Numeri 4 - Mawu a MullukuAkohati 1 Apwiya yaamulleella Mose ni Aroni wi, 2 “Mwa Edduullu dda Levi muweerenge Akohati moollikana ni mabanjiiwa navettho makhollwiiwa. 3 Muweerenge allopwana a miyakha 30 ophiyera a miyakha 50, attheene ayo enaarumeyelleke va mutteko wa mu musasa wamutthukumano. 4 Mutteko oyo Akohati enaapharekiiwa mu musasa wamutthukumano tti opwatha ddeko ddoopatuleyesesa.” 5 Athu yaatthaamaka ni misasa ddiwa, Aroni ni anaaye evollowe m'musasani wamutthukumano, ettaphulle ekatani nave ehuruwelle nibokosi na echipangano. 6 Vatulli viwa ekhuneelle ni mattapara awoollowa nave vaddullu viwa yaannddellellevo ekuwo yabululu nave ehereremo ekopo ddiwa. 7 Nave vatebuloni a buledi oopatuleya yaannddellellevo ekuwo yabululu, ehiyevo embale ddiwa, ebakuli, mino, mabeseni oopaalleya va mikutho dda ddoowirya nave buledi oyo anaakhalleke vaavo enthawi ettheene. 8 Vano vaddullu va ddennddo yaannddellellevo ekuwo yoofiira nave eddihuruwelle ddittheddenennddo ni mattapara awoollowa nave ehereremo ekopo ddiwa. 9 Ekuse ekuwo yabululu nave ekhuneellena yoohiyavo enyali ni enyali ddiwa, ddoopanella ddiwa, embale yoohiyamo ntuura ni ezipangizo ddiwa ddittheddene ddoohellamo makhura. 10 Nave eyihiye ni ezipangizo ddiwa ddittheddene ehuruwelle ni nttapara nawoollowa nave eddihiye va ddootukhullella viwa. 11 Yaannddellelle ekuwo yabululu va nikuwa nagolide nave eyiikhuneelle ni mattapara awoollowa nave ehereremo ekopo ddiwa. 12 Ekuse ezipangizo ddittheddene nnddo enapharihiiwa mutteko mu nipuro noopatuleya, eddihuruwelle ni ekuwo yabululu, eddikhuneelle ni mattapara awoollowa nave eddihiye va yootukhullelliiwa. 13 Evenyihevo ntuura vanikuwani nave yaannddellellevo ekuwo yoofiira. 14 Ehiyevo ezipangizo ddittheddene dda vanikuwani, ezipangizo ddoovallella munllo, mafoloko, mafosholo ni mabeseni, nikhulle mi ezipangizo ddittheddene dda vanikuwanimvo. Va ddittheddenennddo yakhuneellevo ni mattapara awoollowa nave ehereremo ekopo ddiwa. 15 Vano Aroni ni Anaaye, emallihalle okhuneella ddekonnddo ni ezipangizo ddiwa ddittheddene athu yaatthaamaka, Akohati sika enaatukhulleke ddenndda koma ehittannye ddeko ddoopatuleya wi ehikhwe. Ddenndda sika ddeko dda m'musasani wamutthukumano nnddo Akohati enaatukhullekiiwa. 16 Eleazara mwaana a Aroni apwatheke makhura a enyali, lubani,* mukutho wa othu woovelleelliwa nllapo ni nllapo ni makhura oozozella. Epwathekettho musasa wamutthukumano ni ddittheddene dda muwari mwiwa navettho ni ezipangizo ddiwa. 17 Apwiya yaamulleella Mose ni Aroni wi, 18 “Muhinaakhullella Akohati yoonongeye variyari va Alevi, 19 ekaamba yawaatamella ddeko ddoopatuleyesesa. Sika Aroni ni anaaye eye yamulleelle arive Mukohati ddawi eere nave ddawi atukhulle. 20 Koma ehivollowe mu musasa wamutthukumano wi yawehe naari vang'ono ddeko ddoopatuleya wi ehikhwe.” Agereshoni 21 Apwiya yaamulleella Mose wi, 22 “Oweerenge Agereshoni moollikana ni mabanjiiwa navettho makhollwiiwa. 23 Oweerenge allopwana waambeella a miyakha 30 ophiyera a miyakha 50, attheene ayo enaarumeyelleke mu musasa wamutthukumano. 24 Agereshoni epwatheke nave etukhulleke, 25 Musasa wamutthukumano ni echirona, ekuwiiwa, mattapara awoollowa ookhuneellana vaddullu viwa navettho ekatani ya va mullakwiiwa. 