Yeremiya 41 - Mawu a Mulluku

¹ Va mweeri waneetthanu ni piilli, Ishmaele mwaana a Netaniya, edduullu ya Elishama, a nibanja noomwene, mmodda mwa oohoollella enduna dda mwene, aaphiya ni athu khumi o Mizipa wa Gedaliya, mwaana a Ahikamu. Echaka nimodda wenko,

² Ishmaele mwaana a Netaniya ni athu khumi yaavenya emwiipha ni masupadiiwa Gedaliya, mwaana a Ahikamu, mwaana a Shafani, oyo mwene a o Babiloni amuhiyalleeye wi akhalle oolamulella ellapo.

³ Sika Ishmaele aawiiphattho Ayuda attheene yaari o Mizipa navettho akhoto a Ababiloni ayo yaari wenko.

⁴ Ohinase, athu ehinadduwelle wi Gedaliya ohiiphiwa,

⁵ waaphiya athu khumi ni atthanu oovenyera o Shekemu, o Shilo ni o Samariya. Ereru ddiwa yaachema, ddoowara ddiwa ddaari ddawaahuwa nave miilli ddiwa ddaari ddooremeyaremeya. Yakusalle mikutho dda ddoocha ni lubani* wi yavelleelle o enyumba ya Apwiya.

⁶ Sika Ishmaele mwaana a Netaniya, aawa inllaka ovenyera o Mizipa wi akumane ni alliwa. Ekumanilleni aallota wi, “Waawoni wi moonane ni Gedaliya mwaana a Ahikamu.”

⁷ Ephiyalle variyari va muzinda, Ishmaele mwaana a Netaniya ni athwaaye yaawiipha attheene yaatathillella mwiihimeni.

⁸ Koma va mullokooyo vaakhalla athu khumi ayo yamulleelle Ishmaele wi, “Hi muhiniiphe, nookhalla ni tirigu, barele, makhura ni enwi nnddo naddivinttheehu m'matani.” Sika yahaahiya, kheyaawiiphenlle nimodda ni abaliiwaalle.

⁹ Ehime eyo Ishmaele aatathillelleeyemo athu awiiphalleeyaalle yaari ehime yuullupalli akante mwene Asa oopopihiwe ni Baasha mwene a o Israele. Ishmaele mwaana a Netaniya aayiddalliha ni mitembo.

¹⁰ Vatulli viwa Ishmaele ahaaphara okaporo athu attheene yahanlle o Mizipa. Athwaayo yaari anamwani aatthiyana a mwene ni attheene oohalla o Mizipa ayo Nebuzaradani oohoollella a akhoto aahiyalleeye m'mattani mwa Gedaliya mwaana a Ahikamu wi akhalle oolamulella. Nave Ishmaele ahaaphara aayaana o ellapo ya Aamoni.

¹¹ Yohanani mwaana a Kareya, oohoollella a akhoto, iiwalle ddoonanara nnddo Ishmaele mwaana a Netaniya eerilleeye,

¹² ahaatthukumaniha athwaaye attheene aariiyena nave aaya woowana ekhoto ni olliye. Amuphwanyille o nthiya nuullupalli o Gibiyoni.

¹³ Nave athu attheene ayo Ishmaele aapharilleeye yamoonilliiwa Yohanani mwaana a Kareya ni oohoollella a milloko ddakhotonndde yaahakallalla.

¹⁴ Athu attheene Ishmaele aapharilleeye okaporo ovenyera o Mizipa, yaahokollweella wa Yohanani mwaana a Kareya.

¹⁵ Koma Ishmaele mwaana a Netaniya ni athwaaye atthanu ni araru yaamuthawa Yohanani, othawella wa Aamoni.

¹⁶ Vano Yohanani mwaana a Kareya ni oohoollella a milloko ddakhoto yahaakusa oohalla o Mizipa ayo Ishmaele mwaana a Netaniya, aapharilleeye okaporo amwiiphalle Gedaliya mwaana a Ahikamu. Yaaphanreewaayo yaari akhoto, atthiyana, anamwani ni oohulliwa* a mwene ayo Yohanani awiilleeyena ovenyera o Gibiyoni.

¹⁷ Yaatimulla olendwiiwa yiimella o Geruti, Kimuhamu, vakhuviru ni Betelehemu. Yaanapaalla oya o Iguputo

¹⁸ ekaamba yoowoova Ababiloni. Yaanoova ekaamba yawi Ishmaele mwaana a Netaniya, aamwiipha Gedaliya mwaana a Ahikamu oyo mwene a o Babiloni amuhiyalleeye wi akhalle oolamulella.