Nehemiya 9 - Mawu a Mulluku

Athu enawulula machimwiiwa

^1-2 Vano va nllapo na 24 na mweeri yoolla, Aisraele attheene yaatthukumana wi ehalle ocha, ewanre mathumba ni wiihella nthupi m'muruni. Nave Aisraele yahiipatula variyari va alleto attheene nave enawulula machimwiiwa ni ddoonanara dda makhollwiiwa.

³ Nave athu attheene yahiimella va nipuro nimoddamoddave nenno wa maora mararu malamulo a Apwiya Mullukwiiwa yeerengiwiiwa nave wa maora mararu mamodda yaawulula machimwiiwa yaallapella Apwiya Mullukwiiwa.

⁴ Va nttattha namiteekho na Alevi, vahiimella Yeshuwa, Bani, Kadimiyele, Shebaniya, Buni, Sherebiya, Bani ni Kenani nave yaavekella mookhuwa wa Apwiya Mullukwiiwa.

⁵ Vano Alevi monga Yeshuwa, Kadimiyele, Bani, Hashabuneiya, Hodiya, Shebaniya ni Petahiya yaallota wi, “Ngavenyani naatitimihe Apwiya Mullukwaanyu enthawi ddittheddene. Nidalisiwe nnddina niwa nootitimiheya nno ninawellihiwa okhwaranya madaliso ni ollapella wutthewene.”

Ovekella woowulula machimo

⁶ Nave Aisraele yaavekella wi, “Nyeeneve sika muri Apwiya. Mwaaphatusa oddullu ni etheneeri ddooddullu. Mwaaphatusa ellapo yavatthi ni enyanja ni ddittheddene ddiri mwemmo mwaaddivaha okumi. Ddittheddene ddooddullu ddinnuukokhorellani ddinuullapellani.

⁷ Nyu Apwiya Mulluku, mwaamutthoolla Abramu, mwaamukhumiha o Uri a o Babiloni, mwaamusintha nnddina naye akhalla Abrahamu.

⁸ Mwahoona wi aari oororomelleya wa nyuwaano sika mwaakeraatthiha echipangano. Mwaalonjeza wi muneeromuvaha ellapo ya Akanani, Ahiti, Aamori, Aperezi, Ayebusi ni Agirigashi wi ekhalle ellapo eyo munaakhalleke edduullu ddaye. Sika mookwakhwaniha lonjezo nanyu vawi nyuwaano tti oolungama.

⁹ Mwahoona ohoosiwa wa makhollwaahu o Iguputo, mwahiiwa winlla wiwa va Enyanja Yoofiira.

¹⁰ Mwaheera ezizindikiro ni ddoottikhiniha ddoomuvaanyihana Farao, allupa muttekwaaye ni athu attheene a mwiillaponi mwaye vawi mwaadduwella mmo aahooselleeye makhollwaahu. Sika ekaambiiwa epillaanyu evuwalliiwa ophiyera ollello.

¹¹ Mwaayikawa enyanjeeyo variyari alliwaayo yoonaka wi ellapuwe vawumma nave mwahaavokhella m'maaddini oowallamella ayo yaathwara nave yaapwina wonanko nlluku.

¹² Otthaana, mwaanaahoollella ni murapo, mahiiyu mwaanaahoollella ni munllo.

¹³ Mwaakitthella va mwaango wa Sinai, mullota ni alliwa ovenyera oddullu nave mwahaavaha malangizo, malamulo ni ehuddiho ddaphaama ni ddawoona.

¹⁴ Mwahaahuddiha osunga Sabata naweella nave mwahaavaha malamulwaanyu oweella mwa oorumeyellaanyu Mose.

¹⁵ Yavolliwiiwa ettalla, mwahaavaha buledi ovenyera oddullu yaariiwa ni nthona mwahaavaha maaddi ovenyera munllukuni Mwahaalleella wi yaakhe ellapo eyo mwalonjezilleenyu wi muneerewaavaha.

¹⁶ Koma alliwa ni makhollwaahu yahiitukhulla, yahummiha mirima ddiwa nave kheyaawiiwellelle malamulwaanyu.

¹⁷ Yaakhoota wiiwellella nave kheyuupuwella ddoottikhiniha mweerilleenyu variyari viwa. Yahummiha mirima ddiwa nave yahiitthoollella owaahoollella wi ehokollweellettho wuukaporoni o Iguputo. Koma nyuwaano tti Mulluku ookhululukella, a murima waphaama, eechifundo, oohisha murima mwawaakuva, eechikondi yoohisintheya khemwaawaatathillalle.

¹⁸ Naari yiipangelliiwa nifano na musaanaang'ombe ellota wi, ‘Olla sika Mullukwaahu anikhumihalle o Iguputo,’ nave naari yeerille ddeko ddawuuvevullani dduullupalli,

¹⁹ ekaamba ya echifundwaanyu yuullupalli khemwaahiyalle muchipululuni. Murapo oyo waahoollella otthaana ni munllo waahoollella mahiiyu, khewaavenyillevo.

²⁰ Mwahaavaha munepaanyu waphaama wi waalangizeke. Khemwaawiimanille yoochaanyu ya mana nave mwahaavaha maaddi oowirya wi emallihe nthona niwa.