26 Ekuwo ya mpanda wa nthato noowaapheella musasa wa Mutthukumano ni nikuwa, ekatani ya mullako wa nthato navettho mikwe ddiwa ni ezipangizo ddittheddene ddoopaalleya ni mitteko ddittheddene dda ddekonndda. 27 Aroni ni anaaye yaawehereke Agereshoni va ddittheddene nnddo enaatukhullekiiwa nave va ddittheddene enaaweerekiiwa. Tti weyaano onaawaalleelle yawi etukhulle. 28 Yoolla tti mutteko wa Agereshoni mu musasa wamutthukumano nave oowehera muttekoolla akhalle Itamara, mwaana a Aroni. Amerari 29 “Oweerenge Amerari moollikana ni mabanjiiwa navettho makhollwiiwa. 30 Oweerenge allopwana waambeella a miyakha 30 ophiyera a miyakha 50, attheene ayo enaarumeyelleke mu musasa wamutthukumano. 31 Amerari etukhulleke nnddo elamuliwiiwa va muttekwiiwa wa mu musasa wamutthukumano. Etukhulleke miteekho dda meto, machengo, apoto ni matthipello 32 Yaatukhulleke apoto ni ekhomo ddiwa, mikwe ddiwa, owaakattho ezipangizo ddiwa ddittheddene, dda mpanda wa nthato. Nave omulleelle arive muthu eyo anaatukhullekeeye. 33 Yoolla tti mutteko wa a Merari mu musasa wamutthukumano nave oowehera muttekoolla akhalle Itamara, mwaana a Aroni.” Weerengiwa wa Alevi 34 Vano Mose ni Aroni ni oohoollella a athwaayo yaaweerenga Akohati moollikana ni mabanjiiwa navettho makhollwiiwa. 35 Yaaweerenga allopwana waambeella a miyakha 30 ophiyera a miyakha 50, attheene ayo enaarumeyelleke o musasa wamutthukumano. 36 Nave echiwerengerwiiwa yaari 2,750 moollikana ni mabanjiiwa. 37 Yeeyo sika yaari echiwerengero ya athu a mabanja a Akohati, attheene yarumeyella o musasa wamutthukumano, ayo Mose ni Aroni yaweerengilliiwa moollikana ni mmo Apwiya yalamulelliiwa oweella mwa Mose. 38 Yaaweerengattho Agereshoni moollikana ni mabanjiiwa navettho makhollwiiwa, 39 waambeella Allopwana a miyakha 30 ophiyera a miyakha 50, attheene ayo enaarumeyelleke o musasa wamutthukumano. 40 Echiwerengerwiiwa yaari 2,630 moollikana ni mabanjiiwa navettho makhollwiiwa. 41 Yeeyo sika yaari echiwerengero ya athu a mabanja a Agereshoni, attheene yarumeyella o musasa wamutthukumano, ayo Mose ni Aroni yaweerengilliiwa moollikana ni mmo Apwiya yalamulelliiwa oweella mwa Mose. 42 Yaaweerengattho Amerari moollikana ni makhollwiiwa, 43 waambeella a miyakha 30 ophiyera a miyakha 50, attheene ayo yarumeyella o musasa wamutthukumano. 44 Echiwerengerwiiwa yaari 3,200 moollikana ni mabanjiiwa. 45 Yeeyo sika yaari echiwerengero ya athu a mabanja a Merari, attheene yarumeyella o musasa wamutthukumano, ayo Mose ni Aroni yaweerengilliiwa moollikana ni mmo Apwiya yalamulelliiwa oweella mwa Mose. 46 Sika Mose ni Aroni ni oohoollella a Aisraele yaaweerenga Alevi attheene moollikana ni mabanjiiwa navettho makhollwiiwa, 47 waambeella allopwana a miyakha 30 ophiyera a miyakha 50, attheene ayo yarumeyella voopharani mutteko woomutukhulla katundu a mu musasa wamutthukumano. 48 Echiwerengerwiiwa yaari 8,580. 49 Athwaayo yaalleelliwa yawi epwatheke apaalle etukhulleke moollikana ni mmo yalamulelle Apwiya oweella mwa Mose. Mmu sika mmo yaweerengelliiwa athwaayo moollikana ni mmo Apwiya yalamulelliiwa. |
The Bible in Elhomwe © The Bible Society of Malawi, 2019.
Bible Society of Malawi