Oollalleya 8 - Mawu a Mulluku

¹ Ttaani anaaphwanaphwane ni muthu eezeru? Ttaani anaadduwelle ottaphullella ddeko? Ezeru ddaye ddinnamuhakallalliha nave ddinnawaliha ekhovaaye.

Omwiiwellella mwene

² Wiiwellelleke lamulo na mwene ekaamba ya ollupella wawo wa Mulluku.

³ Ddeko ddaahimuddivella mwene ovenyekevo vamiitthoni vaye mwawaakuva vawi ttuuweera eyo enamuddivella.

⁴ Vallethi mawu a mwene tti amasiva. Ttaani anaamukohe wi, “Ethiyo muneera tini?”

⁵ Oowiiwellella malamulwaaye khenna erive yookatamiha. Muthu eezeru annadduwella enthawi ni ettilla yaweerella ddeko ddittheddene.

⁶ Erive ello yookhalla ni enthawiiwa ni meerellwiiwa Koma ddookatamiha ddaye dda muthu ddinnamunyingallella.

⁷ Khaavo anadduwella nnddo ddinawa. Khaavo anaatthopoolle ddamuhoollo.

⁸ Monga mmo muthu ahinakhallelleeye ni masiva oolamulella mpweya wa okumi tti mmo ahinakhallelleeye ni masiva oodduwella nllapo na okhwa waye. Ekhoto khenathaweya. Athu aweera ddoonanara onanara wiwanko khuwaavullusa.

Oonanara ni oolungama

⁹ Ddittheddenenndda kaaddoona m'murimani mwaka ddeko nnddo ddineereya vatthimva. Erive enthawi vookhalla athu amodda ayo enaalamulella akhwiiwa mweekuku.

¹⁰ Vatulli viwa kaawoona oonanara evitthiwaka mu mahame. Alliwa khalle yaanavollowa ni okhuma m'mapuroni aweella nave m'muzindani athu yaanaatthamalla mmo yeerelliiwa ddenndda. Ddennddattho khaddinna mutteko.

¹¹ Aweeruza yaasellihaka omullaka muthu oochimwa, athu amodda ennallipa murima enapaalla weera ddoonanara.

¹² Naari muthu oochimwa eerille ddoonanara wunchichi, annakhallave ni okumi wa enthawi yoorekama koma kinnadduwella wi oomwiiwellella Mulluku ddinnamweetella phaama vawi annamoova Mulluku.

¹³ Koma oonanaraayo ddeko kheddinaweetella phaama nave okumiiwa tti woohirekama wonanko muuthuuchi vawi khenamoova Mulluku.

¹⁴ Vookhalla ello emodda yoohikhalla ni mutteko eyo eneereya vatthimva. Enthawi emodda athu oolungama ennallakiwa wonanko athu oonanara nave oonanara ennaakhella ddaphaama wonanko aphaama. Kinallota wi ddennddattho khaddinna mutteko.

¹⁵ Ella sika ekaambiiwa kinalloteemi wi muthu ahakallalleke ni okumi vawi khanna yaphaama emodda vatthimva okhwaranya ocha, owirya ni wiihakallalliha. Eeddiiddo aneerohakallalla ni muttekwaaye mallapo mattheene ayo Mulluku amuvahilleeye vatthimva.

¹⁶ Kaahiyavo murimaaka waashaasha wiiwesesa phaama dda ezeru ddittheddene ddaweereya vatthimva oohikona otthaana ni mahiiyu.

¹⁷ Nave kahoona mitteko dda Mulluku. Khaavo muthu oyo anaawore oddikhumellella ddittheddene nnddo ddineereya vatthimva. Naari muthu eeseese mwawiidde wi addiiwesese, khaddikhumellella. Naari muthu eezeru allote wi annadduwella ddeko, tti woohiworeya wi addikwakhwanihe.