Numeri 14 - Mawu a Mulluku

Wiinyullulla wa Aisraele

¹ Vano Aisraele attheene yaakhuwa wunchichi nave yahinlla mahiiyu yaayo.

² Attheene yahaamba owiinyullulla Mose ni Aroni. Athu attheene yahaalleella wi, “Waaweerokhalla waphaama nakhwenlleke o Iguputo apaalle muchipululuni mwemmu.

³ Kaambiiwa tini Apwiya enanivollochihiiwa mu ellapo yeeyo wi niiphiwe okhotoni? Awarihu ni aniihu eneeropharelliwa wuukaporoni. Ethiyo khokhalla phaama wi nihokollweelle o Iguputo?”

⁴ Vano yahaamba okambirana wi, “Hankoni nimutthoolle oohoollellaahu wi nihokollweelle o Iguputo.”

⁵ Mose ni Aroni yaamora ekhove ddiwa vamiitthoni va mulloko wa Aisraele.

⁶ Yoswa mwaana a Nuni ni Kalebe mwaana a Yefune ayo yaari m'mullokoni wa athu oozonda ellapweelle yahaahulla ddoowara ddiwa.

⁷ Nave yaalleella Aisraele attheene wi, “Ellapo nayizondilleehweeyo tti yaphaama wunchichi.

⁸ Apwiya yaarimi ehakallallaka ni hiyaano, eneeronivollochiha mu ellapo ya mukaka ni enwi nave eneeronivaha wi ekhalle yaahu.

⁹ Koma muhiwiinyullulle Apwiya. Muhinawoova athu a mwiillaponimmo vawi nineerewaagonjiha. Muhiwoove vawi alliwa khenna owaaseera nave Apwiya eri ni hiyaano.”

¹⁰ Koma athu attheene yapaalla waavokha malluku. Enthawi yeeyo moorurumusa ntitimiho na Apwiya naawooneyella Aisraele mu musasa wamutthukumano.

Mose anaavekellella athu

¹¹ Apwiya yaamukoha Mose wi, “Ethiyo athu yaalla enaahiye niini okivevulla? Nave enaahiye niini ohikikhulupilila naari yoonille ezizindikiro nnddo keerilleemi vamiitthoni viwa?

¹² Kineerowiipha ni mullilli nave khevollowamo mwiillaponimmo. Vano kineerewuutthattusa mutundu muullupalli ni wamasiva okhwaranya alliwaalla.”

¹³ Koma Mose aawaakhulla Apwiya wi, “Ddennddathi Aiguputo eneeroddiiwa vawi tti nyuwaano mwaakhumihalle athu yaalla mu ellapo ya Iguputo.

¹⁴ Vano Aiguputo eneerewaatthopoollella athu a mwiillaponimmu. Alliwa ahiiwa khalle wi nyu Apwiya muri variyari va athu yaalla nave munnawooneyella vamiitthoni ni vamiitthoni nave murapwaanyu onnaakhuneella. Otthaana munaahoollella ni opoto amurapo nave mahiiyu munaahoollella ni opoto amunllo.

¹⁵ Vano mwawiipha nimodda athu attheenaalla, mitundu ddimodda nnddo ddiiwalle epillaanyu ddineerollota wi,

¹⁶ ‘Apwiya yaawiiphella athwaalla mu echipululu ekaamba yawi kheyaawonre waavollochiha mu ellapo eyo yallupenlliiwa waavaha wi ekhalle yayiwa.’

¹⁷ Vano Apwiya kinuuvekani wi moonihe wi wunnuwa wa masivaanyu wonanko mmo mwallotelleenyu wi,

¹⁸ ‘Apwiya tti oohisha murima mwawaakuva, tti ooddalla ni echikondi yoohisintheya nave tti ookhululukella ddoonanara ni machimo. Komave khenaakhullella wi oochimwa ahillakiwe. Koma tti oohihiyerera oochimwa nave ennaallaka anamwani ni edduullu ekaamba ya machimo a makhollwiiwa ophiyera mbado waneeraru ni waneesese.’

¹⁹ Kinnuuvekani wi mwaakhululukelle athu yaalla moollikana ni wunnuwa wa echikondaanyu yoohisintheya navettho ekaamba yawi mookhalla mwaakhululukellaka waambeella o Iguputo ophiyera ollello.”

²⁰ Apwiya yaallota wi, “Kohaakhululukella ekaamba ya mawaawo.”

