Luka 12 - Mawu a Mulluku

Yisiti a Afarisi ni Asaduki

¹ Vano athu anchichi yatthukumanniiwa, wawi yaananyingallana, Yesu aallota vawaamba wa oohudderaaye wi, “Muchenjere ni yisiti a Afarisi,* kinaaka dda woottha wiwa.

² Erive ello yawiipittheya vano eneerewuupullulliwa navettho erive yookhuweya eneerodduwanyeya.

³ Vano ddittheddene munalloteenyu mwiipiphini ddineerewiiweya vawooneya nave erive ello munanong'oneenyu mookhuweya mpa mwanyu omullakoni muwanllewo, ddineerollalleyiwa vaddullu va enyumba.

Oophwanella wooviwa

⁴ “Kinimuulleellani, akhwaaka wi muhinawoovaka ayo eniipha mwiillive oohikhallattho ni yaweera yookhwaranya vaavo.

⁵ Kineerewuutthoonyiherani oophwanella omoova. Mumooveke Mulluku oyo iipha mwiilli annakhallattho ni olamulello womuvokha muthu mu gehena. Kikhulupilileni miyaano, kinimuulleellani ddawoona wi yooyo sika munaphwanelleenyu wi mumooveke!

⁶ “Munnawora okulla epallame dda kattiitti dditthanu ni makobiri meelli. Nave naari emodda khenatiwalliwa vamiitthoni va Mulluku.

⁷ Naari meehi mattheene a m'muruni mwanyu aheerengiwa. Sika muhooveke, nyuwaano tti oopaalleyathi wunchichi ohiyana ni mulloko wa akattiitti anchichi!

Omwaakhullella apaalle omukhoota Khrisitu

⁸ “Kinimuulleellani nyuwaano, muthu anaakhullella wi tti aaka vamiitthoni va athu, miyaanottho Mwaana a Muthu, kineeromwaakhullella vamiitthoni va angelo a Mulluku.

⁹ Koma oyo anaakirune vamiitthoni va athu miyaano kineeromurunattho vamiitthoni va angelo a Mulluku.

¹⁰ “Nave arive muthu anakillotella epewe, mi, Mwaana a Muthu, ttuuworeya okhululukelliwa koma oyo anallotella epewe Munepa Waweella khakhululukelliwa.

¹¹ “Yaawuukusakani wi yawiipeni millatu mu enyumba ddamavekello* apaalle wa attekweene oolamulella, muhikhupanyeke wi munaaye mwallote tini apaalle munaallote mwawiidde.

¹² Vawi Munepa Waweella sika anaawuuhuddiheni yoophwanella ollota enthawi yeeyo.”

Niphwanaphwaniho na muthu eeyuuma ookarangeya

¹³ Muthu mmodda a m'mullokonimmo aallota wa Yesu wi, “Ahuddihi, mulleelleni mwanamunnaka akikawelle eyuuma yoohiyiwa ni attiitthiihu.”

¹⁴ Koma Yesu aamwaakhulla wi, “Muthuwe, akivahille mutteko wookamulla millatu ddanyu ttaani apaalle wi kuukawelleni eyuuma yoohiyiwa?”

¹⁵ Nave aallota wi, “Chenjerani, muhikhalle a nrima vawi okumi wa muthu khonallikana ni waata wa ddeko ariiyena naari arina eyuuma yinchichi.”

¹⁶ Vano ahaalleella niphwanaphwaniho, nawi, “Emata ya muthu eeyuuma mwaakhalla ddoohata ddinchichi.

¹⁷ Vano aallota yeekha wi, ‘Kineere tini vano vawi nginna ekhokwe yoohiyamo ddoohata ddaka?’

¹⁸ Nave aallota wi, ‘Kinaweere ddiidda, kineerokumulla ekhokwe ddaka, kimake dduullupalli, kihiyemo ddoohata ddaka ni eyuumaaka.

¹⁹ Vano kineerollota wa murimaaka! Wookhalla ni ddeko ddookwakhwana miyakha ddinchichi. Sika ithuuwa, oche, owirye, ohakallalle.’

²⁰ Nave Mulluku aallota wa olliyooyo wi, ‘Muthu ookarangeya we! Mahiiyu vaava okumaawo oneeromalla, ttaani anaavahiwe ddeko ddittheddene odduukellenlleewe weekha?’ ”

²¹ Voomallihani Yesu aallota wi, “Ddinaakhalle ddiiddo ni athu oodduukellellella weekhiiwa eyuuma koma khenakhallattho allupa a eyuuma vamiitthoni va Mulluku.”

