Yawuupullulla 8 - Mawu a Mulluku

Dda yoomarella yaneetthanu ni piilli

¹ Mwaanaankhosa amarullalleeye yoomarella yaneetthanu ni piilli, oddullu waamaalleya wa enthawi yooyeva.

² Nave kaawoona angelo atthanu ni eelli ayo yiimenlle vamiitthoni va Mulluku nave yaavahiwa mapallapata matthanu ni meelli.

³ Mungelo mmodda ookhalla ni embale ya golide aawa iimella va nikuwa na mukutho. Aavahiwa lubani munchichi wi aanjerere vamodda ni mavekello a athu a Mulluku ni wi aheraatthi va nikuwa nagolide nno niimenlle vamiitthoni va mpando woomwene.

⁴ Mwiisi wa lubani ddoosiwanndde waaya muddullu wa Mulluku vamodda ni mavekello a athu a Mulluku ovenyera m'mattani mwa mungelo.

⁵ Nave mungeloolle aakusa embale ya golideelle avallellamo munllo woovenyera va nikuwa nave ayivokhella va ellapo yavatthi. Nave vaakhalla ogugudeya wa murimu, onyakulla, ettari ni echivomerezi.

Dda mapallapata

⁶ Nave angelo alle yaari ni mapallapata matthanu ni meelli yaakhozekella wi yoope.

⁷ Mungelo awaamba ahoopa nipallapata naye. Nave marallalla ni munllo ddoottakanyiheriwa ni nikhame ddaavokhelliwa va ellapo yavatthi. Emodda mwa ezigawo ddiraru dda va ellapo yavatthi yahoosiwa navettho emodda mwa ezigawo ddiraru dda miteekho ni munyepu muttheene ddahoosiwa.

⁸ Nave mungelo aneepiilli ahoopattho nipallapata naye. Ello emoddeene yawooneya wonanko mwaango muullupalli yookhara munllo yaavokhelliwa mu enyanja. Emodda mwa ezigawo ddiraru dda enyanjeeyo yaatthattuwa nikhame,

⁹ emodda mwa ezigawo ddiraru dda ddoophatusiwa ddookumi dda mu enyanja ddaakhwa nave emodda mwa ezigawo ddiraru dda ekallawa ddahoonongeya.

¹⁰ Nave mungelo aneeraru ahoopa nipallapata naye. Etheneeri yuullupalli yookhara wonanko mutthiko woovenyera oddullu yaamorella va emodda mwa ezigawo ddiraru dda mihinje ni aneetuutu amaaddi.

¹¹ (Nnddina na etheneereeyo tti, “Owaawa.”) Emodda mwa ezigawo ddiraru dda maaddi yaatthattuwa oowaawa nave athu anchichi yawirya maaddaayo yaakhwa ekaamba ya owaawanko.

¹² Mungelo aneesese ahoopa nipallapata naye. Emodda mwa ezigawo ddiraru dda nndduwa, mweeri ni etheneeri ddahoonongeya sika owala wiwa waatthattuwa epiphi. Owala khewaariwo waambeella emodda mwa ezigawo ddiraru dda otthaana ni dda mahiiyu.

¹³ Vano kaaweha nave kahiiwa mawu oollotiwa moowella ni epallame ya mpungu eyo yavava muddullu wi, “Otulli! Otulli! Ootulli tti athu attheene enakhalla va ellapo yavatthi vawi angelo araru ehanllaalle eri vakhuviru woopa mapallapatiiwa!”