaamba ya ddenndda Apwiya Amasiva Mattheene enallota wi, ‘Wonanko mukoko, kineeroweeka athwaaka. Alliwa tti oochimwa, kinaawore mwawiidde waahiyerera?

⁸ Nllumi niwa niri wonanko mpaamba wootthokowa, enthawi ddittheddene ennakhallella woottha. Arive muthu annallota mwamurendelle ni mukhwaaye, koma m'murimani mwaye muddanlle echiwembu.

⁹ Ethiyo sika ttuulephela waallaka ekaamba ya ddenndda, ttuuhiwuhokollosella ddoonanara mutundu wawi ddiiddoolla? Mi Apwiya koollota.’ ”

¹⁰ Mi kaallota wi, “Kineeromoriwa ethakaraka ni winlla mookhuwa ekaamba ya miyaango, ekaamba ya mapuro oochihellawo enama a muhakani vawi mapuro mattheenaayo ahoonongeya. Khaavo anayaawo, khoniiweyattho naari winlla wa eng'ombe. Epallame ddittheddene ddoovava enama ddamuhakani ddoothawa, oohooneyattho.”

¹¹ Apwiya yaallota wi, “Yerusalemu kineeromutthattusa ntepe, kineeromutthattusa mookhalla akhatwe. Mizinda dda o Yuda ddineerohiyiwa, khamukhalla athu.”

¹² Mi kaakoha wi, “Ethiyo eezeru ttaani oyo aniiwesese ddenndda? Nave Apwiya yamutthopoollelle aani wi aatthopoollelle amodda? Kaambiiwa tinittho ellapo yoonongeyelliiwa ni otthattuwa echipululu mmo muhinavira athu?”

¹³ Apwiya yahaakhulla wi, “Ekaambiiwa tti yawi athwaaka yaatathilla malamulwaaka ayo kaavahilleemi nave kheyiiwellenlle ni othwara mawaaka.

¹⁴ Koma yahumma murima ni othwara murimiiwa woonanara. Yaallapella mafano a Baala moollikana ni mmo makhollwiiwa yaahuddihelliiwa.

¹⁵ Ngiiwani vano nnddo mi Apwiya Amasiva Mattheene, Mulluku a Israele, kineereemi. Athu yaalla kineerewaachiha ddoomella ddoowaawa ni waawiryiha maaddi anttipwi.

¹⁶ Kineerewaapallallesa variyari va mitundu dda athu nnddo alliwa apaalle makhollwiiwa yahiddidduwenlliiwa. Kineerewaathwara ni ekhoto ophiyera kaatthollosille.”

Athu a o Yerusalemu enaveka nikavihero

¹⁷ Apwiya Amasiva Mattheene enallota wi, “Muganize phaama dda nnddo ddineereya. Muwiithane atthiyana awinlla maliro wi ewe, atthiyaneene eeruso yawinlla ewe.”

¹⁸ Athu enallota wi, “Ewe mwawaakuva eninllelle wi m'miitthoni mwahu mumore miitthori, ekwikwi ddahu ddinaane.”

¹⁹ Ngiiwani winlla woovenyera o Ziyoni enallota wi, “Otulli, nohoonongeya! Noowulliwa muru wunchichi, Ninaphwanella nihiye ellapwaahu, kaambiiwa enyumba ddahu aaddikumulla.”

²⁰ Mi kaallota wi, “Nyu atthiyana, iwellellani mawu a Apwiya, apellani maaru wi mwiiwe nnddo enallotiiwa. Ahuddiheni aniinyu aatthiyana winlla, ni akhwiinyu nchipo na maliro.

²¹ Okhwa woowella m'mawindoni mwahu, woovollowa mu enyumba ddahu dda omwene. Waawiipha aniihu m'misewuni, waahaamalliha asombwaahu m'mathatoni.

²² Apwiya yaakilleella wi killote wi, ‘Mitembo dda athu ddineeromora wonanko manyowa m'matani, wonanko mitolo ddoohiyiwa ni athu oohata koma khaavo anaadditote.’ ”

²³ Apwiya enallota wi, “Muthu eezeru ahiitukhulle ni ezeru ddaye, naari muthu amasiva ni masivaaye, naarittho muthu eeyuuma ni eyuumaaye.

²⁴ Koma oyo aapaalla wiitukhulla, iitukhulleke wi annakidduwella ni okiiwesesa mi, annadduwella wi mi tti Apwiya eechikondi yoohisintheya, eechilungamo ni echiweruzo va ellapo yavatthi. Va ddenndda sika viri murimaaka.”

²⁵ Apwiya enallota wi, “Mallapo enimawa mvo kinaallakeemi attheene oophaddiwa ayo m'murimani mwiwa ehinapwathawo.

²⁶ Kineerewaallaka Aiguputo, Ayuda, Aedomu, Aamoni, Amowabu ni attheene ayo enakhalla mu echipululu oophaddera mphattamaaru. Mitundu ddimodda ddittheddenenndda tti ddoohiphaddiwa naari mutundu muttheene wa Aisraele tti woohiphaddiwattho m'murimani.”