1 Yohane 1 - Mawu a Mulluku

Mawu oovaha okumi

¹ Ninuulembellani nyuwaano dda mawu oovaha okumi, ayo yaarivo waambeella vawaamba. Noowiiwa nave noowoona ni miitthwaahu. Ddawoona, noowoona nave mattaahu ahaattannya yaayo.

² Okumi wuupullulliwiiwa, naawoona sika ninavelleella omboni dda yooyo ni wuulleellani dda okumi woohimalla oyo waari ni Attiitthiihu nave wahuupullulliwa wa hiyaano.

³ Nnddo noonilleehu ni wiiwa ninallalleya wa nyuwaanottho wi mukawane ni hiyaano mu eyaattano niriihuna mwa Attiitthiihu ni mwa Mwanaye Yesu Khrisitu.

⁴ Ninalemba yeella wi nihakallalle ni murimaahu muttheene.

Mulluku sika owala

⁵ Vano othenga niiwalleehu ovenyera wa Mwanaye Yesu Khrisitu nave ninawullalleyeehu tti wawi Mulluku sika owala nave mwa olliyooyo epiphi kheyaamo.

⁶ Vano naallotaka wi nookhalla ni eyaattano ni olliyooyo nave enthawi yeeyo ninakhalla mwiipiphini, ninnoottha mu mawaahu ni mu ddaweera ddahu.

⁷ Koma nakhalla mu owalanko, wonanko olliye ariiye mu owala, sika nookhalla ni eyaattano va mmodda ni mukhwaaye nave nikhame na Yesu, Mwanaye, ninnaneelliha ovenyiha machimo mattheene.

⁸ Nallota wi khaninna machimo, niniilleka weekhiihu nave mwa hiyaano yawoona kheyaamo.

⁹ Koma naalapa machimwaahu wa Mulluku, olliye tti oororomelleya ni oolungama vookhululukellani machimwaahu ni vooneellihani o ddaweera ddahu ddoonanara ddittheddene.

¹⁰ Nallota wi khaninachimweke, ninamweera Mulluku wi tti awoottha nave mawaaye kheri mwa hiyaano.