Luka 7 - Mawu a Mulluku

Echikhulupililo ya akhoto a o Roma

¹ Yesu amallihalleeye waahuddiha athwaalle, aaya o Kaperenao.

² Wenko waakhalla akhoto muullupalli a o Roma, oyo aari ni kaporwaaye aamukondilleeye oyo aavoriiwalle ohalla vang'ono okhwa.

³ Akhotooyo iiwalleeye dda Yesu, aamurumihella attekweene amodda a Ayuda wi yamwiithane amuchirihe kaporwaayooyo.

⁴ Yaphiyalliiwa wa Yesu, yaamuveka moollipihella wi, “Muthu anirumalloolla anaphwanella wi mumukavihere.

⁵ Vawi annaakonda Ayuda nave aanimakellattho enyumba yamavekello.”

⁶ Sika Yesu ahaathwara athwaayo. Aariiye vakhuviru ni enyumba, akhoto muullupallooyo anaarumihattho akhwaaye wa Yesu emulleella wi, “Apwiya, muhihoowe nginaphwanella wi muvollowe mpa mwaka.

⁷ Naari miyaano nginaphwanella wi koonane ni nyuwaano koma mweere moona ollota mawuve nave kaporwaaka aneerochira.

⁸ Vawi miyaanottho kookhalla ni uullupallaaka ookilamulella nave nameene kookhalla ni akhotwaaka kinaalamulelleemi. Kallota wa mmodda wi, ‘Rowa,’ annarowa, kallotattho wa mmodda wi, ‘Ngawa,’ annawa nave kamulleella kaporwaaka wi, ‘Ngeera ella,’ anneera.”

⁹ Yesu iiwalleeye ddenndda aattikhina nave aarukunuwa allota wa mulloko wa athu wamuthwarooyo wi, “Kinimuulleellani wi ngimuphwanyille muthu mu Israele a echikhulupililo yuullupalli wonanko yeella.”

¹⁰ Amurummwaayo yaahokollweella o enyumba ya akhotooyo nave yamphwanyille kaporooyo achirihiwe.

Yesu aamuvenyiha muthu ookhwa

¹¹ Vatulli viwa Yesu aaya o etawoni yooromolliwa Nayini. Oohudderaaye ni mulloko wa athu anchichi waamuthwara.

¹² Aphiyalleeye vamullakoni wa etawoneeyo, aakumana ni athu emutukhullalle muthu ookhwa ekhumakana. Muthu ookhooyo aari mwaana aamullopwana yooyove anaamukhwelle. Nave mulloko wa athu anchichi a o etawoninko waarina nimodda.

¹³ Apwiya yamoonilliiwa mutthiyana ookhwelliwooyo yaammorella ethakaraka, ellota wi, “Maalla.”

¹⁴ Vano Yesu aawaatamella nave attannya nibokosi na malironno nave athu yatukhunllaayo yahiimella. Nave Yesu aallota wi, “Musombwe we, kinimuulleella wi ovenye!”

¹⁵ Nave muthu ookhooyo aavenya aamba ollota nave Yesu aamuvelleella wa amennya.

¹⁶ Athu attheene yahoova, yaamba omutitimiha Mulluku ellota wi, “Namallotella ohooneya variyari vahu! Mulluku oowa wi aavulluse athwaaye!”

¹⁷ Nave epilli yeella ya Yesu yaavuwa yiiweya mu Yudeya mutthemwene ni omapuroni mattheene owaatamella.

Yesu ni Yohane Oobatiza

¹⁸ Yohane alleelliweeye ni oohudderaaye ddeko ddittheddene Yesu eereeye, aawiithanavo eelli.

¹⁹ Ahaarumiha wa Apwiya wi yamukohe wi, “Ethiyo nyuwaano tti oyo ninamutiyeraahu wi awe apaalle nimutiyereke mmodda?”

²⁰ Yaphiyalliiwa wa Yesu, yaallota wi, “Yohane Oobatiza ooniruma wi nuukoheni wi ethiyo nyuwaano tti oyo ninamutiyeraahu wi awe apaalle nimutiyereke mmodda?”

²¹ Enthawi yeeyo Yesu ahaachiriha athu anchichi oovoriiwa ereta ddoohiyanahiyana nave aakhumiha minepa ddoonanara nave aawooniha athu oohoona anchichi.

²² Yesu aawaakhulla oorumiwa a Yohane wi, “Hokollowani mwamulleelle Yohane dda ddeko mwiiwalleenyu ni moonilleenyu. Oohoona ennoona, ooheeta enneeta, athu amakate enneellihiwa, oohiiwa enniiwa, ookhwa ennavenyihiwa navettho othenga waphaama onnallalleyiwa wa athu oohoowa.

²³ Nave oodalisiwa tti ayo ehinakhumuwa ni dda miyaano!”

²⁴ Oorumiwa a Yohanaayo etimullalle, Yesu ahaamba ollota dda Yohane wa athwaalle wi, “Ethiyo mwayiilleenyu wa Yohane mu echipululu, mwapaalla moonewo tini? Muthu otikheyatikheya ni ephevo wonanko epango?

²⁵ Ddaahiri ddiiddo, vano mwayiillewo wi moonewo tini? Muthu oowara ddoowara ddookotana? Iyaayi, athu oowara mwawi ddiidda eyaaka omachellelloni enakhalla mu enyumba dda mamwene!

