Deuteronomo 16 - Mawu a Mulluku

Ehakallallo ya Paska

¹ “Mwaatitimiheke Apwiya Mullukwaanyu vaweerani Ehakallallo ya Paska mu mweeri wa Abibu. Kaambiiwa mahiiyu mamodda a mweeri yoolla Apwiya yahuukhumihani o Iguputo.

² Muvelleelleke mikutho dda Ehakallallo ya Paska wa Apwiya Mullukwaanyu. Mwiipheke enkhosa, epuri apaalle eng'ombe va nipuro namallapello nno Apwiya enaatthoolliiwa.

³ Enama yamukuthweeyo muhicheke nimodda ni buledi ookhalla ni yisiti. Mallapo matthanu ni meelli mumucheke buledi oohikhalla ni yisiti wonanko mwakhumalle o Iguputo mwawaakuva. Mumuche buledoolla, buledi a ddoohoosa wi mallapo mattheene a okumaanyu muupuwelleke nllapo nno mwakhumalleenyu o Iguputo.

⁴ Va mallapo matthanu ni meelli arive muthu ahiphwanyeyeke ni yisiti mpa mwaye mu ellapwaanyu. Enama eyo muyivelleelleenyu mukutho misikuwa a nllapo nawaamba muyicheke mahiiyu yaayo muhiyisungeke ophiyera ohinase.

⁵ Mwiipheke enama dda mukutho wa Paska virive veko o ellapo eyo Apwiya Mullukwaanyu enuuvahiiwani

⁶ koma mwiiphelleke va nipuro nimoddave noollapellavonne. Mweereke ddenndda voovollowani nndduwa moollikana ni enthawi elle mwakhumalleenyu mu Iguputo.

⁷ Mwaapeyeke enameeyo ni oyichella va nipuro noollapellavo nimoddanno nave muhokollweelleke o misasa ddanyu osaka wene.

⁸ Mallapo matthanu ni nimodda mumucheke buledi oohikhalla ni yisiti va nllapo naneetthanu ni piilli, mweeriheke mutthukumano woopatuleya wa Apwiya Mullukwaanyu nave muhiphareke orive mutteko va nllapo nenna.”

Ehakallallo ya Ddoohata Ddawaamba

⁹ “Mweerengeke milungu mitthanu ni miilli ovenyera enthawi eyo mwaambilleenyu omureta tirigu.

¹⁰ Vano mweere Ehakallallo ya Ddoohata, yawaatitimihana Apwiya Mullukwaanyu voovelleellani mwa opaalla wanyu moollikana ni madaliso ayo yuuvahilleewani.

¹¹ Sika muneerohakallalla vamiitthoni viwa, nyuwaano, aniinyu aallopwana ni aatthiyana, allupa muttekwaanyu aallopwana ni aatthiyana ni Alevi ayo munakhalleenyuna m'muzi mwanyu, alleto, akhwaadduni ni anaamukhwelle ayo enakhalla variyari vanyu.

¹² Muupuwelleke wi mwaari akaporo o Iguputo, sika mooneseseke wi muwiiwellelleke malamulwaalla.”

Ehakallallo ya Misasa

¹³ “Mwamalliha omuuputha tirigwaanyu muttheene navettho owamulla mpesa ddanyu, mweereke Ehakallallo ya Misasa va mallapo matthanu ni meelli.

¹⁴ Muhakallalleke wunchichi va nllaponno, nyuwaano, aniinyu aallopwana ni aatthiyana, allupa muttekwaanyu aallopwana ni aatthiyana ni Alevi, alleto, akhwaadduni ni anaamukhwelle ayo enakhalla variyari vanyu.

¹⁵ Mwaatitimiheke Apwiya Mullukwaanyu vaweerani ehakallallweella mallapo matthanu ni meelli va nipuro namallapello nno enaatthoolliiwa. Ekaamba yawi Apwiya Mullukwaanyu enaakhalle edalisalle ddoohata ddanyu ni mitteko ddanyu ddittheddene, muhakallalle wunchichi.

¹⁶ “Allopwana attheene a mutundwaanyu ewe wi yaallapelle Apwiya Mullukwaanyu o nipuro namallapello, oraru vamuyakhani. Ewe va enthawi ya Paska, Ehakallallo ya Ddoohata navettho va Ehakallallo ya Misasa. Nave ehiweeke vamiitthoni va Apwiya mattave

¹⁷ koma arive muthu aweeke ni emphaso moollikana ni mmo anaaworelleeye nave moollikana ni madaliso ayo Apwiya Mullukwaanyu emuvahilliiwa.”

Echiweruzo yoolungama

¹⁸ “Mwaatthoolleke aweeruza ni attekweene mu nirive nlloko ni nirive nipuro Apwiya Mullukwaanyu enuuvahiiwani. Athu yaalla yeeruzeke moohiweha ekhove.

¹⁹ Eheeruzeke moohollosa apaalle mooweha ekhove. Ehaakhelleke ddamukaphwani kaambiiwa ddamukaphwani ddinnaripiha miittho a athu eezeru nave ddinnaahollosa eyano dda oolungama vaweeruzani.

²⁰ Muthwareke echilungamove wi mwaakhe ellapo eyo Apwiya Mullukwaanyu enuuvahiiwani.

²¹ “Muhiimese mafano a Asherimu vakhwipi va nikuwa na Apwiya Mullukwaanyu nno munaamakeenyu.

²² Nave muhiimeseke malluku oopatuleya vawi Apwiya Mullukwaanyu enniitanana ddenndda.”