2 Petro 2 - Mawu a Mulluku

Ahuddihi awoottha

¹ Anamallotella awoottha yahooneya khalle variyari va athu nave emoddamoddave yeeyo ahuddihi awoottha eneerewooneya variyari vanyu. Mwawiitta eneerowaana ehuddiho ddawoononga. Nave eneerewaakhoota Apwiya ayo yaakullalle nave vaweerani ddiiddo eneerowaana woonongeya wawaakuva vaweekhiiwa.

² Naari ddiri ddiiddo, athu anchichi eneerothwara makhallellwiiwa oonanara nave sika ekaamba ya nnddo eneeriiwa, eneeroweeriha athu amodda ollotella epewe ettilla yawoona.

³ Ekaamba ya nrima ahuddihi awoottha yaalla eneerewuullekani vawuulleellani miyaha ddawoottha. Ollakiwa wiwa wookhozeka khalle nave oowoonongiiwa khanakona!

⁴ Mulluku khaawalleville angelo ayo yachimwalle koma ahaavokha mu gehena, mwemmo eri oomakiwa ni onyolo mu epiphi, otiyera nllapo na echiweruzo.

⁵ Mulluku khaawalleville khalle athu a va ellapo yavatthi koma ahaarumiha maaddi eddalla va ellapo yavatthi ya athu oohimullapella Mulluku. Ayo aavullusalleeye tti Nowa, oyo allalleya dda echilungamo ni athu amodda atthanu ni eelli.

⁶ Mulluku aallaka mizinda dda Sodomu ni Gomora, voowoonongani ni munllo nave aheera ddennddo wi aachenjeze athu oohimullapella Mulluku dda nnddo ddinaaweereye.

⁷ Koma aamuvullusa Loti, muthu oolungama, oyo ahoosiwe m'murimani ni makhallello oonanara a athu oohithwara malamulo.

⁸ Muthu oolungamooyo akhalla variyari viwa nave nllapo ni nllapo aanahoosiwa m'murimani iiweeye ni woona ddaweera ddiwa ddoonanara.

⁹ Vano Apwiya ennadduwella waavullusa athwiiwa a Mulluku o ddoohoosa ddiwa navettho ennaadduwella waasunga athu oonanara ophiyera nllapo na echiweruzo wi yaallake.

¹⁰ Makamaka ayo enathwara minkhella ddiwa ddoonanara dda omuthu nave enavevulla olamulello wa Mulluku. Ahuddihi awoottha yaalla tti awiitukhulla ni awiiwa ddayiwave nave khenavelleella olemu wa ootitimiheya ooddullu koma enamullotella epewe.

¹¹ Naari angelo, ayo eri amasiva ni oollipa waakhwaranya ahuddihi awootthaalla, khenallota epewe vamiitthoni va Apwiya.

¹² Nave athu yaalla eneera ni ezeru ddooyariwana, wonanko enama ddamuhakani nnddo ddaayariwe wi ddiphariweke ni wiiphiwa, enallotella epewe erive ello ehiniiwesesiiwa. Eneerewoonongiwa wonanko enama ddamuhakani,

¹³ nave eneerohoosiwa ekaamba ya ohoosa yenriiwa. Ennakonda okwakhwaniha minkhella dda miilli ddiwa nndduwa noopaka. Nave yaachaka ni nyuwaano ennuuwullihani muru kaambiiwa ennakonda woottha!

¹⁴ Enthawi ddittheddene miitthwiiwa enakhalla va weera ddooraruwa nave minkhella ddiwa ddoochimwa khaddinakwakhwanihiwa. Ennaalleka athu oohikeraattheya. Mirima ddiwa ddaahuddihiwa okhalla a nrima. Tti ootembeleliwa ni Mulluku!

¹⁵ Aahiya ettilla yawookowa nave aahollowa. Ekusalle ettilla eyo akusalle Balamu mwaana aamullopwana a Beori. Balamu aakonda opata makobiri vaweerani ddoonanara

¹⁶ koma aahumullulliwa ekaamba ya yoonanaraaye. Bulwaaye aallota ni mawu wonanko a muthu nave ahiiha ddaweera ddaanepa dda namallotellooyo.

¹⁷ Athu yaalla tti wonanko neetuutu oohikhalla ni maaddi navettho wonanko mirapo ddooweetihiwa ni ephevo yuullupalli. Mulluku oohaasungella nipuro niwa mu epiphi yooripesesa.

¹⁸ Enallota ddookota ni ddookarangeya nave ennaalleka athu ayo ethawille wene ovenyera variyari va ayo enakhalla mu machimo voopharihani mitteko minkhella ddiwa dda omuthu.

¹⁹ Ennaalonjeza ottaphuwa koma alliwaayo tti akaporo a makhallello a woononga. Vawi muthu anakhalla kaporo a erive ello enamulamulella.

²⁰ Athu ayo yathawille khalle ddeko ddoonanara dda va ellapo yavattheella oweella mu waadduwella wiwa Apwiya ni Oovullusaahu Yesu Khrisitu, vano yaphariwattho nave enalamulelliwa ni ddeko ddoonanaranndda, ennakhalla oonanaresesa ohiyana ni vawaamba.

²¹ Waaweerokhalla waphaama yaahidduwenlle ettilla ya echilungamo ohiyana ni oyidduwella nave waahiya malamulo aweella yaavahiwe wa alliwa.

²² Eyo yeereye wa alliwa enooniha ddawoona dda miyambi ddawi, “Mwanapwa annahokollweella acha nnddo arapheyilleeye” navettho wawi, “Ekumba yoohapihiwa ennahokollweella wuupuruwa vamatokwini.”