Eksodo 38 - Mawu a Mulluku

Mapangello a nikuwa na mukutho wooshellelliha

¹ Aapanga nikuwa na mukutho wooshellelliha na matabwa akesha. Naari noorekama masentimita 229, okhuveya wiwa waarittho masentimita 229 nave oya muddullu wiwa waari masentimita 137.

² Aapanga manyaka va makoniiwa masesaayo, oopangiwa ni ntabwa nimoddave nenno nave aanihuruwella ni mukuwa.

³ Aapangattho embale ddiwa moomorellamo ntuura, mafosholo, mabeseni, mafoloko muullupalli navettho ezipangizo ddookharihavo munllo. Ezipangizo ddittheddene dda va nikuwanno ddaari dda mukuwa.

⁴ Opangettho echiwaya yamukuwa yookhalla wonanko esefa. Aamakellella echiwayeeyo variyari va nikuwanno

⁵ Mu makona mwiwa aapangellamo emphete ddamukuwa ddootukhullellana.

⁶ Aapanga ekopo ddakesha ddootukhullellana nikuwanno nave aaddihuruwella ni mukuwa.

⁷ Vootukhullani nikuwanno, ekoponnddo yaanaddiherera mu emphete dda mukhwipi mwa embali piilli dda nikuwanno. Nave nikuwanno aanihiyera nikhungu muwari mwiwa.

Mapangello a nibeseni namukuwa

⁸ Nave aapanga nibeseni namukuwa noohapellamo ni yowiimeseravo yamukuwa. Aapangille ddenndda ni magalasi awiiweherana a atthiyana oorumeyella va mullako wa musasa wamutthukumano.

Mamakello a nthato na musasa

⁹ Aapanga nthato na musasa waapheelliha ni mpanda. Omwera wiwa waari ekuwo ddabafuta aphaama, orekama wiwa waari mamita 46.

¹⁰ Apotwiiwa 20 ni matthipellwiiwa 20 yaari a mukuwa koma engowi dda apotwaayo ni ekopo ddiwa ddaari dda siliva.

¹¹ Emoddamoddave yeeyo embali yoompoto, aahiyavo ekuwo, orekama wiwa mamita 46 ni apoto 20 ni matthipellwiiwa 20 amukuwa koma engowi dda apotwaayo ni ekopo ddiwa ddaari dda siliva.

¹² Okhuveya wiwa wa nthatonno, embali ya woovollowa nndduwa, waari ekuwo orekama wiwa mamita 23 ni apoto khumi owaakattho matthipello khumi. Engowi ddiwa ni ekopo ddiwa ddaari dda siliva.

¹³ Embali ya wookhuma nndduwa nthatonno naarittho mamita 23 okhuveya wiwa.

¹⁴ Va embali emodda ya mullako vaari ekuwo, orekama wiwa mamita matthanu ni piilli ni apoto araru ni matthipello mararu.

¹⁵ Emoddamoddave yeeyo va embali emodda vaakhallattho ekuwo, orekama wiwa waari mamita matthanu ni piilli ni apoto araru ni matthipello mararu.

¹⁶ Ekuwo ddittheddene dda nthato ddaari ddabafuta aphaama.

¹⁷ Matthipello a apotwaayo yapangiwe ni mukuwa. Nave engowi dda apoto, ekopo ddiwa ni etthoka ddiwa, ddittheddenennddo ddaari ddasiliva. Apoto attheene a nthatonno yallundellelliwe ni ekopo ddasiliva.

¹⁸ Va mullako wa nthatonno vaari ekatani yabululu, yooreera yoofiira, yoofiira, yabafuta aphaama navettho yoopetiwa mweeruso. Orekama wiwa waari mamita matthanu ni masese nave okhuveya wiwa waari mamita meelli wonanko ekuwo ya nthato.

¹⁹ Yaakhalla ni apoto asese oomakiwa va matthipello masese amukuwa. Nave engowi dda apoto, ekopo ddiwa ni etthoka ddiwa, ddittheddenennddo ddaari dda siliva.

²⁰ Ezipangizo dda musasa wamutthukumano ni ekhomo dda musasa ni dda nthatonno, ddittheddenennddo ddaari dda mukuwa.

Ezipangizo ddamukoko dda musasa wamutthukumano

²¹ Ella sika echiwerengero ya golide, siliva ni mukuwa nnddo yaddipharihiiwa mutteko voopangani musasa wamutthukumano moollikana ni mmo Mose alamulalleeye. Alevi sika yaari ni odindo wooddeerenga nave aahoollella tti Itamara, mwaana a Aroni mullupa mukutho.

²² Nave Bezalele, mwaana a Uri, edduullu ya Huri, a nlloko na Yuda aheera ddittheddene nnddo Apwiya yamulamulalliiwa Mose.

²³ Oomukaviheraaye Oholiyabu, mwaana a Ahisamaki, a nlloko na Dani, aari eeruso yoogoba malluku, ojambula mapulani ni woopa ekuwo ddabululu, ddooreera ddoofiira, ddoofiira navettho ddabafuta aphaama.

²⁴ Golide muttheene yamupharihiiwa mutteko voopangani musasa wamutthukumano, golide oyo athu yavelleelliiwa wa Apwiya, akwakhwanille makilogaramu 1,000 moollikana ni yoolingella yoopatuleya.

²⁵ Siliva oovenyera mu kalembela a Aisraele akwakhwanille makilogaramu 3,430 moollikana ni yoolingella yoopatuleya.

²⁶ Arive muthu avelleella beka nimodda (ottaphullella wi ddoophwanaphwana ni magaramu 6 moollikana ni yoolingella yoopatuleya). Athu ayo yalembiwe yakwakhwanille allopwana 603,550 a miyakha 20 oya muhoollo.

²⁷ Siliva oollemella makilogaramu 3,400 yaamakella matthipello 100, a musasa wamutthukumano ni ekatani yootchinga. Erive matthipello yapaalla siliva oollemella makilogaramu 34.

²⁸ Ni makilogaramu a siliva oohalla, Bezalele aapanga engowi dda va apoto, aahuruwella etthoka dda apoto nave aapanga ekopo ddiwa.

²⁹ Mukuwa oyo yawuvelleelliiwa wa Apwiya waari makilogaramu 2,425.

³⁰ Vano ni mukuwa yoolla aapanga matthipello a mullako wa musasa wamutthukumano. Aapangattho nikuwa na mukutho wooshellelliha, echiwayiiwa ni ezipangizo ddiwa ddittheddene,

³¹ matthipello a nthato nittheene ni a mullako wa nthato ni ekhomo ddittheddene dda musasa wamutthukumano ni dda nthato nittheene.