Muhikhupanyeke

²² Vano Yesu aallota ni oohudderaaye wi, “Sika tti kaambiiwa kinuulleelleemini nyuwaano wi muhikhupanyeke dda okumaanyu wi munaache tini apaalle dda mwiillaanyu wi munaaware tini?

²³ Vawi okumi onnakhwaranya yoocha. Navettho mwiilli onnakhwaranya yoowara.

²⁴ Ganizerani dda anakhuku, khenamidda mmiddo apaalle otthukumaniha ddoohata, kheyinna moosungella apaalle ekhokwe koma Mulluku annaachiha. Nyuwaano munnapaalleya wunchichi ohiyana ni epallame.

²⁵ Ttaani a nyuwaano anaanjerere okumaaye nllapo nimodda vookhupanyani?

²⁶ Mwaahiworaka weera dding'onong'ono wonanko ddenndda, munakhupanyellati ni ddeko ddimoddannddo?

²⁷ Ganizerani wunnuwa wa malluwa a muhakani, khenaphara mutteko apaalle wiisowella weekhiiwa ddoowara. Nave kinimuulleellani nyuwaano wi mwene Solomoni ni eyuumaaye ettheene ariiyena, khaarina ddoowara ddooreera wonanko nimodda na malluwaalla.

²⁸ Mulluku sika anareeriha manasi a muhakani ayo enakhallavo ollellove koma osiisello enavokhiwa viikho. Nyu athu eechikhulupililo yooyeva. Olliyoolla khawora wuuwarihani nyuwaano?

²⁹ “Sika muhinakhupanyaka wi munaache tini apaalle munaawirye tini apaalle ddeko ddimodda.

³⁰ Athu oohimullapella Mulluku, Attiitthaanyu, ennakhupanya dda ddeko ddenndda. Attiitthaanyu ennadduwella wi munnapaalla ddeko ddittheddenenndda.

³¹ Koma yawaamba mwaashaasheke omwenaaye nave aneerewuuvahani ddeko ddenndda.

Dda eyuuma yooddullu

³² “Muhoove, nyuwaano ayo muri wonanko mulloko wa enkhosa ddooweerengeya vawi Attiitthaanyu yaakonda wi yuuvaheni omweniiwa.

³³ Kullihani ddeko ddanyu ddittheddene nave makobiraayo mwaavahe oohoowa. Mwiiphwanyelle mathumba a eyuuma ayo ehinaahuwa ni wiisungella eyuuma oddullu nko ehinayevawiiwa kaambiiwa allupaawiiya khenaphiyawo naari enjenjete khaddinoononga.

³⁴ Vawi wenko onakhalla eyuumaawo, murimaawo onakhallattho wenko.

Mullupa mutteko ootiyera

³⁵ “M'makelleni laamba okhozekella mutteko nave enyali ddanyu ddikhareke,

³⁶ nave mukhalle wonanko allupa mutteko ayo enamutiyera pwiiwa ovenyera o ehakallallo yookwati. Aphiya nave ookotha nchiwi, eneeromuhullella enthawi yeeyo.

³⁷ Oodalisiwa tti allupa mutteko ayo pwiiwa aawaaka anaaphwanyeeye ehinakone, emutiyeraka! Ddawoona, kinimuulleellani wi, pwiiwooyo aneerom'makella laambaaye, aakeraatthiha voochella nave aamba waarumeyella.

³⁸ Oodalisiwa tti allupa mutteko ayo pwiiwa anaaphwanyeeye etiyeraka naari awaaka variyari va mahiiyu apaalle naari oyaaka ni osa.

³⁹ Nave munnadduwellattho wi mwaneena a enyumba adduwenlleke enthawi yooweella mullupaawiiya, aaweerotiyera wi mullupaawiiyooyo ahikhuvulle enyumbaayeeyo.

⁴⁰ Nyuwaanottho mukhozeke kaambiiwa va enthawi eyo muhinadduwelleenyu mi, Mwaana a Muthu, kineeroowa.”

Dda mullupa mutteko oororomelleya ni mmodda oohiroromelleya

⁴¹ Petro aallota wa Yesu wi, “Apwiya niphwanaphwanihonna munallota wa hiyaano apaalle wa athu attheene?”

