Hagai 2 - Mawu a Mulluku

Ntitimiho na enyumba yanaanweene ya Apwiya

¹ Va nllapo na 21 mweeri waneetthanu ni piilli wa muyakha waneepiilli wa omwene wa Dariusi, mawu a Apwiya yaaweella mwa namallotella Hagai

² oya wa Zerubabele mwaana a Shealatiele, oolamulella a o Yuda navettho wa Yoswa mwaana a Yehozadaki, mullupa mukutho muullupalli ni wa amodda attheene wi,

³ “Ethiyo mwa nyuwaano ookhallavo oyo oonille otitimiheya wakhalle wa enyumbeella? Munayoona mwawiidde? M'mwiitthoni khenooneya wonanko ello.

⁴ Komave mi Apwiya Amasiva Mattheene kinallota wi, we Zerubabele ohinatathilla murima, weyaano Yoswa mwaana a Yehozadaki, muullupalli a mullupa mukutho ohitathille murima, nyu attheene muhitathille murima. Virellellani ni mutteko vawi kiri ni nyuwaano.

⁵ Nndda sika kuulonjezilleemini mukhumaka mu Iguputo. Munepaaka orive ni nyuwaano sika muhoove.

⁶ “Nnddo kinallota mi Apwiya Amasiva Mattheene tti ddawi, vavira enthawi vang'ono, kineerotikha oddullu ni ellapo yavatthi, enyanja ni mitunda.

⁷ Kineerotikha mitundu ddittheddene dda athu nave eyuumiiwa ettheene eneeroowa wuno sika enyumba yeella kineeroyiddalliha ni eyuuma yinchichi. Mi Apwiya Amasiva Mattheene koollota.

⁸ Siliva muttheene tti aaka, golide muttheene tti aaka.

⁹ Sika ntitimiho na enyumba yaneepiilleella eneerokhwaranya ntitimiho na enyumba yawaambeelle. Navettho vineerokhalla murendelle va nipuro nenno. Mi Apwiya Amasiva Mattheene koollota.”

Oripihiwa

¹⁰ Va nllapo na 24 na mweeri waneetthanu ni sese muyakha waneepiilli wa omwene wa Dariusi mawu a Apwiya yaawa wa namallotella Hagai wi,

¹¹ “Nnddo kinallota mi Apwiya Amasiva Mattheene tti ddawi mwaakohe allupa mukutho dda malamulo.

¹² Ethiyo muthu ahuruwella enama yoopatuleya mumukanjoni mwaye nave mukanjooyo wamuttannya buledi apaalle ephwaddi apaalle vinyo apaalle makhura apaalle yoocha ya orive mutundu, ethiyo ddenndda ddineerotthattuwa ddoopatuleya? Allupa mukuthwaayo yahaakhulla wi, ‘Iyaayi.’ ”

¹³ Vano Hagai ahaakoha wi, “Ethiyo muthu oyo aripihiwe voottannyani mutembo, apharattho ddenndda, sika wi ddineeroripihiwa?” Allupa mukuthwaayo yahaakhulla wi, “Ee, ddineeroripihiwa.”

¹⁴ Hagai aallota wi, “Nnddo enallota Apwiya tti ddawi, ‘Tti emoddamoddavettho yeeyo ni athu yaalla, mutundu yoolla vamiitthoni vaka. Ddittheddene eneeriiwa ni nnddo enavelleelliiwa mukutho tti ddooripihiwa.’ ”

Madaliso amuhoollo

¹⁵ “Vano ganizerani nnddo ddeereya ehinaambe omakattho enyumba ya Apwiya.

¹⁶ Muthu oyo atiyerella ophwanya ddoolingella dda tirigu makhumi meelli aphwanyathi nikhumi nimodda. Yawa wi erike ddoolingella 50 mu muno wa vinyo, yaphwanyamo ddoolingella 20.

¹⁷ Kahoononga mmiddo ddaanyu ddittheddene ni ephevo, nkhuwawe ni marallalla komave khamwaaganizalle ddoorukunuwa murima, Mi Apwiya koollota.

¹⁸ Waambeella ollello nllapo na 24, mweeri waneetthanu ni sese oya muhoollo, nllapo nno matthipello a enyumba ya Apwiya yamakiiwiiwa, chenjerani.

¹⁹ Khamunna yoocha yinchichi mukhokweni mwanyu naari ezipaso ddampesa, ddanamukuyu, ddamakangaza navettho dda olivi khaddinimme. Koma waambeella ollello kineerewuudalisani.”

Lonjezo na Apwiya wa Zerubabele

²⁰ Nllapo na 24 na mweeri yooyo, mawu a Apwiya yaawa wa Hagai waneepiilli wi,

²¹ “Omulleelle Zerubabele oolamulella a o Yuda wi kineerotikha eddullu ni ellapo yavatthi.

²² Kineeromalliha moomwene mattheene ni woononga masiva a mitundu dda athu ddittheddene. Kineerophikirisa magareta ni oowellavweene. Akavalo eneerokhwa nave oowellavo eneerewiiphanana.

²³ Mi Apwiya Amasiva Mattheene koollota wi, ‘Va nllapo nenno we Zerubabele oorumeyellaaka, mwaana a Shealatiele, kineerewuukusa navettho kineerewuutthattusa oolamulella nnddina naka vawi tti weyaano kimutthoonlleemi. Mi Apwiya Amasiva Mattheene koollota.’ ”