Masalimo 113 - Mawu a Mulluku

Otitimiha ophaama wa Apwiya

¹ Aleluya! Nyu oorumeyella a Apwiya, atitimiheni, Titimihani nnddina niwa.

² Riihaani nnddina na Apwiya, waambeella ollello wa enthawi yoohimalla.

³ Nititimiheye nnddina na Apwiya waambeella wookhuma nndduwa ophiyera woovollowa nndduwa.

⁴ Apwiya ennaalamulella athu a mitundu ddittheddene, otitimiheya wiwa tti woorekama okhwaranya wa muddullu.

⁵ Ttaani anaaphwanaphwane ni Apwiya Mullukwaahu, ayo enakhalla woorekamesesa oddullu,

⁶ enawaramella vatthi voowehani eddullu ni ellapo yavatthi.

⁷ Ennamuwelliha muthu oohoowa ovenyera onthupini, Ennamukhumiha oopaneya oddallani.

⁸ Ennamukeraatthiha ni mamwene, mamwene a athwiiwa.

⁹ Ennamweeriha mutthiyana oohiyara opata nibanja, emutthattusa muyepelle oohakallalla. Aleluya!