2 Atesalonika 2 - Mawu a Mulluku

Muthu oonanara

¹ Ninnuuvekani nyuwaano asinnihu ni arokorihu va dda owa wa Apwiihu Yesu Khrisitu navettho ni dda otthukumana wahu wi nikumanena,

² wi maganizwaanyu ehitikheyeke mwawaakuva apaalle waapheellihiwa muru ni mawu awi nllapo na Apwiya noophiya naari mawu yaayo eri oollotelliwa apaalle oollotiwa apaalle oolembiwa mu kalata ni hiyaano.

³ Muhaakhullelle wi muthu mmodda awoottottheni mu erive ettilla. Vawi nllapo nenno nihinaphiye, onaakhalle omuwukila Mulluku navettho muthu Oonanaroolle aneerewuupulluwa, oyo anoonongiwe.

⁴ Aneerovaanyiha ddittheddene ddineeriwa mulluku naari ddoollapelliwa navettho aneeroddeera wi olliye tti ookhwaranya ddittheddene. Aneerovollowa nave aneerokeraatthi mu enyumba ya Mulluku niwiiromolla yeekhaaye wi tti Mulluku.

⁵ Ethiyo khamunuupuwella wi kaahuulleellani kaariimi ni nyuwaano?

⁶ Nave munnadduwella oyo anamuselliha. Koma enthawi yakwakhwana, oonanarooyo aneerewuupulluwa.

⁷ Nave mwawiipittheya arina ophara mutteko koma oyo anamuselliha anapaalleeye wi aambe ovenyihiwavo.

⁸ Nave vano oonanaroolla aneerewuupullulliwa nave Apwiya Yesu yawa, eneeromwiipha voomuviddeellellani mpweya wa muwano mwaye nave aneeromoononga ni wooneya wa owa waye.

⁹ Muthu oonanarooyo anaawe ni masiva a Satana nave aneereweera ddoottikhiniha ni ezizindikiro ddawoottha ddoohiyanahiyana,

¹⁰ nave aneerophariha erive ettilla yoonanara waalleka ayo enaawoonongeye. Eneerewoonongeya kaambiiwa yaakhoota okonda yawoona eyo yaawaavulluse.

¹¹ Sika Mulluku aneerewaarumihella masiva awoottottha wi ekhulupilile ddawootthannddo.

¹² Voomallihella, attheene oohikhulupilila yawoona, ookonda ddoonanara, aneerollakiwa.

Mootthoolliwa wi muvullusiwe

¹³ Asinnihu ni arokorihu ookondiwa ni Apwiya, hiyaano ninaphwanella omuthokoza Mulluku enthawi ddittheddene ekaamba ya nyuwaano. Vawi Mulluku ahuutthoollani wi mukhalle awaamba ovullusiwa oweella mwamasiva a munepaaye ni mwa echikhulupilwaanyu mu yawoona wi mukhalle athwaaye aweella.

¹⁴ Mulluku aawiithanellani ddenndda oyeella mu othenga waphaama olle nawullalleyeehu wa nyuwaano. Aawiithanani wi mwaakhellena ntitimiho na Apwiihu Yesu Khrisitu.

¹⁵ Sika vano, asinnihu ni arokorihu, khallani oohitikheya navettho mupharesese ddawoona ddennddo nuuhuddihalleehuni mu ollalleya wahu ni mu kalataahu.

¹⁶ Ninaaveka Apwiihu Yesu Khrisitu weekhiiwa ni Mulluku Attiitthiihu oyo oonihalle echikondaaye wa hiyaano wi anivahe ollipa murima woohimalla ni etiyerello yaphaama oweella mwa echisomwaaye.

¹⁷ Nave uullipiheni murima ni wuuvahani masiva wi mweereke ni ollota ddaphaama enthawi ddittheddene.