Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Numeri 3 - Mawu a Mulluku


Dda ntthopoollo na edduullu dda Aroni

1 Nndda tti mibado dda Aroni ni Mose va enthawi eyo Apwiya yallotiiwa ni Mose va mwaango wa Sinai.

2 Manddina a anamwani a Aroni tti alla, Nadabu mwanaye awaamba, Abihu, Eleazara ni Itamara.

3 Yaalla tti allupa mukutho ootthoolliwa ayo Aroni aazozilleeye wi ekhalle allupa mukutho.

4 Koma Nadabu ni Abihu yaakhwa vamiitthoni va Apwiya mvo yavelleelliiwa munllo woohaakhullelliwa mu echipululu ya Sinai. Alliwaayo kheyaarina anamwani sika vano Eleazara ni Itamara yaarumeyella yaariiwa allupa mukutho va enthawi eyo Aroni, attiitthiiwa yaariiwa mukumi.

5 Apwiya yaamulleella Mose wi,

6 “Oweena wuno athu a nlloko na Levi nave waavelleelle wa Aroni wi emukavihereke.

7 Emukavihereke olliye navettho athu attheene voorumeyellani mu musasa wamutthukumano.

8 Epwatheke ezipangizo ddittheddene dda mu musasa wa wamutthukumano nave yarumeyelleke wenko munipuroni mwa Aisraele attheene.

9 Alevaayo waavelleelle wa Aroni ni anaaye. Waapatulesese wa alliwaayo munipuroni mwa Aisraele.

10 Omutthoolle Aroni ni anaaye wi ekhalle allupa mukutho. Koma arive muthu anaawaatamelle musasa wamutthukumano iiphiwe.”

11 Apwiya yaamulleella Mose wi,

12 “Mwa Aisraele kohaapatula Alevi munipuroni mwa arive mwaana aamullopwana awaamba, oyo anamalliha onamwalli wa mennya. Alevaayo tti aaka,

13 vawi anamwani attheene aallopwana awaamba tti aaka. Va nllapo nne kawiiphalleemi anamwani aallopwana attheene awaamba a Aiguputo, kahiitthoollella anamwani aallopwana attheene awaamba a Aisraele, anamwani a athu ni a enama ddene. Attheene tti aaka nave mi tti Apwiya.”


Weerengiwa wa Alevi

14 Apwiya yaamulleella Mose mu echipululu ya Sinai wi,

15 “Oweerenge Alevi moollikana ni mabanjiiwa navettho makhollwiiwa. Omweerenge arive mullopwana awaambeella mweeri mmodda oya muhoollo.”

16 Sika Mose aaweerenga moollikana ni mmo Apwiya yalamulelliiwa.

17 Manddina a anamwani a Levi yaari Gereshoni, Kohati ni Merari.

18 Anamwani a Gereshoni moollikana ni mabanjiiwa yaari Labini ni Shimei.

19 Anamwani a Kohati moollikana ni mabanjiiwa yaari Amuramu, Izara, Hebroni ni Uziyele

20 Anamwani a Merari moollikana ni mabanjiiwa yaari Mali ni Mushi. Yaalla sika mabanja a Levi moollikana ni makhollwiiwa.

21 Alibini ni Ashimei yaari mabanja oovenyera mwa Gereshoni. Yaalla sika yaari mabanja a Agereshoni.

22 Echiwerengerwiiwa moollikana ni waata wa allopwana attheene, waambeella a mweeri mmodda oya muhoollo yaari 7,500.

23 Mabanja a Agereshoni yaanatthipella misasa ddiwa otulli wa musasa wamutthukumano woovollowa nndduwa.

24 Eliyasafu mwaana a Laele sika aari oohoollella a mabanja a Agereshoni.

25 Nave mutteko wa Agereshoni mu musasa wamutthukumano waari woopwatha musasooyo ni echironiiwa, ekatani ya va mullako,

26 ekuwo ya mpanda wa nthato noowaapheella musasa wa Mutthukumano ni nikuwa, ekatani ya mullako wa nthato navettho mikwe ddiwa. Sika yaanaphara mitteko ddittheddenenndda.

27 Aamuramu, Aizihara, Ahebroni ni Auziyele yaari mabanja oovenyera mwa Kohati. Yaalla sika yaari mabanja a Akohati.

28 Echiwerengerwiiwa moollikana ni waata wa allopwana attheene, waambeella a mweeri mmodda oya muhoollo yaari 8,600 ayo yaphara mutteko mu nipuro noopatuleya.

