Masalimo 3 - Mawu a Mulluku

Ovekella woohinase wa nikavihero

Salimo na Davide, amuthawille mwanaye Abishalomu.

¹ Nyu Apwiya, adanaaka tti anchichi, athu anchichi ennakiwukila.

² Athu anchichi yaallotaka dda miyaano eni, “Mulluku khanawora omuvullusa.”

³ Koma nyu Apwiya, muri echishangwaaka, nyu sika munakipambaniha, nyu sika muri ookillipiha mwiilli.

⁴ Kinnakhuwella wa Apwiya wi ekiiwe. Alliwa ennakaakhulla ovenyera va mwaangwiiwa waweella.

⁵ Kinnakonaatthi nave kinnakona. Kinnavenya ohinase, vawi Apwiya ennakiseera.

⁶ Nginawoova adanaaka naari eri anchichi, ayo ekaaphenlle ni owana ni miyaano.

⁷ Nyu Apwiya venyani! Nyu Mullukwaaka kivulluseni! Vawi munnawuukutha adanaaka etwaatwara, munnaakhulla miino athu oonanaraayo.

⁸ Opambana wahu onavenyera wa nyuwaano, Apwiya. Madaliswaanyu ekhalle va athwaanyu.