⁴² Apwiya yahaakhulla wi, “Ttaani ari mullupa mutteko oororomelleya ni eezeru? Tti oyo apwinnya enaamutthoolliiwa wi aawehereke allupa mutteko attheene a mpa mwaye ni waavaha ddoocha va enthawi yaphaama.

⁴³ Oodalisiwa tti mullupa mutteko oyo apwinnya yaawaaka enaamuphwanyiiwa eeraka ddawi ddiidda.

⁴⁴ Ddawoona, kinimuulleellani wi aneeromweera mullupa mutteko yooyo wi awehereke ddeko ddaye ddittheddene.

⁴⁵ Koma mullupa muttekooyo allota m'murimani mwaye wi apwinnya emmaselliwawo, aamba owuukutha allupa mutteko akhwaaye, aallopwana ni aatthiyaneene navettho anacha, anawirya ni olezela,

⁴⁶ vano apwinnya a mullupa muttekoolle eneerophiya va nllapo nno ahinamutiyereeye ni va enthawi eyo ahinadduwelleeye. Apwinnyaalle eneeromuphaddaphadda nave eneeromullaka wonanko athu oohikhulupilila.

⁴⁷ “Mullupa mutteko oyo anadduwella ello apwinnya enapaalliiwa wi eere koma khanakhozeka weera nave khaneera, aneerewuukuthiwa mwawoopiha.

⁴⁸ Koma mullupa mutteko oyo ahinadduwella ello apwinnya enapaalliiwa wi eere nave eera ddoophwanella ollakiwana, aneerewuukuthiwa vang'ono. Nave muthu avahiwe ddeko ddinchichi aneerohokollosa ddinchichi nave muthu avahiwe ddawaatesesa aneerohokollosa ddawaatesesa.”

Dda murendelle ni okawaneya wa athu

⁴⁹ Yesu aallotattho wi, “Kawiille wi kikharihe munllo va ellapo yavatthi nave kaawerohakallalla wakharihiweke khalle.

⁵⁰ Kinapaalleya ovollowa mu ddoohoosa wonanko mmo muthu anavolloweeye m'maaddini aabatiziwaka. Nave murimaaka onnahoosiwa ophiyera omanlle.

⁵¹ Muhiganize wi koowa wi kuuvaheni murendelle va ellapo yavatthi. Naari mano, ngaawiille wi kuuvaheni murendelle koma wi kiweena okawaneya wa athu.

⁵² Vano nibanja na athu atthanu nineerokawaneya; araru eneerokokangana ni eelli nave eellaayo eneerokokangana ni ararwaayo.

⁵³ Oneerokhalla okawaneya variyari va attiitthiiwa ni aniiwa aallopwana, anamwani aallopwana ni attiitthiiwa, amoowe ni aniiwa aatthiyana, anamwani aatthiyana ni ameewa, akwegwawo ni avokohiiwa nave avokohi ni akwegwawiiwa.”

Wiiwesesa dda enthawi

⁵⁴ Yesu aallotattho wi, “Moona murapo ovenyeraka woovollowa nndduwa, munnallota wi, ‘Murimu aneerorupa’ nave ddinneereya.

⁵⁵ Nave moona ephevo yoopaka ovenyera omwera munnallota wi, ‘Oneeroviha ollello’ nave ddinneereya.

⁵⁶ Nyu awoottha, munnadduwella ollotella wooneya wooddullu ni ellapo yavatthi koma khamunawora ottaphullella ezizindikiro dda enthawi yeella. Munnadduwella ollotella wooneya wa va ellapo yavatthi ni oddullu koma kaambiiwa tini muhinadduwellaanyu ottaphullella wa enthawi yamuttano?

Waattana ni adanaanyu

⁵⁷ “Kaambiiwa tini muhinaganizeenyu nyookha yoophwanella weera?

⁵⁸ Muthu uukusella vanthatoni namillatu amba weeseesa waattana ni oyo uusumenlle mwawaakuva. Waaheera ddiiddo aneerewuuvelleella wa aweeruza nave ooweeruzooyo aneerewuuvelleella wa akhoto wi akhotooyo uuhiye mundende.

⁵⁹ Kinimuulleella wi khokhuma ophiyera ollivenlle makobiri mattheene.”