Masalimo 24 - Mawu a Mulluku

Mwene ootitimiheya

Salimo na Davide.

¹ Ellapo yavatthi ni ddittheddene ddiri mwemmo tti dda Apwiya, ellapo yavatthi ni athu ookhalla mwemmo tti ayiwa.

² Vawi tti alliwa yayiikaatthille va enyanja dduullupalli, va mihinje ddoowallamella yaayikeraatthiha.

³ Ttaani anaawelle vamwaangoni wa Apwiya? Ttaani anaawiimelle munipuroni niwa noopatuleya?

⁴ Tti oyo aneera ddaphaama, ari ooreera murima, ahinallapella mafano, ahinallupella moolleka.

⁵ Aneerewaakhella madaliso wa Apwiya, echilungamo wa Mulluku oovullusaaye.

⁶ Athu awi ddiidda sika enaapaallesesa Apwiya, ayo enawa enamullapella Mulluku a Yakobo.

⁷ Millako dda muzinda, hullani! Hullani machiwi akhallaayo wi mwene ootitimiheyooyo avollowe.

⁸ Ethiyo mwene ootitimiheyooyo ttaani? Tti Apwiya oollipa ni amasiva, tti Apwiya oopambana vakhotoni.

⁹ Millako dda muzinda, hullani! Hullani machiwi akhallaayo wi mwene ootitimiheyooyo avollowe.

¹⁰ Ethiyo mwene ootitimiheyooyo ttaani? Tti Apwiya Amasiva Mattheene, alliwa tti mwene ootitimiheya!