Aroma 9 - Mawu a Mulluku

Mulluku ni athwaaye

¹ Kinallota ddawoona nave nginoottha ekaamba yawi kiri mu eyaattano ni Khrisitu. Yawuupusella murima yaaka, yoolamuliwa ni Munepa Waweella, ennakikhallella omboni wi nginoottha

² kaallotaka wi kookhalla ni ethakaraka ddinchichi, ovoreya wa m'murimani mwaka enthawi ddittheddene

³ va athu aakaaka! Vawi kapaalla wi miyaano meekhaaka kitembeleliwe ni Mulluku ni omwallanihiwa ni Khrisitu ekaamba ya alliwaayo.

⁴ Alliwaalla tti a Aisraele, aaweera anaaye nave ahuupullulla ntitimiho naye wa alliwa. Ahaavaha echipangano, malamulo, ollapella wawoona ni malonjezo.

⁵ Alliwaalla tti edduullu dda Aisraele makhollo oovuwaalle ayo yaari makhollo a Khrisitu mwa omuthu. Mulluku oyo analamulella ddeko ddittheddene atitimihiwe enthawi yoohimalla! Amen.

⁶ Nginaaka wi lonjezo na Mulluku naalepheleya vawi khe Aisraele attheene eri athu a Mulluku.

⁷ Naari khe edduullu ddittheddene dda Abrahamu ddiri anaaye. Mulluku aallota wa Abrahamu wi, “Oneerokhalla ni edduullu oweella mwa Isaki.”

⁸ Ella enattaphullella wi anamwani ooyariwa mwa omuthu khe anamwani a Mulluku koma anamwani ooyariwa mwa lonjezo na Mulluku sika edduulludduullu ddaye.

⁹ Vawi Mulluku mu lonjezo naye aallota wi, “Kineerohokollowattho mu enthawi yoophwanellella nave Sara aneeromuyara mwaana aamullopwana.”

¹⁰ Nave khe yeellave. Vawi Rebeka aamuyarella Isaki nikhollo nahu anapattha aallopwana eelli.

^11-12 Nave wi otthoolliwa wa mwaana mmodda wooneye wi yaari yoolinga ya Mulluku, Mullukooyo aallota wi, “Muullupallooyo aneerekomurumeyella mung'onong'onooyo.” Aallotille ddenndda ehinayariwe, ehineere erive ello naari yaphaama apaalle yoonanara. Sika otthoolla wa Mulluku waari moollikana ni wiithaniwa wa mmoddooyo, ohiri moollikana ni erive ello yenriiwa.

¹³ Mawu a Mulluku eni, “Kaamukonda Yakobo nave kaamwiita Esau.”

¹⁴ Sika vano nillote wi Mulluku khanna echilungamo? Khe ddiiddo.

¹⁵ Vawi aallota wa Mose wi, “Kineeromweerella echifundo arive muthu kinapaalleemi omweerella. Nave kineerommorella ethakaraka arive muthu kinapaalleemi oommorella.”

¹⁶ Sika vano erive ello kheneereya moollikana ni opaalla wa athu apaalle mitteko dda athu koma moollikana ni echifundo ya Mulluku.

¹⁷ Vawi mawu a Mulluku wa Farao eni, “Kahuuvaha omwene wi koonihe masivaaka navettho kivuwihe epillaaka oweella mwa weyaano mu ellapo yavatthi ettheene.”

¹⁸ Sika vano Mulluku annamweerella echifundo arive muthu anapaalleeye omweerella. Nave annamuumiha murima arive muthu anapaalleeye omummiha.

Echifundo ya Mulluku ni osha murima waye

¹⁹ Nave mmodda a nyuwaano ttuullota wa miyaano wi, “Ddaarimi ddiri ddiiddo kaambiiwa tini Mulluku anamwiipelleeye mullatu muthu? Vawi ttaani anaakhoote opaalla wa Mulluku?”

²⁰ Koma nyuwaano ttaani, asinnaka ni arokoraka wi mumuhumullulle Mulluku? Muno khonamukoha muthu oyo awoopille wi, “Kaambiiwa tini wakoopilleewe mwawi ddiidda?”

²¹ Awoopa mino ookhalla ni olamulello woophariha mutteko olloko mmo anapaallelleeye nave woopa mino miilli ovenyera va olloko omodda yooyo; mmodda woopharihiwa mutteko wa shisha nave mmodda woopharihiwa mutteko va nllapo noopaalleya.

²² Ella enaphwanaphwana ni nnddo Mulluku eerilleeye. Apaalla wi oonihe osha murima waye vamodda ni masivaaye. Nave aavillella ni waalleva wunchichi athu ayo yaamushihalle murima, oophwanella woonongiwa.

²³ Nave apaallattho wuupullulla waata wa ntitimiho naye, nno niithellelliwe va hiyaano aneerelleeye echifundo, ayo ekhoziwe moovallallella wi yaakhelle ntitimiho naye.

²⁴ Vawi hiyaano tti athu ayo aawiithanneeye, ohiri ovenyera variyari va Ayudave navettho ovenyera variyari va athu ayo ehiri Ayuda.

²⁵ Mulluku aallota mu nibukhu na Hoseya wi, “Athu ayo yahaari aaka kineerewaromolla wi, ‘Athwaaka.’ Mutundu oyo kahiwukondeemi kineerowuuromolla wi, ‘Ookondiwaaka.’

²⁶ Nave vanipuroni mvo yalleelliwiiwa wi, ‘nyuwaano khe athwaaka,’ vano eneeroromolliwa wi ‘Anamwani a Mulluku Ookumi.’ ”

²⁷ Nave Yesaya aanakhuwa dda Israele wi, “Naari athu a o Israele tti anchichi wonanko mihava dda onyanja nave oohalla ooyevave sika enaavullusiwe,

²⁸ vawi Apwiya eneeroweeruza athu attheene a va ellapo yavatthi mwawaakuva ndithu.”

²⁹ Nndda ddiri wonanko mmo Yesaya allotilleeye khalle wi, “Apwiya Amasiva Mattheene yahinihiyalleke amoddahi ooyeva neerotthollowa wonanko Sodomu ni Gomora.”

Israele ni othenga waphaama

³⁰ Sika ninallota wi athu ayo ehiri Ayuda, ayo yahaashaashille wiilungamiha weekhiiwa vamiitthoni va Mulluku yaalungamihiwa ni olliyooyo oweella mu echikhulupililwiiwa.

³¹ Koma Aisraele, ayo yaashaasha malamulo owaalungamiha vamiitthoni va Mulluku, kheyaaphwanyille.

³² Nave kaambiiwa tini? Ekaambiiwa yaari yawi kheyaakhanlle moollikana ni echikhulupililo koma yarororomella mitteko ddiwa. Sika vano yaakwakwatuwa vanllukuni nookwakwatuwiha

³³ nno mawu a Mulluku enallota dda nenno wi, “Kinnakeraatthiha nlluku mu Ziyoni nno ninaakwakwatuwihe athu, nlluku nno ninaakuhe. Koma oyo anamuroromella olliye khawa awullihiwa muru.”