²¹ Mwahaasunga wa miyakha 40 muchipululuni nave enthawi ettheeneella kheyaarama erive ello. Ddoowara ddiwa kheddaawaahuwalle navettho manyallwiiwa kheyaawiipalle.

²² Mwahaavaha moomwene ni mitundu ddimodda dda athu mwaahiya mu ezigawo ddittheddene. Yahaakhattho ellapo ya Shihoni mwene a o Heshiboni ni ellapo ya Ogi mwene a o Bashani.

²³ Nave mwahaatiha edduullu ddiwa wonanko etheneeri ddooddullu ni waavollochiha mu ellapo eyo mwaalonjezilleenyu makhollwiiwa wi ekhalle yayiwayayiwa.

²⁴ Sika edduullu ddaavollowamo ddaakha ellapweeyo. Mwahaagonjihella athu a mwiillaponimmo, Akanani. Mwahaavelleella mamwene ni athu attheene amwiillaponimmo wi eweerena erive ello enapaalliiwa.

²⁵ Nave yaagonjiha mizinda dduullupalli, yahaakha ellapo ya ethaya yaphaama, enyumba ddooddalla ni ddeko ddittheddene ddaphaama, ehime ddookatakata, emata ddampesa, dda olivi ni dda ezipaso ddimodda. Sika yaanacha, yaanavona mwawi yaananeneva nave yaanahakallalla ekaamba ya ddaphaama ddanyu dduullupalli.

²⁶ Komave athwaanyu yahuuwukilani nave kheyaawiiwellelleni. Yahaareya etulli malamulwaanyu nave yaawiipha anamallotellaanyu ayo yaachenjezille wi erukunuwelle wa wanyuwaano koma yaavirellella wuuvevullani.

²⁷ Sika mwahaavelleella wa adaniiwa ayo yaahoosa. Voohoosiwani yaaninllella wa nyuwaano nave mwaanawiiwa ovenyera oddullu. Nave ekaamba ya echifundwaanyu yuullupalli mwaanaavaha oohoollella ayo yaavullusa m'mattani mwa adaniiwaayo.

²⁸ Yakhalla mwamurendelle, yaanuuchimwellanittho nave mwaanaahiya m'mattani mwa adaniiwa mwawi yaanaalamulella. Komave yarukunuwella ni winllella wa nyuwaano, mwaanawiiwa ovenyera oddullu nave enthawi ddinchichi mwaanawoopolla moollikana ni echifundwaanyu yuullupalli.

²⁹ Mwaanaachenjeza wi yaambeellettho wiiwellella malamulwaanyu yaaniitukhulla nave kheyaawiiwellella. Yaanachimwella malamulwaanyu oovaha okumi wa athu awaasunga. Vano yaanakhootave enummiha mirima ddiwa nave kheyaawiiwellella.

³⁰ Orive muyakha mwaanaavillella nave mwaanaachenjeza ni munepaanyu oweella mwa anamallotellaanyu komave kheyaapella maaru. Sika ekaambiiwa mwaavelleelleenyu m'mattani mwa athu a mu ellapo ddimodda.

³¹ Naari ddaari ddiiddo, ekaamba ya echifundwaanyu yuullupalli khemwaawoonongille apaalle waahiya vawi nyuwaano tti Mulluku aphaama ni eechifundo.

³² Vano sika nyu Mullukwaahu tti Mulluku Amasiva Mattheene ni awoopiha, munnasunga echipangano ekaamba ya echikondaanyu yoohisintheya. Muhivevulle ddoohoosa nnddo ddinimorelle hiyaano, mamwenaahu, enduna ddahu, allupa mukuthwaahu, anamallotellaahu, makhollwaahu ni athwaanyu attheene ovenyera mu enthawi ya mamwene a o Asiriya ophiyera ollello.

³³ Nyu tti oolungama va ddittheddene ddinimorenlle, nyu tti oororomelleya koma hi tti oochimwa.

³⁴ Mamwenaahu, enduna ddahu allupa mukuthwaahu ni makhollwaahu kheyaawiiwellelle malamulo ni malangizo mwawinnyalleenyu.

³⁵ Mwahaavaha ellapo yuullupalli ni ya ethaya yaphaama ekaamba ya ddaphaama ddanyu dduullupalli kheyaawuurumeyelleni nave kheyaahiyalle ddoonanara ddiwa.

³⁶ Ngoonani, hi niri akaporo ollellova mwiillaponi eyo mwaavahilleenyu makhollwaahu wi echeke ezipaso ni emphaso ddaphaama ddittheddene dda mwiillaponimmo.

³⁷ Vano ddoohata ddinchichi ddinaya wa mamwene mwanivelleelleenyu m'mattani mwiwa vawi naachimwa. Aakhalla ni masiva oonilamulella ni eziweto ddahu sika niri mu ddookatamiha dduullupalli.”

Athu enaakhullella echipangano moolemba

³⁸ “Ekaamba ya ddittheddenenndda, ninapaalla neere echipangano yoosimikizeya moolemba nave oohoollellaahu, Alevaahu ni allupa mukuthwaahu aadinda echidindo.”