Genesis 24 - Mawu a Mulluku

Mwaara Isaki

¹ Vano Abrahamu ahuulluvalla wunchichi nave Apwiya yaamudalisa mu ddaweera ddaye ddittheddene.

² Nllapo nimodda aamulleella mullupa muttekwaaye muullupalli oyo awehera eyuumaaye ettheene wi, “Ngakiphare vatthi va kasambaroolla nave ollupelle.

³ Kinapaalla wi ollupelle vamiitthoni va Apwiya Mulluku ooddullu ni vatthi wi khomwaashera mutthiyana mwanaka variyari va anamwalli a Akanani wuno niriihunngu.

⁴ Oye owaani nave wamwaashere mwanaka mutthiyana wenko variyari va abalaaka.”

⁵ Koma mullupa muttekooyo aakoha wi, “Ethiyo keere tini mutthiyanooyo aahipaallaka wuno? Ethiyo mwaninyu kimuhokolloselle o ellapo eyo mwavenyenreenyu?”

⁶ Abrahamu ahaakhulla wi, “Woonesese wi ohiwe omuhokollosella wenko mwanaka.

⁷ Apwiya Mulluku Muullupalli, aakikusa owanihu mu nibanja na attiitthaaka ni mu ellapo kayarelliweemimo nave aakilonjeza moollupella wi, ‘Ellapo ella kineerovaha edduullu ddawo.’ Apwiya eneeromuruma mungelwiiwa uuhoollelle nave wenko oneeromwaashera mutthiyana mwanaka.

⁸ Mutthiyanooyo aahipaallaka wuuthwara wuno oneerottaphuwa o ollupellanngu. Komave ddeerevedde, ohiwe omuvelleella mwanaka wi akhalle wenko.”

⁹ Sika mullupa muttekoolle aahiya nnatta naye vatthi va kasambara a Abrahamu apwinnya nave aallupella wi, “Kineereweera ddittheddene mullonteenyu.”

¹⁰ Vano mullupa muttekooyo aakusa ekamira* khumi dda apwinnya ni emphaso ddinchichi ddoowallamella mutengo nave aaya o muzinda wa Nahori, mu ellapo ya Mesopotamiya.

¹¹ Aphiyalle aaddikokhoriha vatthi ekamirannddo vakhuviru ni ehime, otte wa muzinda. Ddawoona waari misikuwa enthawi yooya atthiyana woorika maaddi.

¹² Mullupa muttekooyo aavekella wi, “Apwiya Mulluku a apwiyaaka Abrahamu, kinimuuvekani wi ddeko ddikeetelle phaama ollello nave moonihe lonjezo nanyu noohimalla va apwiyaaka Abrahamu.

¹³ Kiri veehimenimva nave atthiyana a m'muzindanimmu enimawa wi erike maaddi.

¹⁴ Miyaano kineeromuveka namwalli mmodda wi, ‘Kinuuvekani wi murulle munwaanyooyo wi kiwirye maaddi.’ Namwallooyo aakhullella wi, ‘Wiryani nave kiddiwiryihettho maaddi ekamira ddanyu,’ Yooyo sika anaakhalle namwalli oyo mumutthoollelleenyu oorumeyellaanyu Isaki. Ddenndda ddeereya, kineerodduwella wi mohaasungella lonjezo noohimalla apwiyaaka.”

¹⁵ Ahinamallihe ovekella aamoona moorurumusa Rebeka iireyille muno vanthurini. Olliyoolla aari mwaana a Betuele, mwaana a Milika, mwaara Nahori, mwanamunne a Abrahamu.

¹⁶ Rebeka aari namwalli ooreera wunchichi nave oohimudduwella mullopwana. Olliye aakitthella wiihimeni wulle nave arikenlle maaddi m'munoni aakhumawo.

¹⁷ Vano mullupa muttekoolle aamuthamakella wi akumanena nave aallota wi, “Pepaani, kivaheni maaddi a m'munoni mwanyu wi kiwirye.”

¹⁸ Namwallooyo aallota wi, “Wiryani apwiya.” Nave mwawaakuva aarulla munwaayoolle vanthurini, awuphareellella wi mulletooyo awirye.

¹⁹ Mulletoolle awiryalle maaddaayo, namwallooyo aallota wi, “Kineerowaanattho maaddi wi ekamira ddanyu ddittheddenennddo ddiwirye mookwakhwana.”

²⁰ Mwawaakuva ahiithella maaddi ammunonaalle moowiryella enama nave aahokollweella wiihimeni wulle. Nave aarika maaddi mamodda wi awiryihe ekamira ddittheddenennddo.

²¹ Mulletoolle aarimi phee, anawehesesa nnddo eera namwallooyo wi oone Apwiya yaarimi edalisalle olendwaaye apaalle iyaayi.

²² Namwalloolle amallihalle owiryiha ekamirannddo, mulletoolle aakhumiha echipini ya golide yoowallamella mutengo wonanko hafu ya sekeli, amuwariha Rebeka vaphunani vaye. Aamuwarihattho m'miwonini mwaye ebangili piilli ddoowallamella mutengo wonanko makobiri a golide khumi.

