Yeremiya 4 - Mawu a Mulluku

Aisraele eniithaniwa wi elape

¹ Apwiya enallota wi, “Mwapaalla ohokollowa, nyu Aisraele, hokollweellani wa miyaano nave muvenyihevo mafanwaanyu vamiitthoni vaka nave muhiwe muhollowattho.

² Mullupelleke wi, ‘Mu nnddina na Apwiya Ookumi.’ Mweereke ddenndda mwawoona, mweechilungamo ni moororomelleya. Vano athu a mitundu ddittheddene eneerokiveka wi kaadalise nave eneerokitthamalla.”

³ Apwiya enaalleella athu a o Yuda ni o Yerusalemu wi, “Llimani emata ddanyu, muhaalle mmiddwaanyu m'miiwani.

⁴ Musunge lonjezano nanyu ni miyaano Apwiinyu nave mwiivelleelle ni murimaanyu muttheene wa miyaano. Nyu athu a o Yuda ni a o Yerusalemu muheereke ddenndda wi owallaaka ohiwe wonanko munllo nave ohuukharelleni moohithiimiheya ekaamba ya ddoonanara muneereenyu.”

Adani a Yuda oovenyera ompoto

⁵ Llalleya o Yuda ni o Yerusalemu wi, “Opani nipallapata mu ellapo ettheene nave mukhuwelle wi, ‘Tthukumanani niye o muzinda ddoollipa.’

⁶ Tukhullani embendera o Ziyoni, Muhinaselliwa, thawani wi muvulluwe. Mi Apwiya kinimawa ni yoonanara yoovenyera ompoto, oneerokhalla woonongeya wawoopiha.

⁷ Wonanko mukango onuupulluwa ovenyera va wiipittha, emoddamoddave yeeyo awoononga ellapo ootimulla. Animawa wi oononge ellapwaanyu, mizinda ddaye eneerodditthattusa matepe oohikhallavo muthu ookhallamo.

⁸ Sika warani eziguduli, mukhupanye ni winlla wunchichi, kaambiiwa owalli wawoopiha wa Apwiya khonavenyevo va Yuda.”

⁹ Apwiya enallota wi, “Va nllapo nenno mwene ni enduna ddaye, attheene eneerotathilla murima. Allupa mukutho erurumuwa nave anamallotella eneerottikhina.”

¹⁰ Vano kaallota wi, “Ha, nyu Apwiya Mulluku, ddawoona, mohaalleka wunchichi athu yaalla ni Yerusalemu! Mwahaalonjeza wi eneerokhalla ni murendelle koma nsupada niri vanikohini viwa.”

¹¹ Enthaweeyo yaphiya athwaalla ni Yerusalemu eneerolleelliwa wi ephevo yooviha ennoopa wa alliwa ovenyera o echipululu. Ellathi khehiyo ephevo yooveethella apaalle yaweellihella ddeko.

¹² Ella tti ephevo yamasiva manchichi yoovenyera wa mi Apwiya. Vano alla tti Apwiya enaweeruza athwiiwa.

Yuda anaapheelliwa ni adani

¹³ Ngoonani, adani enimawa wonanko mirapo nave magaretiiwa ennathamaka wonanko namangalle. Akavalwiiwa ennathamaka wunchichi okhwaranya mipungu. Otulli, nohoonongeya!

¹⁴ We Yerusalemu, venyihamo ddoonanara m'murimani mwawommo wi ovulluwe. Ethiyo onaakhalleve ni maganizo oonanara ophiyera niini?

¹⁵ Vawi amithenga a o Dani ni o miyaango dda Efuremu enimallalleya othenga wawoopiha.

¹⁶ Enallota wi, “Muchenjeze mitundu dda athu wi mudani animawa. Mullalleye wa Yerusalemu wi akhoto enimawa ovenyera o ellapo yawoorekama, eninakhuwa wi ehelle ekhoto mizinda dda Yuda.

¹⁷ Ennamwaapheella Yerusalemu wonanko alonda a emata kaambiiwa athwaaka aakiwukila.” Mi Apwiya aallota.

¹⁸ Nyu Ayuda, nndda dduumorenlleni ekaamba ya makhallellwaanyu ni mitteko ddanyu. Nngu sika ollakiwa wanyu nave tti woovoreya mookusa murima.

Yeremiya anaamorella ethakaraka athwaaye

¹⁹ Kookhwa, kookhwa! Ha, murimaaka onimakivoreya, murimaaka oni pha, pha, pha! Ngiwora ovillella. Kinniiwa winlla wa nipallapata, okhuwa wa ekhoto.

²⁰ Otulli onimathwarana, ellapo ettheene yootthattuwa ntepe. Moorurumusa misasa ddahu ddohoonongeya, makataniiwa ahaahulliwa va enthawi yooyeva.

²¹ Kinaakhallelle woona embendela yeekhoto ni wiiwa nipallapata ophiyera niini?

²² Apwiya enallota wi, “Athwaaka tti ookarangeya, khenakidduwella miyaano. Tti wonanko anamwani oohollowa, oohiiwesesa erive ello. Tti eeruso vaweerani ddoonanara koma weera ddaphaama khenadduwella.”

Masomphenya a Yeremiya a owa wa woonongeya

²³ Kaaweha va ellapo yavatthi, yaari yoohikhalla ni erive ello. Kaaweha muddullu, khemwaari erive yoowala.

²⁴ Kaaweha miyaango nave ddaanatikheya, asimiyaango yaanatthukumella.

²⁵ Kaaweha nave ngaamonille naari muthu mmodda, epallame ddittheddene ddooddullu ddaathawe.

²⁶ Kaaweha nave ellapo ya ethaya yaphaama yaatthattuwa echipululu, mizinda ddiwa ddittheddene khemwaari erive ello ekaamba ya osha murima wa Apwiya.

²⁷ Apwiya aallota wi ellapo yavatthi ettheene eneerotthattuwa echipululu komave kheyikokholla.

²⁸ Sika ellapo yavatthi ettheene eneerewinlla nave oddullu oneerokhalla epiphi. Vawi mi Apwiya koollota, ngirukunusa maganizwaaka. Kookeraatthiha yoolingaaka, ngihokollweella mutulli.

²⁹ Arive muthu aneerothawa vawiiwani onyakulla wa akhoto oowella va akavalo ni oovokha mipaamba. Amodda eneerothawella muutthakoni, amodda ewella m'mallukuni. Mizinda ddittheddene ddineerohiyiwa, khamukhalla naari mmodda.

³⁰ We Yerusalemu, woopasuliwa, kaambiiwa tini onawareewe ddoofiira, onawareewe ddooreeriha ddagolide, onamareewe otooto miitthwaawo? Oniireerihella nivuddo, awuukondaawo enimuunyemulla, enapaalla ewiiphe.

³¹ Kahiiwa winlla wonanko wa mutthiyana vooyarani, wiipullella wonanko wa mutthiyana va oyepella waye wawaamba. Wenko waari winlla wa athu a mu Ziyoni, weeseesa okoka mpweya, etukhullelle muddullu mattiiwa ellotaka wi, “Otulli hiyaano, ninimangomowa, okumaahu woovelleelliwa wa ooniipha!”