Deuteronomo 29 - Mawu a Mulluku

Echipangano yookeraatthihiwa o Mowabu

¹ Alla sika mawu a echipangano eyo Apwiya yamulamulalliiwa Mose wi ekeraatthihe ni Aisraele mwiillaponi mwa Mowabu. Mawaalla yoonjereriwe va mawu eechipangano alle Apwiya yakeraatthihalliiwa ni alliwaayo o mwaango wa Horebu.

² Mose aawiithana Aisraele attheene aalleella wi, “Mwaaddoonella nyookha nndde Apwiya yamweerelliiwa mwene a o Iguputo ni enduna ddaye ni ellapwaaye ettheene.

³ Mwahoonattho millilli ddawoopiha, ddoottikhiniha ni ezizindikiro nnddo Apwiya yeerilliiwa.

⁴ Koma ophiyera ollello Apwiya khenuuvaheni murima wawiiwesesa apaalle miittho wi moone apaalle maaru wi mwiiwe.

⁵ Va miyakha 40 mvo Apwiya yuuhoollelliiwani muchipululuni mulle ddoowara ddanyu apaalle esapato ddanyu khaddaawaahuwalle.

⁶ Khemwaamuchille buledi naarittho omuwirya vinyo apaalle yoowirya yoowalli koma Apwiya yahuuvahani ddoopaalleya ddanyu wi mudduwelle wi alliwa tti Apwiya Mullukwaanyu.

⁷ Nave naphiyalleehu va nipuro nenna, mwene Sihoni a o Heshiboni ni mwene Ogi a o Bashani yaawa wi ellipane ni hiyaano koma nahaagonjiha.

⁸ Nahaakha ellapwiiwa nave naayikawella variyari va malloko a Rubeni ni Gadi owaaka hafu a nlloko na Manase wi ekhalle wonanko yoohallaniiwa.

⁹ Sika musungeke mawu mattheene a echipanganwaalla wi ddeko ddanyu ddittheddene ddiweetellekeni phaama.

¹⁰ “Ollello attheenenyu mwiimelle vamiitthoni va Apwiya Mullukwaanyu monga oohoollellaanyu, attekweenaanyu, enduna ddanyu, allopwana a Israele,

¹¹ aniinyu, awarinyu ni alleto ayo eri variyari vanyu nave ayo enuutthallellani ekhuni ni wuurikellani maaddi.

¹² Muri mva ollello wi mullupelle ni ekeraatthiha echipangano eyo Apwiya Mullukwaanyu enakeraatthihiiwa ni nyuwaano.

¹³ Vano Apwiya eneerosimikiza wi muri athwiiwa nave wi alliwa tti Mullukwaanyu moollikana ni mmo yalonjezelliiwa wa nyuwaano ni ollupella wa makhollwaanyu, Abrahamu, Isaki ni Yakobo.

¹⁴ Khe nyuwaanove Apwiya enakeraatthihiiwana echipanganweella voollupellani

¹⁵ koma enakeraatthihattho ni edduullu ddanyu ddamuhoollo.

¹⁶ “Munnuupuwella mmo nakhallelleehu o Iguputo wulle nave mmo neetelleehu olendo variyari va ellapo dda mitundu ddimodda.

¹⁷ Nave mwahoona mafanwiiwa oonanara amiteekho, amalluku, asiliva navettho agolide.

¹⁸ Moonesese wi vihikhalle oorukunuwa murima wi aahiye Apwiya Mullukwaanyu naari mullopwana, mutthiyana, nibanja apaalle nlloko mwa attheenenyu ni waamba ollapella milluku ddimodda. Weera ddiidda onaphwanaphwana ni musisi wooyara nttipwi ni echipaso yoowaawa.

¹⁹ Moonesese wi vihikhalle mmodda a nyuwaano ollello oyo aniiwa mawu yaalla koma anallota m'murimani mwaye wi ddeko ddineeromweetella phaama naari ari awumma murima oowanddeellella weera ddoopaalla ddaye. Ddakhalla ddiiddo, aphaama ni oonanareene eneerewoonongeya.

²⁰ Apwiya khemukhululukella muthu awi ddiidda vawi Apwiya eneeromushella murima ni ehache yookhara. Nave matembelelo oolembiwa munibukhunimmu eneeromumorella nave Apwiya eneeromoononga wawi khawa uupuwelliwa va ellapo yavatthi.

²¹ Apwiya eneeromupatula va athu a malloko mattheene a Israele nave eneeromullaka ni millilli moollikana ni matembelelo a echipangano oolembiwa munibukhuni na malamulo.

²² “Athu a mibado ddanyu ddamuhoollo, edduullu ddanyu ni alleto oovenyera woorekama, eneerewoona millillinnddo ni ddoohoosa nnddo Apwiya enaamorihelliiwa va ellapwaanyu.

²³ Emata ddanyu ddineerotthulluwa, ddinaaddalle sulufure ni mwiinyu nave khemumella erive ello naari manasi. Ellapwaanyu enaakhalle wonanko mizinda dda o Sodomu ni Gomora navettho dda o Adima ni Zeboimu nnddo Apwiya yaddoonongilliiwa va enthawi elle yashilliiwa murima wunchichi.

²⁴ Vano ellapo yavatthi ettheene eneerokoha wi, ‘Ethiyo kaambiiwa tini Apwiya eyeerelliiwa ddenndda ellapweella? Ethiyo kaambiiwa tini eshilliiwa murima wunchichi ddiidda?’

²⁵ Waakhulla wa okoha ottheenenngu onaakhalle wawi, ‘Ekaambiiwa tti yawi yaatathilla echipangano eyo yakeraatthihalliiwa ni Apwiya Mulluku a makhollwiiwa enthawi eyo yaakhumihalliiwa o Iguputo.

²⁶ Yaarumeyella milluku ddimodda nnddo yahiddillapelliiwa waambeella khalle Apwiya yaavaanyihalliiwa oddillapella.

²⁷ Sika Apwiya yahaashella murima athwiiwa nave yahaamorihella millilli ddittheddene ddoolembiwa mu nibukhunna.

²⁸ Apwiya yaasha murima wunchichi, yaananariwa nave moosha murima mwemmo yaahaavenyihamo mwiillaponi mwiwa ni waavokhella mwiillaponi yeelleto, nko eriiwawo ollello.’

²⁹ “Vookhalla ddeko ddimodda nnddo Apwiya Mullukwaahu yahuupullullalliiwa wa hiyaano koma aanupullullella malamulwiiwa ayo hiyaano ni edduullu ddahu ninaphwanelleehu owiiwellella enthawi ddittheddene.”