Mariko 8 - Mawu a Mulluku

Yesu anaachiha athu 4,000

¹ Vihinavire enthawi yoorekama athu anchichi yaatthukumana moomwaapheella Yesu nave athwaayo kheyaari ni yoocha. Sika Yesu aawiithana oohudderaaye allota wi,

² “Athwaalle ennakimoriha ethakaraka kaambiiwa aakhalla ni miyaano mallapo mararu nave khenna ello yoocha.

³ Kaarumiha owaniwa eri ni ettalla eneerongomowella muttilla kaambiiwa evenyenre woorekamella.”

⁴ Oohudderaaye yaamukoha wi, “Tti wuuwi ohakani wuno nineereehu naphwanyewo yoocha yawi naachihe athu attheenaalla?”

⁵ Yesu ahaakoha wi, “Murina mitthi dda buledi mikavi?” Yahaakhulla wi, “Mitthi dda buledi mitthanu ni miilli.”

⁶ Yesu ahaalamula athwaayo wi ekeraatthi vatthi. Vano aakusa mitthi dda buledi mitthanu ni miillinnddo avekella omuthokoza Mulluku, amumeyameya buledooyo. Vano aawinnya oohudderaaye wi emuvelleelle wa athwaayo nave yaheera ddiiddo.

⁷ Yaakhallattho ni ehomba dding'onong'ono ddooyeva. Yesu aavekellattho omuthokoza Mulluku ekaamba ya ehombannddo aalleella oohudderaaye wi eddikawettho wa athwaayo.

⁸ Attheenaayo yaacha, evona. Enyenyeri ddaaddalla mitaanga mitthanu ni miilli.

⁹ Waari athu vakhuviru 4,000. Vano Yesu ahaalleella wi epallalleye.

¹⁰ Enthawi yeeyo aawella mukallawani ni oohudderaaye eya o echigawo ya Dalamanuta.

Oveka echizindikiro

¹¹ Afarisi* amodda yaawa wa Yesu yaamba okohanana ni olliyooyo. Yapaalla omweesa, sika yaamuveka echizindikiro yoovenyera oddullu yawooniha wi Mulluku sika amurumihalle.

¹² Nave Yesu aavuma wuullupalli allota wi, “Kaambiiwa tini athu a mbadoolla enakivekiiwa dda echizindikiro? Ddawoona, kinimuulleellani wi naari yeerevedde echizindikiro khevahiwa wa athu a mbadoolla!”

¹³ Ahaahiya, ahokollweella mu ekallawa, atimulla aya vakhopella va enyanja.

Yisiti a Afarisi ni a Herode

¹⁴ Oohudderaayo yaari etiwanlle wi emukuse buledi ookwanella, sika yaari ni mwitthi wa buledi mmodda mukallawanimmo.

¹⁵ Yesu aallota wa alliwaayo wi, “Muchenjere wunchichi ni yisiti a Afarisi ni a Herode.”*

¹⁶ Oohudderaayo yaakambirana weekhiiwa wi, “Anallota ddenndda kaambiiwa khaninna buledi.”

¹⁷ Yesu aadduwella yakambiraniiwa, sika ahaakoha wi, “Munakambirana ddoohikhalla ni buledi kaambiiwa tini? Khamunadduwelleve ni wiiwesesa? Ethiyo mirima ddanyu tti dda wumma?

¹⁸ Mookhalla ni miittho koma khamunoona? Mookhalla ni maaru koma khamuniiwa? Ethiyo khamunuupuwellave?

¹⁹ Kameyameyilleemi mitthi dda buledi mitthanu waachiha athu 5,000 mwaddallihalle mitaanga ddikavi dda ddoohalla?” Yahaakhulla wi, “Khumi ni miilli.”

²⁰ “Nave kameyilleemi mitthi dda buledi mitthanu waachiha athu 4,000 mwaaddallihalle mitaanga ddikavi dda ddoohalla?” Yahaakhulla wi, “Dditthanu ni miilli.”

²¹ Vano ahaakoha wi, “Khamuniiwesesave?”

Yesu anamuchiriha muthu oohoona o Betisaida

²² Yaawa o Betisaida nave wenko athu amodda yaawaana muthu oohoona wa Yesu, emuveka wi amuttannye wi amuchirihe.

²³ Yesu aamuphara nnatta oohoonooyo amukusella otte wa muzi. Nave aattapha mare ahella m'miitthoni mwa muthooyo, iiyaatthi mattaaye va muthooyo, amukoha wi, “Onoona tini?”

²⁴ Muthooyo aaweha allota wi, “Kinawoona athu koma enooneya wonanko miteekho ddaweeteeta.”

²⁵ Vano Yesu aattannyattho miittho a muthooyo. Enthawi yeeyo muthooyo aakhunuulla miittho, aachirihiwa nave aanoona phaama ddene.

²⁶ Yesu aamurumiha owaniwa allota wi, “Ohihokollweellettho m'muzi mulle.”

Petro anasimikizella dda Yesu

²⁷ Vano Yesu ni oohudderaaye yaaya m'mizi ddawaatamella etawoni ya Kaisareya Filipi. Eri muttilla ahaakoha wi, “Athu enallota wi miyaano kiri aani?”

²⁸ Yaamwaakhulla wi, “Amodda eni ‘Yohane Oobatiza,’ amodda eni ‘namallotella Eliya’ nave amodda eni ‘mmodda a anamallotella amodda.’ ”

²⁹ Vano ahaakoha wi, “Nyu munihina miyaano ttaani?” Petro ahaakhulla wi, “Nyu tti Mesiya.”*

³⁰ Nave Yesu ahaalamulella wi, “Muhimulleelle arive muthu dda miyaano.”

Yesu anallota wowaamba dda okhwa waye

³¹ Yesu ahaamba waahuddiha oohudderaaye wi tti woopaalleya wi olliyooyo, “Mwaana a Muthu, aneerohoosiwa wunchichi ni okhootiwa ni attekweene a Ayuda,* allupa mukutho uullupalli ni ahuddihi a malamulo* nave aneerewiiphiwa koma vavira mallapo mararu aneerovenya wa ookhwa.”

³² Ahaalleella ddeko ddenndda mowiiweya phaama. Vano Petro aamukusella vakhwipi aamba omuhumullulla.

³³ Koma Yesu aarukunuwa, aaweha oohudderaaye nave aamusimwella Petro allota wi, “Okivenyerevo, Satana! Maganizwaawo khenavenyera wa Mulluku koma wa athu.”

³⁴ Nave Yesu aaddiithanella mulloko wa athu ni oohudderaaye aalleella wi, “Muthu aapaallaka okithwara iikhoote yeekhaaye, atukhulle mutandaaye akithware miyaano.

³⁵ Vawi muthu aapaallaka ovullusa okumaaye, eneerowutathilla nave atathilla okumaaye kaambiiwa annakithwara miyaano nave ni ekaamba ya othenga waphaama, aneerewuuvullusa okumaayooyo.

³⁶ Muthu anaapindulevo tini aakhella ellapo yavatthi ettheene atathilla okumaaye?

³⁷ Apaalle muthu anaavelleelle tini wi ahokolloselliwe okumaaye?

³⁸ Muthu aawulliwaka muru ekaamba ya miyaano ni mawaaka wa athu a mbadoolla, ooraruwa ni oochimwa, vano mi, Mwaana a Muthu, kineerowulliwa muru ni olliye kaawaaka mu ntitimiho na Attiitthaaka ni angelo aweella.”