Levitiko 4 - Mawu a Mulluku

Mukutho woopepesella machimo oohikhalla aphudda

¹ Apwiya yaallota ni Mose wi

² aalleelle Aisraele wi, “Arive muthu anachimwa apaalle aneera moohidduwella erive ello yoovaanyihiwa ni malamulo a Apwiya, avelleelleke mukutho.

³ “Oochimooyo akhalla mullupa mukutho muullupalli sika oowutthattusa mpingo muttheene okhalla woochimwa. Vano aamuheraatthiki wa Apwiya nankhoro mung'onong'ono eeng'ombe yoohirakalla, ekaamba ya ochimwa wayenko. Yooyo sika mukutho woopepesella machimo.

⁴ Mullupa mukutho muullupallooyo aweena eng'ombeeyo va mullako wa musasa wamutthukumano vamiitthoni va Apwiya. Vano atthinddaanyere nnatta naye va muru wa eng'ombeeyo nave ayiiphe eng'ombeeyo vamiitthoni va Apwiya.

⁵ Vatulli viwa mullupa mukutho muullupallooyo akuse nikhame na eng'ombeeyo, aweena m'musasani wamutthukumano.

⁶ Vano atthaveye eyaallaaye munikhameni nave amidde nikhamenno otthanu ni wiilli vamiitthoni va Apwiya vahoollo va ekatani ya nipuro naweellesesa.

⁷ Vatulli viwa mullupa mukutho muullupalli amare nikhamenno va manyaka a va nikuwa nawoosellamo lubani* nno niri m'musasani wamutthukumano. Nikhame noohalla na eng'ombeeyo aniithelle vatthi va nikuwa na mukutho wooshellelliha, nno niri va mullako wa musasa wamutthukumano.

⁸ Muthooyo akuse makhura mattheene a nankhoro a eng'ombe yoovelleelliwa mukutho woopepesella machimooyo sika wi makhura mattheene oowaapheella nave oohuruwella marupo.

⁹ Aakusettho apellepetu ni makhuriiweene navettho makhura mattheene a ohapa, ayo anaavenyihelleeye nimodda ni apellepetwaalle.

¹⁰ Aavenyihemo wonanko mmo enavenyihelliwiiwa mu eng'ombe yoovelleella va mukutho wa eyaattano. Vano mullupa mukuthooyo ashellellihe ddittheddenennddo vanikuwani na mukutho wooshellelliha.

¹¹ Koma nttapara na nankhoro a eng'ombe, muhehe, muru, meto ni marupwiiwa waashellellihe otte wa misasa,

¹² apaalle wi eng'ombe ettheeneeyo, ekhumiwena otte wa misasa, eyiiwena o nddalla noopatuleya nko enatathillelliiwawo ntuura nave vanipuroni vaavo eshellellihiwe vamunlloni wa ekhuni.

¹³ “Mutthukumano muttheene wa Aisraele wachimwa moohidduwella erive ello yoovaanyihiwa ni malamulo a Apwiya, mutthukumano muttheene okhalle woochimwa.

¹⁴ Vano nichimonno nadduwanyeya, attheene emuvelleelle nankhoro mung'onong'ono eeng'ombe wi okhalle mukutho woopepesella machimo nave eweena va nthato na musasa wamutthukumano.

¹⁵ Vano oohoollelliiwa etthinddaanyere mattiiwa va muru wa nankhoro a eng'ombe vamiitthoni va Apwiya nave mmodda a alliwaayo ayiiphe vamiitthoni va Apwiya.

¹⁶ Mullupa mukutho muullupalli akuse nikhame na nankhoro a eng'ombe nave aweena m'musasani wamutthukumano.

¹⁷ Mullupa mukutho muullupallooyo atthaveye eyaallaaye munikhamenimmo nave amidde nikhamenno otthanu ni opiilli vamiitthoni va Apwiya vahoollo va ekatani.

¹⁸ Vatulli viwa nikhamenno animare va manyaka a va nikuwa nno niri vamiitthoni va Apwiya m'musasani wamutthukumano. Nikhame noohalla aniithelle vatthi va nikuwa na mukutho wooshellelliha, nno niri va mullako wa musasa wamutthukumano.

