Yawuupullulla 19 - Mawu a Mulluku

¹ Ddimallille ddenndda kahiiwa mawu awiiweya wonanko onyakulla wa mulloko wa athu anchichi muddullu ellotaka wi, “Aleluya! Ovullusa, ntitimiho ni masiva tti dda Mullukwaahu!

² Echiweruzwaaye tti yawoona ni yoolungama! Aamweeruza hule oovuwa oyo aripihalle ellapo yavatthi ni oraruwa waye. Mulluku oomullaka kaambiiwa aawiipha oorumeyellaaye.”

³ Mulloko wa athu anchichi waakhuwa wiilli wi, “Aleluya! Mwiisi woovenyera va munllo oyo washellellihalle muzinda woovuwa onnavirellella owella oddullu wa enthawi yoohimalla!”

⁴ Nave attekweene 24 ni ddoophatusiwa ddookumi ddisese ddaakokhora nave ddimullapella Mulluku, oyo akeraatthille vampandoni woomwenaaye. Yaallota wi, “Amen! Aleluya!”

Dda machellello a okwati a mwaanaankhosa

⁵ Nave mawu yaavenyera o mpando woomwene wooddullu oollota wi, “Aleluya! Oorumeyellaaye attheene a Mulluku ni athu attheene ayo enamoova olliye, uullupalli ni ang'onong'ono, emutitimihe!”

⁶ Nave kahiiwa onyakulla wonanko wa mulloko muullupalli wa athu, awiiweya wonanko onyakulla wa maaddi manchichi navettho wonanko ogugudeya wa murimu wuullupalli. Kaawiiwa ellotaka wi, “Aleluya! Vawi Apwiya, Mullukwaahu Amasiva Mattheene, sika ari mwene!

⁷ Hankoni nihakallalle, hankoni nititimihe wunnuwa waye! Vawi enthawi ya machellello a okwati wa mwaanaankhosa aaphiya nave ootthelliwooyo ookhozekella khalle.

⁸ Oovahiwa ekuwo yaweellesesa wi aware.” (Ekuwo yaweelleseseeyo sika mitteko ddoolungama dda athu a Mulluku.)

⁹ Vano mungelo aallota wa miyaano wi, “Lemba ddenndda, oodalisiwa tti ayo yiithaniwe omachellelloni a okwati wa mwaanaankhosa.” Ahoonjererattho ollotanko wi, “Yaalla sika mawu awoona a Mulluku.”

¹⁰ Kaakokhora vamiitthoni vaye wi kimullapelle koma olliye aakilleella wi, “Oheere ddennddo! Mi tti oorumeyella mukhwaawo nave mmodda a asinno ni arokoriyo, attheene ayo enakhallella omboni dda Yesu. Mullapelle Mulluku!” Vawi okhallella omboni dda Yesu tti ollotella.

Dda oowella va kavalo aweella

¹¹ Kahoona oddullu ohulleyille nave kavalo aweella ahooneya. Oomuwella oyo nnddina naye aari Oororomelleya ni Awoona, oyo aneeruza ni owana ekhotwaaye mwa echilungamo.

¹² Miitthwaaye yaari wonanko mallumi amunllo nave aawara akorona* anchichi omuruni waye. Nnddina naye naalembiwa va olliye nave khaavo adduwenlle ottaphullella wiwa koma yeekhaayeve.

¹³ Mukanjo awarilleeyooyo waari wooruweyiwa munikhameni. Sika nnddina naye naari, “Mawu a Mulluku.”

¹⁴ Akhoto ooddullu yaamuthwara, ewenlle akavalo aweella nave ewanre ekuwo ddaweellesesa.

¹⁵ Nsupada nawiisha naanooneya nikhumellelle otte ovenyera muwano mwaye ni nenna aneerewaallakella athu a va ellapo yavatthi. Aneerewaalamulella ni ekopo ya mukoko nave aneerovota mpesa mu yoovotella ya osha murima wawoopiha wa Mulluku Amasiva Mattheene.

¹⁶ Va yoowaraaye ni vakasambarani vaye vaalembiwa nnddina nawi, “Mwene a mamwene ni Apwiya a apwiya.”

¹⁷ Nave kaamoona mungelo iimenlle vanndduwani. Aakhuwa ni mawu oowella wa epallame ddittheddene ddoovava wi, “Waawoni mutthukumane vamodda vamachellelloni muullupalli a Mulluku!

¹⁸ Waawoni muttakhune mitembo dda mamwene, oolamulella a akhoto, akhoto, enama dda akavalo ni owaawelliiwa, mitembo dda athu attheene, akaporo ni ayo ehiri akaporo, uullupalli ni ang'onong'ono!”

¹⁹ Nave kahoona enama yuullupalli yawoopiha ni mamwene a va ellapo yavatthi owaaka akhotwiiwa etthukumanne wi ewane ekhoto ni oyo awenlle va kavalooyo ni akhotwaaye.

²⁰ Enama yuullupalli yawoopiheeyo yaaphariwa vamodda ni namallotella awoottha oyo enre ddoottikhiniha vamiitthoni vaye. (Waari weera ddoottikhiniha wenko aallekilleeyena ayo yadindiwe echidindo ya enama yawoopiha yuullupalli ni ayo yallapenlle nifano na enameeyo.) Enama yuullupalli yawoopiha ni anamallotella awoottha yaavokhelliwa eri akumi mu enyanja ya mallumi amunllo ni sulufure.

²¹ Akhotwiiwa yahiiphiwa ni nsupada noovenyera muwano mwa oyo awenlle va kavalo navettho epallame ddittheddene ddaacha mitembo dda athu attheenaayo.