Deuteronomo 25 - Mawu a Mulluku

¹ “Vakhalla okangana variyari va athu nave alliwaayo yaya o nthato namillatu wi yeeruziwe, aweeruzaayo ekamulleke wi olla khalakwille nave olla oolakwa.

² Oolakwa aphwanella owashulliwa, aweeruzooyo alamule wi akonaatthi vatthi vamiitthoni vaye nave awashulliwe moollikana ni olakwa waye.

³ Ttuumuwashulla olendo makhumi masese koma oohikhwaranya vaavo. Vawi miwashullo ddakhwaranya vaavo, wenko sika omuwulliha muru mbalaanyu.

⁴ “Muhiyimakeke owanoni eng'ombe eyo enamuuputha tirigu.”

Ddoophwanella weera mmbale akhwa

⁵ “Muthu ni mwanamunne yaakhallaka vamodda nave mmodda akhwa ahinna mwaana, naamukhwellooyo ahitthelliwe ni muthu a nibanja nimodda. Mwanamunne a ookhooyo amutthelle wi amuyarelle anamwani.

⁶ Mwaana awaamba mpammo anaakhalle mwaana a ookhooyo wi nnddina na nibanja naye nihithiimihiwe mu Israele.

⁷ Koma mullopwanooyo aahimupaallaka naamukhwellooyo, vano mutthiyanooyo aye o nthato na attekweene akhupanye wi, ‘Mwanamunne a mamunakoolle khanapaalla wi nnddina na mbalaaye nivirellelle mu Israele. Olliye onimakhoota okiyarella anamwani.’

⁸ Vano attekweene a nthato emwiithane mullopwanooyo wi ellotena. Avirellella okhoota omutthella,

⁹ mutthiyanooyo aye wa mullamwaayooyo vamiitthoni va attekweene attheenaayo nave amurulle esapato ya nnyallo nimodda amuttaphere owiitthoni navettho allote wi, ‘Ddenndda sika ddoophwanella omweerella muthu ookhoota omuvaha edduullu mwanamunne.’

¹⁰ Mu Israele, nibanja na mullopwanooyo nineeroromolliwa wi ‘Nibanja na oorulliwa esapato ya nnyallo nimodda.’ ”

Athu eelli yaawanaka

¹¹ “Athu eelli yaawanaka nave mwaara a mmoddooyo voopaallani omwaakihera mamune amuphara mudani amamunooyo mukhoveni,

¹² muhimumorelle ethakaraka mutthiyanooyo koma mumuphadde nnatta.

¹³ “Muhikhalleke ni esikelo piilli munthumbani mwanyu, emodda yawoona emodda yawoottha.

¹⁴ Muhikhalleke ni esikelo piilli mpa mwanyu, yawoona ni yawoottha.

¹⁵ Esikelo ddanyu ddikhalleke ddawoona wi enthawi ya okumaanyu erekame mu ellapo eyo Apwiya Mullukwaanyu enuuvahiiwani.

¹⁶ Apwiya enniitana ni athu oolleka mu ettilla yeella.”

Lamulo nawi Aamaleke yiiphiwe

¹⁷ “Muupuwelleke nnddo Aamaleki yaweerelleewani enthawi elle mwavenyereenyu o Iguputo.

¹⁸ Alliwa yahuuhellani ekhoto va ettilla, vaavo nyuwaano mutopille wunchichi. Nave yaawiipha akhwiinyu attheene ayo yeeta moohaakuva vawuuthwarani mutulli vawi Aamaleke kheyaamooville Mulluku.

¹⁹ Vano Apwiya Mullukwaanyu yuuvahani ellapo wi ekhalle yoohallanaanyu, yawaakihanittho m'mattani mwa adanaanyu attheene oowaapheellani, moonesese wi mwaatthollose Aamaleki attheene wi nnddina niwa nithiimihiwe va ellapo yavatthi. Muhitiwalle ddenndda!”