Numeri 32 - Mawu a Mulluku

Malloko a wookhuma nndduwa wa Yordani

¹ Arubeni ni Agadi yaakhalla ni eng'ombe ddinchichi. Vano yahoona ellapo ya Yazere ni ya Giliyadi wi tti yoophwanella ochihawo eng'ombe.

² Sika yaaya wa Mose, Eleazara ni wa oohoollella a Aisraele yaalleella wi,

³ “Mizi dda Ataroti, Diboni, Yazere, Nimira, Heshiboni, Eleyale, Sebamu, Nebo ni Beoni,

⁴ ellapo eyo Apwiya yaagonjihelliiwa Aisraele tti yoophwanella ochihawo eng'ombe nave hiyaano oorumeyellaanyu nookhalla ni eng'ombe.

⁵ Mwaneerella echifundo, munivahe hiyaano oorumeyellaanyu wi ekhalla yaahu. Muhinillapuse oya okhopella wa Yordani.”

⁶ Koma Mose ahaakoha Agadi ni Arubeni wi, “Ethiyo munapaalla wi abalaanyu yawaneke ekhoto nyuwaano murimoona okeraatthi wuno?

⁷ Kaambiiwa tini munapaalleenyu waatathilliha murima Aisraele wi ehivollowe mu ellapo eyo Apwiya yaavahilliiwa?

⁸ Makhollwaanyu yaheera ddawi ddiidda kaarumalleemi ovenyera o Kadeshi Baranea wi yazonde ellapo.

⁹ Alliwa yaaya o ntapo na Eshikolo yazonda ellapweeyo nave yahaatathilliha murima Aisraele vawaalleellani wi ehiye yavollowa mu ellapo eyo Apwiya yaavahilliiwa.

¹⁰ Vano nllapo nenno Apwiya yaasha murima nave yaallupella wi,

¹¹ ‘Ddawoona, khaavo naari mmodda mwa athu ookhuma mu Iguputo waambeella a miyakha 20 oya muhoollo oyo anaawoone ellapo eyo kallupenlleemi wi kineeromuvaha Abrahamu, Isaki ni Yakobo kaambiiwa kheyaakiiwellelle.

¹² Khaavo naari mmodda oyo anaavollowe mu ellapweeyo, omupatula Kalebe mwaana a Yefune a o Kenizi ni Yoswa mwaana a Nuni ekaamba yawi alliwaayo yaawiiwellella Apwiya.’

¹³ Apwiya yahaashella murima Aisraele nave yaaweetiha muchipululuni mulle miyakha 40 ophiyera mbado muttheene oyo weerille ddoonanara vamiitthoni va Apwiya otthollowille.

¹⁴ Vano nyuwaano mbado wanaanweene wa athu oochimwa muri wonanko makhollwaanyu vawi munapaalla wi mwaanjerere osha murima wawoopiha wa Apwiya va Aisraele.

¹⁵ Mwaahiya waathwara, alliwattho eneerewaahiya athu muchipululuni nave muneerowoonongiha athu attheene.”

¹⁶ Vano alliwa yaasusera wa Mose emulleella wi, “Vawaamba munaakhullelle wi nimake wuno makholla a eziweto ddahu ni mizinda dda aniihu.

¹⁷ Vatulli viwa nineerokhozekella ekhoto ni waahoollella Aisraele ophiyera naaphiyihalle omapuroni wiwa. Koma aniihu eneerokhalla m'mizindani ddampanda, owoova athu a mwiillaponimmu.

¹⁸ Khanihokollweella owanihu ophiyera arive Muisraele aakhenlle nipuro wi nikhalle yoohallanaaye.

¹⁹ Hiyaano khanaakhellana wi ekhalle yaahu yaahu okhopella wa Yordani apaalle okhwaranya wenko kaambiiwa nohaakhella nipuro wi nikhalle yoohallanaahu weewuno, wookhuma nndduwa wa Yordani.”

²⁰ Sika Mose ahaalleella athwaayo wi, “Mukhozeke vamiitthoni va Apwiya wi muye okhotoni.

