Yeremiya 5 - Mawu a Mulluku

Machimo a Yerusalemu

¹ Thamakani nngu ni nngu m'misewuni dda Yerusalemu, muddoonelle nyookha. Ashaashani o mathatwaaye wi mumphwanyewo aweera ddoolungama, owaashaasha yawoona wi kimukhululukelle Yerusalemu.

² Naari athu ellupellaka vamiitthoni va Apwiya Ookumi, komathi enallupella mwawoottha.

³ Ddawoona, Apwiya enawaashaasha oororomelleya yahuullakani koma khemwaawiiwalle ovoreya, yahuunyenyani koma khemwaarukunuwalle murima. Mwahummiha mirima ddanyu wonanko nlluku, mwaakhoota olapa.

⁴ Sika kaallota wi, “Alla tti ohoowa, khenna naari ezeru, khenadduwella ettilla ya Apwiya, kheniiwesesa nnddo Mullukwiiwa anapaalleeye.

⁵ Vano kineerooya wa oolamulella, kineerollota ni alliwa. Vawi alliwa sika enaadduwelle ettilla ya Apwiya, eniiwesesa ddoopaalla Mullukwiiwa. Koma kahoona wi yahinttaka nigoli* niwa, yaaphadda onyolwiiwa.

⁶ Sika ekaambiiwa mukango wamuutthakoni onaawiiphiiwa, mumbulu woohakani onaawoonongiiwa. Nanthavi anaakhalleke vakhuviru ni mizinda ddiwa, aneeromukhaddulla arive muthu ookhuma vawi ddoochimwa ddiwa tti ddinchichi, omuhiya wiwa Mulluku wohaata.”

⁷ Apwiya enallota wi, “Kinuukhululukelleni mwawiidde? Aniinyu yookihiya miyaano, enallepella wa milluku ddawoottha. Miyaano kahaavaha ddoopaalla ddiwa ddittheddene komave yaaddivelliwa oraruwa, yatthukumana mu enyumba dda mahule.

⁸ Arive muthu anamuthamakella mwaara a mukhwaaye wonanko akavalo oovona ni oovihesesa mwiilli.

⁹ Ethiyo ttuulephela waallaka ekaamba ya ddenndda, ttuuhiwuhokollosella ddoonanara mutundu wawi ddiiddoolla?

¹⁰ Kineerewaarumiha adani wi yoononge emata dda mipesa ddiwa koma ehaakokholle. Yaphadde enthambi ddiwa vawi enthambinnddo kheddihiyo dda Apwiya.

¹¹ Athu a o Israele ni a o Yuda attheene tti oohiroromelleya vamiitthoni vaka, mi Apwiya koollota.”

Apwiya enamukhoota Yuda

¹² Athu yohaakhoota Apwiya voollotani wi, “Apwiya kheneerella erive ello. Kheyiivo yoonanara enaanooneyelle, khaniwa noona ekhoto apaalle ettalla.”

¹³ Yaallota wi mawu a anamallotella enaavireke wonanko ephevo, othengiiwa khonavenyera wa Apwiya nave ddittheddene yallotiiwa ddaamorelle.

¹⁴ Sika ekaambiiwa Apwiya Mulluku Amasiva Mattheene enallotiiwa wi, “Vawi ellotille ddiidda, kineerewaatthattusa mawaaka munllo muwano mwawo. Kineerewaatthattusa ekhuni nave munllo oneerewaashellelliha.”

¹⁵ Nyu Aisraele, Apwiya eneerowaana akhoto oovenyera o ellapo yawoorekama. Olla tti mutundu wamasiva ni wakhallekhalle oyo ellotellwiiwa tti yeelleto nave khemunayidduwella.

¹⁶ Akhotwaayo mipaamba ddiwa ddinnawiipha athu anchichi nave attheene tti oollipa murima vakhotoni.

¹⁷ Aneerewuumallihellani ddoohata ddanyu ni ddoocha ddanyu. Eneerowiipha aniinyu aallopwana ni aatthiyana, eneerowiiphellanittho enkhosa ddanyu ni eng'ombe ddanyu. Eneerewoononga mipesa ddanyu ni namukuywaanyu. Eneerokumulla mwakhoto mizinda ddanyu mwaddiroromellaanyu.

¹⁸ Apwiya enallota wi, “Koma naari mallapo yaayo nguukokhollani.

¹⁹ Nave athwaawo yaakohaka wi, ‘Kaambiiwa tini Apwiya Mullukwaahu eneerenlliiwa ddenndda?’ We Yeremiya owaakhulleke wi, ‘Moollikana ni mmo mwaahiyereenyu Apwiya ni ollapella milluku ddeelleto mwiillaponi mwanyu, emoddamoddave yeeyo muneerewaallapella athu a mu ellapo yeelleto.’ ”

Apwiya enaachenjeza athwiiwa

²⁰ Apwiya enallota wi, “Mullalleye wa edduullu dda Yakobo, mwaalleelle athu a o Yuda wi

²¹ nyu anamwani ookarangeya, oohikhalla ni ezeru, apellani maaru. Miittho mookhallana koma khamunoona nave maaru mookhallana koma khamuniiwa.”

²² Mi Apwiya kinakoha wi, “Kaambiiwa tini muhinakooveenyu? Kaambiiwa tini muhinatthukumellaanyu vamiitthoni vaka? Mi sika kahiyalle mihava wi okhalle malire a enyanja, malire ayo enyanjeeyo khenawora waakhwaranya. Mafunde naari enyaruwe mwawiidde, khenawora okhwaranyavo. Naari enyakulle mwawiidde, khenawora okhwaranyavo.

²³ Koma nyuwaano tti awumma murima ni oowukila. Moohollowa ni okihiya miyaano.

²⁴ Khamunaganizereke ddookoova miyaano Mullukwaanyu oyo anuuvahani murimu a ntthokollapallaka ni murimu awaallella va enthawi yaphaama ni enthawi yoohata orive muyakha.

²⁵ Koma ddoonanara ddanyu ddoolepheliha ddittheddenenndda nave machimwaanyu aawiimanihani ddaphaama.

²⁶ “Vawi variyari va athwaaka vookhalla oonanara. Enniipittha wonanko oophara epallame nave ennareya misampha wi yaaphare athu.

²⁷ Enyumba ddiwa ddooddalla ni eyuuma yoophwanya mwawoottha wonanko echisangala yooddalla ni epallame. Tti ekaambeene yootthattuwa oovuwa ni eeyuuma.

²⁸ Yooneneva nave miilli ddiwa tti ddoosalala. Ennavirellella weera mitteko ddiwa ddoonanara, kheneeruza mweechilungamo millatu dda akhwaadduni ni oohoowa wi ddeete phaama.

²⁹ “Koma mi Apwiya kinallota wi, ‘Ethiyo sika ttuulephela waallaka ekaamba ya ddenndda, oohiwuhokollosella ddoonanara mutundu wawi ddiiddoolla?’

³⁰ Mwiillaponimmu moheereya ello yawoopiha ni yooriiryiha mwiilli.

³¹ Anamallotella ennallota ddawoottha nave allupa mukutho ennakhullellana. Komave athwaaka ennakonda ddenndda. Ethiyo muneere tini voomallihella?”