Eksodo 30 - Mawu a Mulluku

Nikuwa nawoosellavo lubani

¹ “Omake nikuwa nawoosellavo lubani* nave nikhalle na matabwa akesha.

² Orekama wiwa masentimita 46 nave okhuveya wiwa masentimita 46 navettho masentimita 91 oya muddullu. Manyakiiwa ekhalle oopangiwa ni ntabwa nimoddave.

³ Onihuruwelle ni golide aphaama wunchichi vaddullu viwa, mukhwipi mwiwa musese mutthemwene ni va manyakiiwaayo. Nave waapheellihe mukoko wagolide owanoni wa nikuwanno.

⁴ Va embali piilli ddoowehana, vatthi va mukoko wagolide wowaapheellooyo, opange emphete piilli ddagolide. Ekopo ddootukhullella nikuwanno ddihereriwe mu emphetennddo.

⁵ Ekopo ddenndda ddikhalle dda kesha nave oddihuruwelle ni golide.

⁶ Nikuwanno onihiye vahoollo va ekatani yootchinga nibokosi na echipangano, vahoollo va yookhuneella eyo eri vaddullu va nibokosi na echipangano. Va nipuro nenna tti mvo kinaakumanekeemi ni weyaano.

⁷ Orive ohinase Aroni ooseke lubani a nthuko naphaama enthawi eyo aapotokosaka enyaliille.

⁸ Nave aakhariha enyaleeyo misikuwa, ooseke lubani. Sika vikhalle woosa lubani woohihiyerera vamiitthoni va Apwiya mu mibado ddanyu ddittheddene.

⁹ Va nikuwamvo ohoosevo lubani nihinaakhullelliwe apaalle mikutho dda enama yooshellelliha, dda yoocha apaalle dda yoowirya.

¹⁰ Aroni aneereke mutetho woopepesella machimo va manyaka a nikuwanno omodda vamuyakhani ni nikhame na enama ya mukutho woopepesella machimo. Ddenndda ddeereyekettho mu mibado ddanyu ddittheddene. Nikuwa nenna ninaakhalle naweella wunchichi, noopatuleyella mi Apwiya.”

Mukutho wawoopollella okumi

¹¹ Apwiya yaamulleella Mose wi,

¹² “Waamweeraka kalembela a allopwana a Aisraele, arive muthu avelleelle wa mi Apwiya yawoopollella okumaaye wi ohimumorelle mullilli kalembelooyo aawereyaka.

¹³ Arive muthu anaaphwanelle olembiwa mu kalembelammo avelleelle makobiri moollikana ni yoolingella yoopatuleya wi ekhalle yoovelleella ya wa miyaano.

¹⁴ Arive mullopwana oolembiwa mu kalembelooyo, a miyakha 20 oya muhoollo, avelleelle ddenndda wa mi Apwiya.

¹⁵ Eeyuuma ahivelleelle moovirellella nave oohoowa ahivelleelle mooyeveella voovelleellani wa Apwiya mikutho ddenndda wi moopolle okumaanyu.

¹⁶ Makobiri awoopollellaayo oovenyera wa Aisraele, mupharihe mutteko wa musasa wamutthukumano. Ddenndda ddineerokuupusa mi Apwiya dda Aisraele nave ddinaakhalle ddawoopollella okumaanyu.”

Nibeseni na mukuwa

¹⁷ Apwiya yaamulleella Mose wi,

¹⁸ “Opange nibeseni na mukuwa noohapellamo nave marwiiwa ekhalle a mukuwa. Onihiye variyari va musasa wamutthukumano ni nikuwa nave ohellemo maaddi.

¹⁹ Aroni ni anaaye enawellekemo ni ohuwa manyallwiiwa

²⁰ yaavollowaka mu musasa wamutthukumano apaalle yaawaatamellaka nikuwanno va muttekwiiwa woorumeyella ni yaavelleellaka mikutho wa Apwiya wi ehikhwe.

²¹ Enaaweeke ni ohuwa manyallo wi ehikhwe. Nenna tti lamulo nno alliwaayo ni edduullu ddiwa ni mibado ddamuhoollo wa enthawi yoohimalla.”

Makhura oozozella

²² Apwiya yaamulleella Mose wi,

²³ “Okuse ddawunkhella phaama makilogaramu matthanu ni nimodda a mure* amaaddi, makilogaramu mararu a Sinamoni, makilogaramu mararu a mihalli ddoonang'aneya,

²⁴ makilogaramu matthanu ni nimodda a kesha (ddittheddenennddo moollikana ni yoolingella yoopatuleya). Nave waanjerere makhura a olivi ookwakhwana malita masese.

²⁵ Sika ddittheddenenndda opangelle makhura oopatuleya oozozella. Oddittakanyihere vamodda wonanko mmo aneerella muthu oopanga ddawunkhella.

²⁶ Ozoze musasa wamutthukumano ni makhura yaayo. Ozozettho nibokosi na echipangano,

²⁷ tebulo ni ezipangizo ddiwa ddittheddene, yoohiyavo enyali ni ezipangizo ddiwa, nikuwa nawoosellavo lubani,

²⁸ nikuwa nooshellellihavo mikutho ni ezipangizo ddiwa navettho nibeseni noohapellamo ni marwiiweene.

²⁹ Ddittheddenenndda oneeroddipatula mwawi ddiidda wi ddikhalle ddaweellihiwa wunchichi. Nave erive ello enaattannye ddenndda eneerewoonongeya ekaamba ya masiva a weella wiwa.

³⁰ Nave omuzoze Aroni ni anaaye ni waapatula wi ekhalle allupa mukutho.

³¹ Nave Aisraele attheene waalleelle wi, ‘Yaalla sika enaakhalle makhuraaka oopatuleya oozozella mu mibado ddanyu ddittheddene.

³² Makhura yaalla muhaazozelleke athu shisha nave muhipangekettho makhura mamodda oophwanaphwanana. Yaalla tti aweella nave wa nyuwaano enaakhalleve aweella.

³³ Arive muthu anaapange makhura mamodda oophwanaphwanana apaalle omuzozella muthu shisha aneerovenyihiwa variyari va athwaaka.’ ”

Mapangello a lubani

³⁴ Nave Apwiya yaamulleella Mose wi, “Okuse ddoolingella ddoophwanaphwana dda ddawunkhella phaama wonanko sitakate, onika, galibanumu ni lubani naphaama wunchichi.

³⁵ Oddittakanyihere vamodda nave opange lubani wonanko mmo aneerella muthu oopanga ddawunkhella. Ohellemo mwiinyu nave nikhalle naphaama ni naweella.

³⁶ Osille phaama embali emodda nave ovahullewo vang'ono ni ohiya vahoollo va nibokosi na echipangano mu musasa wootthukumanellamo ni nyuwaano. Lubani nenna wa nyuwaano nikhalle naweella wunchichi.

³⁷ Muhipangekettho lubani nimodda noophwanaphwanana koma wa nyuwaano nikhalle naweella nave noopatuleyella wa Apwiyave.

³⁸ Muthu mmodda apanga lubani noophwanaphwana ni nenna wi aphariheke mutteko, avenyihiweke variyari va athwaaka.”