²¹ Arive muthu a nyuwaano akhozeke nave amullapuwe Yordani vamiitthoni va Apwiya ni owiikariha adanaahu,

²² ophiyera mugonjihalle ellapweeyo vamiitthoni va Apwiya nave vatulli viwa muneerohokollweella wuno kaambiiwa munaakhalle muri oottaphuwa vamiitthoni va Apwiya ni Aisraele. Vano ellapweella eneerokhalla yaanyu vamiitthoni va Apwiya.

²³ Koma mwaaheera ddiiddo, mohaachimwella Apwiya nave dduwellani wi nichimo nanyu nineerewuuthwarani.

²⁴ Makani mizinda dda aniinyu ni makholla a enkhosa ddanyu koma mweerethi nnddo mulonjezilleenyu.”

²⁵ Vano Agadi ni Arubeni yaallota wa Mose wi, “Hi oorumeyellaanyu, nineereweera moollikana ni mmo nyuwaano apwiyaahu mulamulelleenyu.

²⁶ Aniihu ni awarihu eneerohalla o mizinda dda Giliyadi vamodda ni eziweto ddahu.

²⁷ Koma hiyaano oorumeyellaanyu nineerollapuwa arive muthu akhozekille wi awane ekhoto vamiitthoni va Apwiya moollikana ni mmo nyuwaano apwiyaahu mulamulelleenyu.”

²⁸ Sika Mose aamulamula Eleazara, Yoswa ni oohoollella a mabanja a malloko a Aisraele wi,

²⁹ Agadi ni Arubeni attheene ayo enaawore okhozeka wi yawane ekhoto vamiitthoni va Apwiya, ethaanana ni nyuwaano emullapuwa Yordani, yagonjiha ellapo eyo eri muhoollo mwanyu, mwaavahe ellapo ya Giliyadi wi ekhalle yayiwa.

³⁰ Koma yaahillapuwa ni nyuwaano ekhozekille wi yawane ekhoto eneerewaakhella mapuro variyari vanyu mu Kanani.

³¹ Nave edduullu dda Gadi ni dda Rubeni ddahaakhulla wi, “Hi oorumeyellaanyu nineereweera nnddo Apwiya enilleelliiwa.

³² Nineerollapuwa nikhozekille owana ekhoto vamiitthoni Apwiya ni ovollowa mu ellapo ya Kanani koma yoohallanaahu eneerokhalla weewuno o embali ya Yordani.”

³³ Vano Mose ahaavaha Agadi ni Arubeni navettho hafu a nlloko na Manase mwaana a Yosefe, ellapo ya mwene Sihoni a Aamori ni ellapo ya mwene Ogi a o Bashani, ellapo ettheene ni mizinda ni mizi ddiwa.

³⁴ Agadi yaamaka wiilli mizinda dda Diboni, Ataroti, Aroere,

³⁵ Atiroti Shofani, Yazere, Yogobeha,

³⁶ Betenimura ni Beteharani. Ddittheddenenndda ddaari ddoowaapheelliwa ni mipanda navettho yaamaka makholla a eziweto.

³⁷ Arubeni yaamaka wiilli mizinda dda Heshiboni, Eleyale, Kiriyataimu,

³⁸ Nebo, Sibima ni Baala Meoni (nnddina nenna naasinthiwa). Mizinda nnddo yaddimakilliiwa yaaddivaha mannddina mamodda.

³⁹ Edduullu dda Makiri mwaana a Manase ddaaya ddaakha ellapo ya Giliyadi ddiwiikarihamo Aamori ayo yakhalla mwiillaponimmo.

⁴⁰ Mose aamuvaha Makiri mwaana a Manase ellapo ya Giliyadi nave Makirooyo aakhalla mwemmo.

⁴¹ Yairi a nlloko na Manase aaya aakha mizi ddimodda addivaha nnddina naye nawi Yairi.

⁴² Noba aaya aakha muzinda wa Kenati ni mizi ddiwa nave awuvaha nnddina nawi Noba moollikana ni nnddina naye.