Masalimo 77 - Mawu a Mulluku

Ohakallalla va enthawi ya ddookatamiha

Wa oohoollella wiipa, voottakihani miipello a Yedutuni. Salimo na Asafu.

¹ Kinninllella moollipiha wa Mulluku, kinnakhuwella wa Mulluku wi akiiwe.

² Va nllapo na ddookatamiha kinnawaashaasha Apwiya, mahiiyu mattheene kinnawelliha mattaaka voovekellani, murimaaka onnakhoota okhurumusiwa.

³ Kaawuupuwellaka dda Mulluku, kinniipullella m'murimani. Kaaganizellaka dda olliye, kinnatathilla murima.

⁴ Munnaphara miitthwaaka wi kihikone, kinnahoowa wunchichi wawi kinnalephela ollota.

⁵ Kinnaganizella dda mallapo akhalle, kinnuupuwella dda miyakha ddakhalle.

⁶ Mahiiyu kinnaganizera m'murimani mwaka, kinniikoha ni waashaasha m'murimani mwaka wi,

⁷ “Ethiyo Apwiya enaakikhoote ophiyera niini? Ethiyo khekeerellattho echifundo?

⁸ Ethiyo echikondiiwa yoohisintheyeelle yoomallesesa? Ethiyo malonjezwiiwa aamallesesa?

⁹ Ethiyo ootiwalla oreera murima waye wulle? Ethiyo oonanariwa waye woohiiha echifundwaayeelle?

¹⁰ Yookivoreya tti yawi, Mulluku Amasiva Mattheene oosintha meerellwaaye.”

¹¹ Nyu Apwiya, kineerewuupuwella mitteko ddanyu, ddawoona, kineerewuupuwella ddoottikhiniha ddanyu ddakhallekhalle.

¹² Kineeroganizera ddaweera ddanyu ddittheddene, kineeroganiza dda mitteko ddanyu ddamasiva.

¹³ Nyu Mulluku, ettilla ddanyu tti ddaweella. Ethiyo ookhallavo mulluku mmodda muullupalli monga Mullukwaahu?

¹⁴ Nyu tti Mulluku oyo aneera ddoottikhiniha, mohooniha masivaanyu variyari va mitundu dda athu.

¹⁵ Ni nnatta nanyu namasiva, mwaawoopolla athwaanyu, edduullu dda Yakobo ni Yosefe.

¹⁶ Nyu Mulluku, maaddi yawoonilliiwani yahoova, ddawoona, enyanja yaatthukumella.

¹⁷ Mirapo ddahiitha maaddi, muddullu mwaagugudeya, osherima waari erive embali.

¹⁸ Onyakulla wa ogugudeya wanyu wahiiweya otthewene, ettari ddanyu ddaawaliha ellapo ettheene, ellapo yavatthi yaatthukumella nave yaatikheya.

¹⁹ Ettillaanyu yaweelle va enyanja, musewaanyu waaweelle vamaaddini oowallamella, nave manyallwaanyu kheyaawooneyille.

²⁰ Mwahaahoollella athwaanyu wonanko enkhosa oweella mwa Mose ni Aroni.