²³ Vano aamukoha wi, “Pepaani, killeelle, ethiyo attiittho ttaani? Ethiyo nookhallavo nipuro nawi ttuukona miyaano ni akhwaakaalla?”

²⁴ “Attiitthaaka tti Betuele, mwaana a Nahori oyo amuyarelleeye Milika.”

²⁵ Aavirellella ollota wi, “Ddoocha dda enamanndda ddookhallawo owaani nave nipuro nawi nyuwaano ttuukonavo nookhallawottho.”

²⁶ Vano mulletoolle aakokhora vatthi nave ahaallapella Apwiya.

²⁷ Nave aallota wi, “Etitimihiwe Apwiya Mulluku a apwiyaaka Abrahamu, ayo esungalle moororomelleya lonjezo niwa wa apwiyaaka. Apwiya aakihoollella miyaano wa abale a apwiyaaka.”

²⁸ Sika vano namwalloolle aathamakella o enyumba ya amennya, aatthopoollella mwaha muttheenoolla.

^29-30 Vano Labani, murokoriye a Rebekooyo aathamakella wiihimeni waari mullupa mutteko a Abrahamu wulle. Labani ahoona echipiniille ni ebangili m'muwononi mwa murokoriye nave aamwiiwa Rebekooyo allotaka nnddo muthooyo amulleelleeye. Aphiyalle veehimeni valle, amuphwanyille mullupa mutteko a Abrahamoolle iimenlle vakhuviru ni ekamira.

³¹ Nave aamulleella mulletooyo wi, “Hankoni wuno vawi nyuwaano tti muthu oyo Apwiya emudalisalliiwa. Kaambiiwa tini mwiimenlleenyu wuno? Miyaano kohuupotokosellani khalle nipuro mpa mwahu navettho nipuro nookonavo ekamira ddanyu.”

³² Sika mulletoolle aavollowa mpa nave Labani aamuttaphulla katundu ddamutukhullalle ekamirannddo. Vatulli viwa aaddivaha munyepu ni yoocha ekamirannddo navettho ahaavaha maaddi wi ehape alleto attheene.

³³ Ewiille yoocha, mulletoolle aallota wi, “Ngicha ophiyera killonte nnddo kiweelleemi.” Vano Labani aamulleella wi, “Llotani.”

³⁴ Olliyooyo aallota wi, “Mi tti mullupa mutteko a Abrahamu.

³⁵ Apwiya ahaadalisa wunchichi apwiyaaka nave aawunnuwiha wunchichi. Ahaavaha enkhosa ni epuri ni eng'ombe ddinchichi. Ahaavahattho siliva ni golide, akaporwiiwa aallopwana ni aatthiyana navettho ekamira ni abulu anchichi.

³⁶ Sara, amwara a apwiyaaka naari yuulluvanlle yahaayarella mwaana aamullopwana. Vano apwiyaakaayo aamuvaha eyuumiiwa ettheene mwaanooyo.

³⁷ Sika vano apwiyaaka yaakillupelliha wi kisunge mawiiwa wi, ‘Mwanakoolla ohiwe omwaashera mutthiyana variyari va anamwalli a ellapo ella ya Kanani, wuno kinakhalleemiwo.

³⁸ Koma oye owaani wa attiitthaaka ni abalaaka, wamukuselle mutthiyana mwanaka wenko.’

³⁹ Nave kaawaakhulla apwiyaaka wi, ‘Ethiyo keere tini mutthiyanooyo akhoota okithwara wuno?’

⁴⁰ Alliwa yaakaakhulla wi, ‘Apwiya ayo kikhanlleemi kiwiiwellellaka enthawi ddittheddene, eneeromuruma mungelwiiwa wi eete nimodda ni weyaano nave aweeriha wi ddiweetelle phaama. Nave oneeromwaashera mwanaka mutthiyana ovenyera wa athwaaka, o nibanja na attiitthaaka.

⁴¹ Weera ddenndda, oneerottaphuwa o ollupell nngu. Koma weyaano waphiya onibanjani nakanno, athwaakaayo yuukhoota, oneerottaphuwa o ollupellanngu.’

⁴² “Vano ollellova kiphiyalle veehimeni, kaavekella wi, ‘Apwiya Mulluku a apwiyaaka Abrahamu, mukikavihere wi ddikeetelle phaama voolendonaakoolla.

⁴³ Kiri veehimenimva, vaawa namwalli wi arike maaddi, miyaano kimuveka wi, kivaheni maaddi m'munoni mwanyummo wi kiwirye.

⁴⁴ Olliye aakaakhulla wi wiryani navettho kineerowiryiha ekamira ddanyunndda, yooyo anaakhalle namwalli oyo Apwiya emutthoollilliiwa wi akhalle mwaara a mwaana a apwiyaaka.’

⁴⁵ Kihinamallihe wene ovekella wakanko, moorurumusa kaamoona Rebeka iireyille muno vanthurini, akitthellaka wiihimeni wi arike maaddi. Sika kaamuveka wi, ‘Kivahe maaddi kiwirye.’