²⁶ Vano mwayiillewo wi moonewo tini? Namallotella? Ddawoona, kinimuulleellani wi mwaamoonillewo ookhwaranya namallotella.

²⁷ Vawi mawu a Mulluku enallota dda Yohane wi, ‘Kineeromurumiha amithengaaka vahoollo vanyu wi allime musewu wa nyuwaano.’

²⁸ Kinimuulleellani wi khaavo muthu ooyariwa vatthimva ari muullupalli omukhwaranya Yohane. Koma oyo ari mung'onong'ono mu omwene wa Mulluku sika ari muullupalli omukhwaranya olliyoolla.”

²⁹ (Athu anchichi yaamwiiwellella Yohane naari ookhomiha misonkho yahaakhullella ddoopaalla ddaphaama dda Mulluku voobatiziwani ni Yohane.

³⁰ Koma Afarisi* ni ahuddihi a malamulo* kheyawakhullenlle ddoopaalla dda Mulluku vookhootani obatiziwa ni Yohane.)

³¹ Yesu aallotave wi, “Vano kinaaphwanaphwanihere ni tini athu a mbadoolla? Tti wonanko tini?

³² Enaphwanaphwana ni anamwani ookhalla mu misika. Amodda ekhuwaka wa akhwiiwa wi, ‘Naawiipellani machipo a okwati koma nyuwaano khamwaawiinalle! Naawiipellani machipo a maliro koma nyuwaano khamwaawinllalle!’

³³ Yohane Oobatiza awiilleeye, aahalla ocha* ni oohimuwirya vinyo nave mwaamullotella wi, ‘Ookhalla ni munepa woonanara’

³⁴ Mi, Mwaana a Muthu, kiwiille kaacha ni omuwirya vinyo nave mwaallota wi, ‘Ngamooneni, muthoolla tti oottutthuwa, oolezela, akhwaayettho tti ookhomiha misonkho ni amodda oochimwa!’

³⁵ Komave ezeru dda Mulluku ddinooneya wi tti ddawoona vawoonani athu ayo yaakhullenlle.”

Yesu mpa mwa Simoni Mufarisi

³⁶ Mmodda a Afarisi aamwiithana Yesu wi achena owaniwa nave Yesu aayaawo avollowa mpa, akeraatthi wi ache.

³⁷ Mu etawoni yeeyo mwaakhallattho mutthiyana oochimwa. Iiwalleeye wi Yesu ammacha mpa mwa Mufarisi aakusa yookusella makhura a nthuko naphaama awaana.

³⁸ Nave ahiimella vakhuviru ni manyallo a Yesu, aninlla nave aamba onaaniha manyallo a Yesu ni miitthori. Vano aapukuta manyallwaayo ni meehaaye nave ooniha olemu vookhupaarellani manyallwaayo nave aazoza makhura a nthuko naphaama.

³⁹ Vano Mufarisi amwiithanne Yesoolle oonilleeye ddenndda, aallota yeekha wi, “Muthu yoolla akhanllenke namallotella awoona, aaweromudduwella mutthiyana anamuttannyoolla wi ttaani vawi tti oochimwa.”

⁴⁰ Koma Yesu aallota wa olliyooyo wi, “Simoni kookhalla ni ello yawi kuulleelle.” Simoni ahaakhulla wi, “Ahuddihi, killeelleni.”

⁴¹ Yesu aallota wi, “Waakhalla athu eelli yakongonle makobiri wa mullupa ookongoliha. Mmoddooyo aakongonle makobiri manchichi, mmoddooyo makobiri ooyeva.

⁴² Koma kheyaarina yoohokollosella, sika ahaakhululukella attheenaayo. Vano ttaani mwa eellaalla anaamukonde mullupa ookongolihooyo?”

⁴³ Simoni ahaakhulla wi, “Kineesa oyo akongonle ddawaatooyo.” Nave Yesu aallota wi, “Wohaakhulla phaama.”

⁴⁴ Vano aamuweha mutthiyanoolle allota ni Simoni wi, “Onnamoona mutthiyanoolla? Miyaano kaavollowa mpa mwawo nave khamwaakivahille maaddi oohuwella manyallo. Koma olliyoolla oohuwa manyallwaaka ni miitthori ddaye nave oopukuta ni meehaaye.

⁴⁵ Khawaakaakhenlle mookikhupaarella koma olliyoolla khahiyalle okhupaarella manyallwaaka waambeella enthawi kavollowilleemi mmu.

⁴⁶ Khawaazozille ni makhura omuruni waka koma olliyoolla oozoza manyallwaaka makhura a nthuko naphaama.

⁴⁷ Vano kinallota ni weyaano wi echikondi yinchichi eyo oonihelleeye, tti omboni wawi machimwaaye manchichaayo aakhululukiwa koma ayo ekhululukelliwe vang'ono enoonihattho echikondi yooyeva.”

⁴⁸ Nave Yesu aallota wa mutthiyanooyo wi, “Machimwaawo aakhululukiwa.”

⁴⁹ Vano ayo yacha vamodda ni Yesu yahaamba ollota weekhiiwa wi, “Muthu yoolla ttaani anakhululukellattho machimo?”

⁵⁰ Nave Yesu aallota wa mutthiyanooyo wi, “Echikhulupilwaawo yohuuvullusa, rowa ni murendelle.”