29 Mabanja a Akohati yatthipella misasa ddiwa omwera wa musasa wamutthukumano.

30 Elizafani mwaana a Uziyele sika aari oohoollella a mabanja a Akohati.

31 Nave mutteko wa Akohati waari woopwatha nibokosi na echipangano, tebulo, yoohiyavo enyali, makuwa, ezipangizo dda m'mapuroni oopatuleya nnddo allupa mukutho yapharihiiwa mutteko ni ekatani. Yaanaphara mitteko ddittheddenenndda.

32 Vano Eleazara mwaana a Aroni, mullupa mukutho sika aari muullupalli a oohoollella a Alevi navettho oyo aawehera ayo yapwatha nipuro noopatuleya.

33 Amali ni Amushi yaari mabanja oovenyera mwa Merari. Yaalla sika yaari mabanja a Amerari.

34 Echiwerengerwiiwa moollikana ni waata wa allopwana attheene, waambeella a mweeri mmodda oya muhoollo yaari 6,200.

35 Zuriyele mwaana a Abihaili sika aari oohoollella mabanja a Merari. Alliwa yaanatthipella misasa ddiwa ompoto wa musasa wa Mulluku.

36 Nave mutteko wa Amerari waari woopwatha miteekho dda nipuro noopatuleya. Miteekho ddene ddaari meto, machengo, apoto, matthipello ni ezipangizo ddittheddene. Yaanawehera mitteko ddittheddenenndda.

37 Yaanapwathattho apoto, matthipello, ekhomo ni mikwe dda mpanda wa nthato.

38 Mose ni Aroni ni anaaye sika yatthipella misasa ddiwa owiitthoni wa musasa wamutthukumano, wookhuma nndduwa. Alliwa yaanarumeyella mu nipuro noopatuleya, munipuroni mwa Aisraele. Koma arive muthu anaawaatamelle musasa wamutthukumano aaniiphiwa.

39 Alevi attheene ayo Mose ni Aroni yaweerengilliiwa Apwiya yaalamulalle moollikana ni mabanjiiwa, allopwana attheene waambeella a mweeri mmodda oya muhoollo yaari 22,000.

40 Apwiya yaamulleella Mose wi, “Oweerenge anamwani aallopwana attheene awaamba a Aisraele, waambeella a mweeri mmodda oya muhoollo mmodda mmodda.

41 Vano okikuselle Alevi munipuroni mwa anamwani attheene awaamba mwa Aisraele. Okusettho eziweto dda Alevi munipuroni mwa eziweto ddittheddene ddawaamba mwa dda Aisraele. Mi tti Apwiya.”

42 Sika Mose aaweerenga anamwani attheene awaamba mwa Aisraele moollikana ni mmo Apwiya yamulamulelliiwa.

43 Vano echiwerengero ya anamwani attheene aallopwana waambeella a mweeri mmodda oya muhoollo yaari 22,273.

44 Apwiya yaamulleella Mose wi,

45 “Waakuse Alevi munipuroni mwa anamwani attheene awaamba a Aisraele, okusettho eziweto dda Alevi m'mapuroni mwa eziweto ddittheddene ddawaamba mwa eziweto dda Aisraele, Alevi tti aaka nave mi tti Apwiya.

46 Voopaallani owoopolla anamwani awaamba a Aisraele 273 ayo ekhwaranyille echiwerengero ya allopwana a nlloko na Levi,

47 okuse makobiri a siliva matthanu va arive muthu. Makobiraayo ekhalle moollikana ni yoolingella yoopatuleya

48 Makobiri yaalla ovelleelle wa Aroni ni Anaaye wi ekhalle yoowoopollella Aisraele ayo ekhwaranyille echiwerengero.”

49 Sika Mose aakusa makobiri awoopollella ovenyera wa Aisraele ayo ekhwaranyille echiwerengero ya ayo yoopolliwe ni Alevi.

50 Yaakusa makobiri a siliva wa anamwani awaamba a Aisraele 1,365 moollikana ni yoolingella yoopatuleya.

51 Nave Mose aavelleella makobiri awoopollellaayo wa Aroni ni wa anaaye moollikana ni mawu ayo Apwiya yamulamulelliiwa.

The Bible in Elhomwe © The Bible Society of Malawi, 2019.

Bible Society of Malawi
ကြှနျုပျတို့နောကျလိုကျပါ:



ကြော်ငြာတွေ