2 Atesalonika 3 - Mawu a Mulluku

Munivekellelleke hiyaano

¹ Voomallihella, asinnihu ni arokorihu, munivekellelleke hiyaano wi othenga wa Apwiya ovirellelleke ovuwa mwawaakuva navettho waakhelliwe ni ntitimiho, wonanko mmo weerelliiwa mwa nyuwaano.

² Muvekellekettho wi Mulluku anaakihere wa athu ookatamiha ni oonanara vawi khe athu attheene enakhulupilila othengooyo.

³ Koma Apwiya tti oororomelleya navettho eneerewuuvahani masiva ni owaakiherani wa oonanarooyo wi ahuuvoreyeni.

⁴ Nave Apwiya ennanisimikizella wi munneera nnddo ninuulleelleehuni navettho muneerovirellella weera ddenndda.

⁵ Ninaaveka Apwiya wi yuuhoollelleni wi mudduwelle dda echikondi ya Mulluku ni ovillella nko onavelleelliwa ni Khrisitu.

Dda ophara mutteko

⁶ Asinnihu ni arokorihu ninnuulamulani, mu nnddina na Apwiihu Yesu Khrisitu wi mumwallaneke ni ookhulupilila attheene oolesi ni ayo ehinathwara ehuddiho mwaakhenlleenyu wa hiyaano.

⁷ Nyuwaano munnadduwella phaama ddene wi munnaphwanella onittakiha. Hiyaano khanaarina olesi nakhalleehu ni nyuwaano.

⁸ Khanaachille yoocha ya arive muthu moohillivella koma naaphara mutteko moollipa otthaana ni mahiiyu ophiyera otopa wi nihuullemelleni nyuwaano.

⁹ Naheera ddenndda ohiri kaambiiwa khaninna olamulello wooveka nikavihero nanyu koma wi nikhalle echisanzo ya nyuwaano wi muthwareke.

¹⁰ Naariihu ni nyuwaano naanuulleellani wi, “Muthu aahipaallaka ophara mutteko ahichettho.”

¹¹ Ninallota ddenndda kaambiiwa ninniiwa wi vookhalla athu amodda oolesi variyari vanyu ayo ehinaphara ello nave enatthuperiwa ni ddaaneena.

¹² Mu nnddina na Apwiya Yesu Khrisitu, ninnaalamula ni waachenjeza athu yaalla wi ephareke mutteko mwawiithaalla nave echeke yoocha yayiwayayiwa.

¹³ Nave nyuwaano, asinnihu ni arokorihu, muhitope vaweerani ddaphaama.

¹⁴ Mmodda aahiiwellella mawaahu a mu kalata yoolla, mooneseseni yooyo wi muhaattanena wi awulliwe muru.

¹⁵ Koma muhimweere mudani nave m'muchenjeze wonanko ookhulupilila mukhwiinyu.

Mawu oomallihella

¹⁶ Ninaaveka Apwiya amurendelle yuuvaheni murendellooyo enthawi ddittheddene ni mutthemwene. Apwiya ekhalle ni nyuwaano attheene.

¹⁷ Miyaano Paulo kinalemba dda moonoolla meekhaami. Mawu yaalla sika echizindikirwaaka mu arive kalata kinamulembeemi.

¹⁸ Echisomo ya Apwiya Yesu Khrisitu ekhalle ni nyuwaano attheene.