Numeri 33 - Mawu a Mulluku

Ovenyera o Iguputo oya o Mowabu

¹ Aisraele yakhumalliiwa mu Iguputo m'millokoni dda mallokwiiwa, Mose ni Aroni yaahoollellaka,

² Mose aalemba manddina a mapuro mattheene ayo yatthipenlliiwavo misasa moollikana ni mmo Apwiya yalamulelliiwa.

³ Yaatimulla o Ramsesi va nllapo na 15 na mweeri wawaamba. Osaka wene, niviralle nllapo na Paska, Aisraele yaakhuma mu Iguputo mookotella, Aiguputo attheene yoonaka.

⁴ Aiguputo yaari yaavitthaka aniiwa aallopwana awaamba ayo Apwiya yawiiphalliiwa variyari viwa vawi Apwiya yaallaka milluku dda Aiguputo.

⁵ Vano Aisraele yaatimulla o Ramsesi yatthipella misasa ddiwa o Sukoti.

⁶ Etimullalle o Sukoti yaatthipella misasa ddiwa o Etamu, muzinda oyo waari mukhwipi mwa echipululu.

⁷ Etimullalle o Etamu, yaahokollweella o Pihahiroti, muzinda oyo waari wookhuma nndduwa wa Baala Zefoni nave yaatthipella misasa vakhuviru ni Migidoli.

⁸ Etimullalle o Pihahiroti yaallapuwa variyaririyari va enyanja, evollowa mu echipululu. Vano yaheeta olendo wa mallapo mararu mu echipululu ya Etamu, yatthipella misasa ddiwa o Mara.

⁹ Etimullalle o Mara yaaphiya o Elimu. O Elimunko waakhalla aneetuutu khumi ni eelli ni miteekho dda kanjeza 70 nave yaatthipellawo misasa ddiwa.

¹⁰ Etimullalle o Elimu yaatthipella misasa ddiwa mukhwipi mwa Enyanja Yoofiira.

¹¹ Etimullalle o Enyanja Yoofiira yaatthipella misasa ddiwa o echipululu ya Sini.

¹² Etimullalle o echipululu ya Sini yaatthipella misasa ddiwa o Dofika.

¹³ Etimullalle o Dofika yaatthipella misasa ddiwa o Alushi.

¹⁴ Etimullalle o Alushi yaatthipella misasa ddiwa o Refidimu nko wahiri maaddi oowirya.

¹⁵ Etimullalle o Refidimu yaatthipella misasa ddiwa o echipululu ya Sinai.

¹⁶ Etimullalle o echipululu ya Sinai yaatthipella misasa ddiwa o Kiburoti Hatava.

¹⁷ Etimullalle o Kiburoti Hatava yaatthipella misasa ddiwa o Hazeroti.

¹⁸ Etimullalle o Hazeroti yaatthipella misasa ddiwa o Ritima.

¹⁹ Etimullalle o Ritima yaatthipella misasa ddiwa o Rimoni Perezi

²⁰ Etimullalle o Rimoni Perezi yaatthipella misasa ddiwa o Libina.

²¹ Etimullalle o Libina yaatthipella misasa ddiwa o Risa.

²² Etimullalle o Risa yaatthipella misasa ddiwa o Kehelata.

²³ Etimullalle o Kehelata yaatthipella misasa ddiwa o mwaango wa Shefera.

²⁴ Etimullalle o Shefera yaatthipella misasa ddiwa o Harada.

²⁵ Etimullalle o Harada yaatthipella misasa ddiwa o Makeloti.

²⁶ Etimullalle o Makeloti yaatthipella misasa ddiwa o Tahati.

²⁷ Etimullalle o Tahati yaatthipella misasa ddiwa o Tera.

²⁸ Etimullalle o Tera yaatthipella misasa ddiwa o Mitika.

²⁹ Etimullalle o Mitika yaatthipella misasa ddiwa o Hashimona.

³⁰ Etimullalle o Hashimona yaatthipella misasa ddiwa o Meseroti.

³¹ Etimullalle o Meseroti yaatthipella misasa ddiwa o Beeroti Bene Yaakani.

