Tito 1 - Mawu a Mulluku

¹ Ovenyera wa miyaano Paulo, oorumeyella a Mulluku ni murummwa a Yesu Khrisitu. Kaatthoolliwa ni orumihiwa wi kikavihere echikhulupililo ya athu a Mulluku ootthoolliwa ni wi kaahoollelle odduwella yawoona moollikana ni omutitimiha Mulluku,

² mootiyerella okumi woohimalla, oyo Mulluku oohoottha, aanilonjezilleeye enthawi ehinaambe.

³ Va enthawi yoophwanellella Mulluku, Oovullusaahu, ahuupullulla yeeyo mu othengaaye. Aakivaha yeella nave kinnallalleya moollikana ni olamula wa Mulluku oonivullusaahu.

⁴ Kinuulembella wonanko Tito, mwanakamwanaka a echikhulupililo yoophwanaphwana ni miyaano. Echisomo ni murendelle ddoovenyera wa Attiitthiihu ni Khrisitu Yesu oonivullusa ddikhalle ni weyaano.

Mutteko wa Tito o Krete

⁵ Kahuuhiya o Krete wi otthopoolle ddeko ddennddo ddihinatthopoowe ni wi waatthoolle attekweene a mpingo* mu erive etawoni wonanko mmo kuulamulalleemi wi

⁶ muullupalli ahikhalle ni yookayikella, akhalleke ni mwaariye mmoddave nave anaaye ekhalle ookhulupilila ni oohikhalla ni epilli ya machimo naari oohiiwellella.

⁷ Vawi oohoollella mpingo anaphwanella ahikhalle ni yookayikella kaambiiwa olliye ari wonanko kapitawo a munibanjani na Mulluku. Ahikhalle awiitukhulla apaalle awaakuva osha murima apaalle oolezela apaalle a maraapwa apaallettho a nrima na makobiri.

⁸ Akhalle ookonda owaakhella alleto ni ookonda ddaphaama. Akhalle awiiwehera yeekhaaye, oolungama, aweella murima ni awiihiiha.

⁹ Apharesese mawu oororomelleya moollikana ni nnddo nahuddenreehu. Mwawi ddiidda aneerowora waallipiha murima amodda ni ehuddiho yawoona ni waavaanya ayo enaavaanya.

¹⁰ Vawi vookhalla amodda oohiroromelleya, makamaka oovenyera o Eyuda, ayo enallota ddoohikhalla ni mutteko ni waahollosa akhwiiwa.

¹¹ Tti woopaalleya waamaalliha kaambiiwa ennaapheelliha muru mabanja mattheene voohuddihani ddoohiphwanella. Eneera ddenndda ni yoolinga yoonanara, yoopaalla ophwanya makobiri.

¹² Mmodda a yaayo, namallotella, aallota wi, “Akrete tti awoottha enthawi ddittheddene, enama ddoonanara ni oolesi wa nrima.”

¹³ Omboni yoolla tti wawoona. Sika waahumullulle moosimwa wi ekhalle mu echikhulupililo yawoona,

¹⁴ ehitthuperiweke ni miyaha dda Ayuda apaalle malamulo a athu ookhoota yawoona.

¹⁵ Ddeko ddittheddene ddinakhalla ddaweella wa yaayo eri aweella murima; nave kheyiivo enakhalla yaweella wa yaayo eri ooripihiwa ni oohikhulupilila vawi ezeru ddiwa ni yawuupusella murimiiwa ddooripihiwa.

¹⁶ Ennaakhullella wi ennamudduwella Mulluku nave ni mitteko ddiwa ennamukhoota vawi tti oonanara, oohiiwellella ni oohiphwanella weera erive ello yaphaama.