Estere 8 - Mawu a Mulluku

Ayuda enalamuliwa wi ehokolloselle ddookatamiha

¹ Nllapo nenno, mwene Ahasuwero aamuvaha mwaaramwene Estere enyumba ya Hamani, mudani a Ayudoolle. Estere aamulleella mwene wi Mordekai tti mbalaaye. Sika ovenyera vaavo Mordekai ahaakhullelliwa ophiyera vamiitthoni va mwene.

² Mwene aarulla emphetaaye yookhalla ni echidindo eyo aakhilleeye ovenyera wa Hamani, ayivelleella wa Mordekai. Sika Estere aamwinnya Mordekai ottekweene woowehera enyumba ya Hamani.

³ Vano Estere aakokhora vamiitthoni va mwene anallota mwa winlla. Aamuveka mwene wi ahiihe ello yoonanara eyo Hamani Mwagagi akeraatthihalleeye navettho ni woononga nko apaalleeye oweerella Ayuda.

⁴ Mwene aamutthoonya Estere ni ekopwaaye ya golide.

⁵ Nave Estere ahiimella, allota vamiitthoni va mwene wi, “Ddaarimi dduuhakallallihalleni amwene, mwaarimi mukikondaka apaalle yaarimi yoovekaaka eri yaphaama vamiitthoni vanyu, miyaano kawuuddivellakani vamiitthoni vanyu amwene, vano nilembiwe lamulo noorukunusa mawu a mukalata a Hamani Mwagagoolle, mwaana a Hamedata. Vawi alembille wi Ayuda attheene enakhalla mu ezigawo ddittheddene dda omwenaanyu yoonongiwe.

⁶ Kinaawore ovillella mwawiidde, vawoonani mullilli oyo onaamorella athu a nlloko naka? Apaalle kinaawore mwawiidde ovillella, vawoonani abalaaka yiiphiwaka?”

⁷ Sika mwene Ahasuwero aamulleella mwaaramwene Estere ni Mordekai, Muyudoolle wi, “Ngoonani, koomuvaha Estere enyumba ya Hamani nave Hamanooyo yaamumakellella vamuteekhoni, ekaamba yawi apaalla owiipha Ayuda.

⁸ Koma lamulo noolembiwa mu nnddina na mwene ni odindiwa ni emphete ya mwene, khaavo anawora onirukunusa. Sika nyuwaano mwaalembellettho Ayuda mmo munapaallelleenyu, mu nnddina na mwene ni odinda ni emphete ya mwene.”

⁹ Sika mwene aawiithaniha alembi va mweeri waneeraru wa Sivani, va nllapo na 23. Vano alembaayo yaalemba lamulo moollikana ni mmo Mordekai alamulalleeye voollotani dda Ayuda. Yaalembella wa enduna, attekweene ni allupa mutteko attheene a mu ezigawo ddittheddene 127 ovenyera o Indiya ophiya o Kushi. Erive echigawo yaalembelliwa kalata moollikana ni mmo enalembelliiwa navettho wa nirive nlloko mu ellotellwiiwa navettho wa Ayuda moollikana ni mmo enalembelliwa ni enallotelliiwa.

¹⁰ Makalataayo yalembiwe mu nnddina na mwene Ahasuwero navettho yaadindiwa ni emphetaaye. Vano makalataayo yaarumihiwa ni amithenga oowella va akavalo oothamaka wunchichi oorellelliwa munikhollani na mwene.

¹¹ Ekaamba ya makalataalla mwene ahaakhullella wi Ayuda ookhalla mu mizinda ddittheddene, etthukumane ni oteteza okumiiwa. Navettho wi yoononge, yiiphe ni otthollosa nirive nlloko na adani oovenyera mu erive echigawo ayo yaallika. Ewoononge aniiwa ni atthiyaniiwa navettho emwaakhe katundwiiwa muttheene.

¹² Yahaakhullelliwa weera ddenndda nllapo naneekhumi ni raru na mweeri wa khumi ni piilli, mweeri wa Adara.

¹³ Mawu amukalatooyo yapaalleeye edduwelliwe mu ezigawo ddittheddene dda omwenooyo nave ellalleyiwa wa athu attheene wi tti lamulo ddawoona. Vano nndda ddallalleyiwe wi Ayuda ewore okhozeka waahokolloselle adaniiwa nllapo nenno.

¹⁴ Sika moolamulelliwa ni mwene, amithengaalle yaawella va akavalwiiwa oothamaka wunchichi oorellelliwa munikhollani na mwene. Nave lamulonno yaanillalleya mu Susa, muzinda muullupalli.

¹⁵ Vano Mordekai aavenyavo vamiitthoni va mwene awarille ddoowara ddoomwene ddoobiliwila ni ddaweella navettho ni enduwira yoomwene yuullupalli ya golide. Aawarattho mukanjo wabafuta woofiira nave muzinda muttheene wahaamba okhuwa moohakallalla.

¹⁶ Vano Ayuda yaari oohakallalla ni oottaphuwa nave athu yaanaavaha olemu.

¹⁷ Mu ezigawo ddittheddene ni mu mizinda ddittheddene mmo mwaphiyalle mawu a mwene oollalleya lamulonne, mwaakhalla ohakallalla ni ottaphuwa variyari va Ayuda. Naari nllapo na ehakallallo ni nawiithuuwa, noohiphara mutteko. Sika athu a malloko ddinchichi mu omwenooyo yahaamba wiiromolla wi tti Ayuda vawi yaanawoova wunchichi Ayuda.