⁴⁶ Mwawaakuva aarulla munwaaye vanthurini, akilleella wi, ‘Wiryani nave kineerowiryihattho ekamira ddanyunndda.’ Sika kaawirya nave olliyooyo aawiryihattho ekamirannddo.

⁴⁷ Vano kaamukoha wi, ‘Ethiyo attiittho ttaani?’ Olliye aakaakhulla wi, ‘Attiitthaaka tti Betuele, mwaana a Nahori oyo amuyarelleeye Milika.’ Enthawi yeeyo kaamuwariha echipini vaphunani navettho ebangili vamuwononi.

⁴⁸ Vano kaakokhora vatthi kaatitimiha Apwiya. Kahaatitimiha Apwiya Mulluku a apwiyaaka Abrahamu, ekaamba yookihoollella phaama wunchichi. Apwiya aakiphiyiha wa mbaliiwa a apwiyaaka, nko kimphwanyeemiwo mwanaye oyo anaakhalle mwaara a mwaana a apwiyaaka.

⁴⁹ Nave vano mwapaalla oweerella echifundo moororomelleya apwiyaaka, killeelleni navettho mwaahipaallaka killeellenittho wi miyaano koone yaweera.”

⁵⁰ Labani ni Betuele yahaakhulla wi, “Vawi nndda tti ddoovenyera wa Apwiya, hiyaano khaninna yoollota.

⁵¹ Ngoonani, Rebeka olla mukuseni murowekena. Mwamuvelleelle wa mwaana a apwiyaanyu wi akhalle mwaariye moollikana ni mmo Apwiya ellotellwiiwa.”

⁵² Mullupa mutteko a Abrahamoolle iiwalle mawaalla, aakokhora vatthi aatitimiha Apwiya.

⁵³ Vano aakhumiha ddeko dda siliva ni dda golide ni ddoowara nave aaddivelleella wa Rebeka. Aavelleellattho emphaso ddoowallamella mutengo wa murokoriye a Rebekooyo ni wa amennya.

⁵⁴ Mullupa muttekooyo ni athu aariiyenaayo yaacha ni owirya nave yaakona wenko. Evenyille ohinase, mulletooyo aallota wi, “Kittaphulleni wi kihokollweelle wa apwiyaaka.”

⁵⁵ Koma amennya Rebeka ni murokoriyooyo, yaallota wi, “Iyaayi, namwalloolla akhalleve ni hiyaano enthawi vang'ono, yoohiyeveella mallapo khumi, vatulli viwa sika aneeroyaawo.”

⁵⁶ Koma mullupa muttekooyo aallota wi, “Pepaani, muhikisellihe wawi Apwiya aakeetiha phaama wunchichi voolendonaakoolla. Kittaphulleni wi kihokollweelle wa apwiyaaka.”

⁵⁷ Sika yaamwaakhulla wi, “Hankoni nimwiithane namwallooyo wi nimukohe.”

⁵⁸ Sika yaamwiithana Rebeka emukoha wi, “Ethiyo onnapaalla othaananana ni mulletoolla?” Rebeka ahaakhulla wi, “Ee, kineerothanana.”

⁵⁹ Sika yaamwaakhullella Rebekooyo ni mullupa muttekwaaye aamutthiyana ovenyera enamwanaaye wi ethaanane ni mullupa mutteko a Abrahamu ni athwaaye oomuvelleella.

⁶⁰ Nave yaamudalisa Rebekooyo voollotani wi, “Weyaano murokorihu, Apwiya yuudalise wi okhalle moowe a athu awaata wunchichi. Edduullu ddawo ddineerewaagonjiha adaniiwa.”

⁶¹ Vano Rebeka ni akaporwaaye aatthiyana yaatimulla ewella ekamira, enathaanana ni mulletoolle. Nave mullupa mutteko a Abrahamoolle aamukusa Rebeka.

⁶² Isaki aari avenyillewo o echipululu ya “Neetuutu a Ookumi Anakoona Miyaano,” nave akhalla o echigawo yoomwera.

⁶³ Nllapo nimodda misikuwa, Isakooyo eeteetaka ohakani, ahoona ekamira ddiwaaka.

⁶⁴ Vano Rebeka atukhullalleeye miittho nave amoonilleeye Isaki, aakittha va ekamiraaye,

⁶⁵ nave aamukoha mullupa mutteko a Abrahamu wi, “Ethiyo muthu olla anawa wuno ttaani?” Mullupa muttekoolle aamwaakhulla wi, “Yaalla sika apwiyaakaalle.” Vawi ddiiddo Rebeka aakusa ekuwo, iikhuneellana ekhove.

⁶⁶ Mullupa muttekooyo aamutthopoollella Isaki ddittheddene ddeereyille.

⁶⁷ Vano Isaki aamukusa Rebeka wi akhalle mwaariye nave avollowana m'musasani mwa amennya. Isaki aamukonda wunchichi Rebekooyo vawi aakhurumuseya murima o okhwa wa amennya wulle.