³² Etimullalle o Bene Yaakani yaatthipella misasa ddiwa o Horo Hagidigadi.

³³ Etimullalle o Horo Hagidigadi yaatthipella misasa ddiwa o Yotibata.

³⁴ Etimullalle o Yotibata yaatthipella misasa ddiwa o Aburona.

³⁵ Etimullalle o Aburona yaatthipella misasa ddiwa o Eziyoni Gebere.

³⁶ Etimullalle o Eziyoni Gebere yaatthipella misasa ddiwa o echipululu ya Zini sika wi, Kadeshi.

³⁷ Etimullalle o Kadeshi yaatthipella misasa ddiwa o mwaango wa Hori mukhwipi mwa ellapo ya Edomu.

³⁸ Apwiya emulamulalle, Aroni aawella mwaango wa Hori akhwella wenko va nllapo nawaamba na mweeri waneetthanu muyakha wa 40 Aisraele ekhumalle mu Iguputo.

³⁹ Aroni aari ni miyakha 123 akhweeye va mwaango wa Hori.

⁴⁰ Mukanani, mwene a o Aradi oyo akhalla omwera wa Kanani ahiiwa wi Aisraele enimawa.

⁴¹ Vano yaatimulla o mwaango wa Hori yatthipella misasa ddiwa o Zalimona.

⁴² Etimullalle o Zalimona yaatthipella misasa ddiwa o Punoni.

⁴³ Etimullalle o Punoni yaatthipella misasa ddiwa o Oboti.

⁴⁴ Etimullalle o Oboti yaatthipella misasa ddiwa o Iyeabarimu mu ellapo ya Mowabu.

⁴⁵ Etimullalle o Iyimu yaatthipella misasa ddiwa o Diboni Gadi.

⁴⁶ Etimullalle o Diboni Gadi yaatthipella misasa ddiwa o Alimoni Dibulataimu.

⁴⁷ Etimullalle o Dibulataimu yaatthipella misasa ddiwa o miyaango dda Abarimu vakhuviru ni Nebo.

⁴⁸ Etimullalle o Abarimu yaatthipella misasa ddiwa o matapo a o Mowabu vakhuviru ni muhinje wa Yordani o Yeriko.

⁴⁹ Yaatthipella misasa ddiwa vakhuviru ni muhinje wa Yordani waambeella o Beteyeshimoti ophiya o Abele Shitimu, mu matapo a o Mowabu.

Malangizo ehinallapuwe muhinje wa Yordani

⁵⁰ Apwiya yaamulleella Mose mu matapo a o Mowabu vakhuviru ni muhinje wa Yordani o Yeriko wi

⁵¹ aalleelle Aisraele wi, “Mwaallapuwaka muhinje wa Yordani wi mwavollowe mu Kanani,

⁵² muwiikarihe athu attheene a mwiillaponi mwemmo mwaphiyawo. Nave moononge ddoophwanaphwaniha ddoosema ddiwa, mafanwiiwa a mikoko ni mapurwiiwa oollapellamo mafano.

⁵³ Mwaakhe ellapweeyo wi ekhalle yaanyu nave mwakhalleke mwemmo vawi kohuuvahani wi ekhalle yaanyu.

⁵⁴ Muneerewaakhella ellapweeyo wi ekhalle yoohallanaanyu mwawoombesa moollikana ni mabanjaanyu. Nlloko nuullupalli naakhelle nipuro nuullupalli nave nlloko ning'onong'ono naakhelle nipuro ning'onong'ono. Muthu avahiweke nipuro nno woombesanko onaamumorelliiwa. Muneerewaakhella nipuro wi nikhalle yoohallanaanyu moollikana ni malloko a makhollwaanyu.

⁵⁵ Koma mwaahiwiikariha athu ayo enakhalla mwiillaponimmo mwaaphiyaka, ayo munaawaakhullelleenyu wi ehalle, enaakhalle wonanko mwaneello uumorelleni m'mwiitthoni apaalle wonankottho miiwa mukhwipi mwanyu. Nave eneerewuukatamihani mu ellapo eyo munaakhallekeenyumo.

⁵⁶ Vano kineeroweerellani nyuwaano nnddo kaganizeemi wi kiweerelle alliwa.”