¹⁹ Eeddiiddo avenyihemo makhuriiwa mattheene nave aashellellihe vanikuwani.

²⁰ Eere ello emoddamoddave yeeyo wa nankhoro yoolla wonanko mmo aneerelleeye ni nankhoro ooheraatthiwa va mukutho woopepesella machimo. Sika aheraatthi mukutho woopepesella machimo ekaamba ya nichimo aathwaayo nave eneerokhululukelliwa.

²¹ Vano eng'ombeeyo ekhumihelliwe otte wa misasa nave eshellellihiwe wonanko mmo yeerelliiwa ni wawaamboolle. Yooyo sika mukutho woopepesella machimo wi mpingo muttheene okhululukelliwe.

²² “Oolamula achimwa moohidduwella erive ello yoovaanyihiwa ni malamulo a Apwiya Mullukwaaye, olliye tti oochimwa,

²³ Vano nichimonno nadduwanyeya, olliyooyo avelleelle mukutho wa nankhoro a epuri yoohirakalla.

²⁴ Vano oolamulellooyo atthinddaanyere nnatta naye va muru va nankhoro a epuri ni omwiiphella vanipuroni mvo eniiphelliiwa mukutho wooshellelliha vamiitthoni va Apwiya. Yooyo sika mukutho woopepesella machimo.

²⁵ Mullupa mukutho akuse nikhame na nankhoro a epuri ni eyaallaaye, animare va manyaka a va nikuwa na mukutho wooshellelliha nave iithelle nikhame noohallanno vatthi va nikuwa nenno.

²⁶ Eeddiiddo makhuriiwa mattheene aashellellihe vanikuwani, wonanko mmo eneerelliiwa ni makhura a mukutho wa eyaattano. Mwawi ddiidda aheraatthi mukutho woopepesella machimo ekaamba ya nichimo na oolamulella nave aneerokhululukelliwa.

²⁷ “Arive muthu ashisha achimwa moohidduwella erive ello yoovaanyihiwa ni malamulo a Apwiya, muthooyo akhalle oochimwa,

²⁸ Vano nichimonno nadduwanyeya, olliyooyo avelleelle mukutho wa epuri yaamutthiyana yoohirakalla.

²⁹ Vano atthinddaanyere nnatta naye va muru wa epuri yoopepesella machimweeyo nave ayiiphella vanipuroni mvo eniiphelliiwa mukutho wooshellelliha.

³⁰ Mullupa mukutho akuse nikhame na epuri yaamutthiyana ni eyaallaaye, animare va manyaka a va nikuwa na mukutho wooshellelliha nave iithelle nikhame noohallanno vatthi va nikuwa nenno.

³¹ Vano avenyihe makhuriiwa mattheene, wonanko mmo enaavenyihelliiwa makhura a mukutho wa eyaattano nave mullupa mukutho ashellellihe vanikuwaninno wi ekhumihe nthuko nawaaddivella Apwiya. Mwawi ddiidda aheraatthi mukutho woopepesella machimo ekaamba ya nichimo na muthu shisha nave aneerokhululukelliwa.

³² “Muthu awa wi avelleelle enkhosa ya mukutho woopepesella machimo, enkhoseeyo ekhalleke yaamutthiyana, yoohirakalla.

³³ Vano atthinddaanyere nnatta naye va muru wa enkhosa yoopepesella machimweeyo nave ayiiphelle vanipuroni mvo eniiphelliiwa mukutho wooshellelliha.

³⁴ Vatulli viwa, mullupa mukutho akuse nikhame na enkhoseeyo ni eyaallaaye, animare va manyaka a va nikuwa na mukutho wooshellelliha nave nikhame noohallanno aniithelle vatthi va nikuwa nenno.

³⁵ Vano avenyihe makhuriiwa mattheene, wonanko mmo enaavenyihelliiwa makhura eenkhosa yoovelleelliwa mukutho wa eyaattano nave ashellellihe vanikuwani ni mikutho ddimodda ddawoosiwa viikho, ddoovelleelliwa wa Apwiya. Mwawi ddiidda aheraatthi mukutho woopepesella machimo ekaamba ya nichimo na muthu shisha nave aneerokhululukelliwa.