²¹ Koma ddawoona kinimallupella vamiitthoni vaka navettho va ntitimiho naka niddanlle ellapo yavatthi,

^22-23 khaavo naari mmodda oyo anaavollowe mwiillaponimmo. Athu yaalla yahoona ntitimiho ni ezizindikiro nnddo keerilleemi o Iguputo ni muchipululunimmu koma yaakeesa olendo khumi woohiiwellella mawaaka. Mwa ayo yakikhootille khaavo naari mmodda anaavollowe mwiillaponimmo eyo kalonjezilleemi waavaha.

²⁴ Koma ekaamba yawi Kalebe oorumeyellaaka ookhalla ni murima woohiyana ni amodda nave ookithwara ni murimaaye muttheene, kineeromwaakhullella wi avollowe mu ellapo eyo ayizondilleeye. Nave eneerokhalla ya edduullu ddaye naari Aamaleke ni Akanani enakhalla mutapo mwemmo.

²⁵ Osiisello muhokollweelle ochipululuni oyeella mu ettilla ya mukhwipi mwa Enyanja Yoofiira.

Apwiya enaallaka athu ekaamba ya owinya

²⁶ Apwiya yaamukoha Mose ni Aroni wi,

²⁷ “Ethiyo athu oonanara ddiiddaalla enaahiye niini okiinyullulla? Kohiiwa wiinyullulla wiwa nko enakeerelliiwa.

²⁸ Waalleelle wi Apwiya enallota wi, ‘Kinimallupella wi nnddo kiiwalleemi tti nnddo kinaaweerelleemini.

²⁹ Mitembo ddanyu ddinaakhalle ddiri millumillu mu echipululummu. Athu attheene yeerengiwe waambeella a miyakha 20 oya muhoollo ayo yakiinyullullalle,

³⁰ khaavo naari mmodda oyo anaavollowe mu ellapo eyo kallupenlleemi wi muneerovollowamo omupatula Kalebe mwaana a Yefune ni Yoswa mwaana a Nuni.

³¹ Aniinyu ayo mweereenyu eneerophariwa okaporo, kineerowaavollochiha mwiillaponimmo nave sika enaayidduwelle ellapo eyo munayivevulleenyu.

³² Koma nyuwaano mitembo ddanyu ddinaakhalle ddiri millumillu mu echipululummu.

³³ Aniinyu eneerokhalla abusa mu echipululu miyakha 40 nave eneerohoowa ekaamba ya ohiroromelleya wanyu ophiyera mumanlle okhwa mu echipululu.

³⁴ Muneerollakiwa wa miyakha 40 ekaamba ya machimwaanyu. Orive muyakha oniimellelleke nllapo nimodda na mallapo ayo mwazondilleenyu ellapo. Muneerodduwella woopiha wiwa kuushellani murima.’

³⁵ Mi Apwiya koollota. Ddenndda kineereweera wa athu oonanara alla etthukumanne wi ekiinyullulle. Enaakhwelle mu echipululu mwemmu nave enaamallelle mwemmu.”

³⁶ Athu alle Mose aarumalleeye wi yazonde ellapo ewiillewo, amodda yahaamba oweeriha athu wi emwiinyullulle Mose vawaalleellani ddoonanara dda ellapweeyo.

³⁷ Athu attheene ayo yatthopoolla ddoonanara dda ellapweeyo yaakhwa ni mullilli vamiitthoni va Apwiya.

³⁸ Koma mwa athu ayo yayiille woozonda ellapwaalle, Yoswa mwaana a Nuni ni Kalebe mwaana a Yefune, sika yahanlle ni okumi.

Ovollowa wawaamba

³⁹ Mose ahaalleella Aisraele mawu mattheenaalla nave athu yahinlla wunchichi.

⁴⁰ Yaapeha ohinase nave yaawella oya o echigawo yamiyaango enallota wi, “Hi nookhozeka ophiyera onipuroni nko Apwiya yanilonjezilliiwa vawi noochimwa.”

⁴¹ Koma Mose aallota wi, “Kaambiiwa tini muhiniiwellelleenyu lamulo na Apwiya vawi ddennddo kheddiworeya.

⁴² Muhiyeewo kaambiiwa muneerewiiphiwa vamiitthoni va adanaanyu vawi Apwiya kheri ni nyuwaano.

⁴³ Wenko muneerokumana ni Aamaleke ni Akanani nave muneerewiiphiwa vakhotoni. Apwiya khekhalla ni nyuwaano kaambiiwa moohiya waathwara.”

⁴⁴ Koma alliwa yaayaawove moohipwathawo, ewella o ellapo yamiyaango naari yahithaanane ni nibokosi na echipangano na Apwiya apaalle Mose voovenyani vamisasanimvo.

⁴⁵ Vano Aamaleke ni Akanani ayo yakhalla mu echigawo yamiyaangweeyo, yaakittha nave yahaagonjiha ni owiikariha ophiya o Horoma.