1 Samuele 2 - Mawu a Mulluku

Nivekello nootitimiha na Hana

¹ Hana aavekella wi, “Murimaaka onnahakallalla ekaamba ya nnddo ekeerelle Apwiya. Kinneeta moorumiha mukhito ekaamba ya Apwiya, kinnaattheya adanaaka, koohakallalla wunchichi vawi mookivullusa.”

² “Khaavo ari aweella ophwanaphwana ni Apwiya, khaavo mmodda koma alliwave, khaavo ari ooteteza wonanko Apwiya.

³ Nyu athu, muhinallotaka mwawiitthamalla, vayanoni vanyu vihinallotaka ddawiitukhulla vawi Apwiya tti Mulluku eezeru, olliye sika aneeruza mitteko dda athu.

⁴ Akhoto amasiva, miira ddiwa ddinniinttakeya koma athu oofooka ennakhalla ni masiva.

⁵ Athu ayo khalle yahata ddoocha ddookwakhwanella vano enimallimella. Koma ayo khalle yaari eettalla vano ennavona. Mutthiyana oohiyara vano ohaayara anamwani atthanu ni eelli, koma mutthiyana oyo aari ni anamwani anchichi vano khanna anamwani.

⁶ Apwiya ennawiiha okhwa nave ennahokollosella okumi.

⁷ Apwiya ennahoowiha nave ennavaha eyuuma, Ennaakitthiha athu vampandoni, ennaawelliha athu vampandoni.

⁸ Ennaavenyiha athu oohoowa vaddallani, yaakeraatthiha vamodda ni mamwene, ewinnya mpando woolemu. Matthipellello mattheene a ellapo yavatthi tti a Apwiya, yaakeraatthiha ellapo yavatthi va matthipellellwaayo.

⁹ Ennateteza okumi wa athu owaaroromella alliwa koma athu oonanara eneerewaakhurumusa mwiipiphini vawi khaavo muthu anaapambane ni masivaaye.

¹⁰ Apwiya Mulluku muullupalli eneerewaanyenya adaniiwa, eneerowoopopiha ni ogugudeya wa murimu woovenyera oddullu. Apwiya eneeroweeruza ophiyera omalla wa ellapo yavatthi ettheene, mweniiwa eneeromwinnya masiva, eneerowunnuwiha masiva a mweniiwa oozoziwa.”*

¹¹ Vano Elikana ni Hana yaahokollweella owaniwa o Rama. Koma musomboolle Samuele aahalla o Shilo anaarumeyella Apwiya vamiitthoni va mullupa mukutho Eli.

Anamwani a Eli

¹² Anamwani a Eli yaari oonanara, oohaadduwella Apwiya.

¹³ Kheyaapwathattho dda makhallello aphaama a allupa mukutho vamiitthoni va athu. Muthu mmodda aavelleellaka mukutho enama etokothaka viikho, omurumeyella mullupa mukutho aanawa akusalle efoloko ya miino mararu.

¹⁴ Aanayivollochiha efolokweelle mwiipallini mulle muri enameelle. Nnddo ddinaahomiwe ni efolokweelle, mullupa mukutho aanaddikusa ddikhalla ddaaye. Yaaneera emoddamoddave yeeyo wa Aisraele attheene yawa o Shilo.

¹⁵ Woonjerera vaavo enthawi ddimodda athu yaaheraatthiki mukutho, ehinawoose makhura waaheraatthella mukutho Apwiya, oorumeyella a mullupa mukuthoolle aanawa allota wi, “Mukinnye enama ekitthi wi kawooselle allupa mukutho vawi khenapaalla enama yawaapeya.”

¹⁶ Muthoolle allota wi, “Kitiyereni kaambe waaheraatthella mukutho makhuraalla Apwiya nave mukuse moollikana ni mmo munapaallelleenyu.” Oorumeyelloolle aanaakhulla wi, “Iyaayi, mukinnye naanweene vaava. Mwaahikinnya kineerowaakhani.”

¹⁷ Sika ochimwa wa anamwani a Eli waari wuullupalli vamiitthoni va Apwiya vawi yaanavevulla mukutho wa Apwiya.

Hana aanaya amoonaka Samuele

¹⁸ Samuele aariiye musombwe aanarumeyella vamiitthoni va Apwiya awanre ekuwo yabafuta yookhalla ni efodi.*

¹⁹ Orive muyakha amennya yaanamusowella mukanjo mung'onong'ono ni omwinnya yaayaaka ni amamuniwa woovelleella mukutho.

²⁰ Vano Eli aanaadalisa Elikana ni mwaariye voollotani wi, “Apwiya yuuvaheni anamwani mwa mutthiyana yoolla munipuroni mwa olle mwamuvekilleenyu wa Apwiya.” Yeeddiiddo yaanahokollweella owaniwa.

²¹ Apwiya yaamudalisa Hana wawi aakhalla ni erukullu aayara anamwani aallopwana araru aatthiyana eelli. Koma Samuele ahunnuwella o Shilo mu enyumba ya Apwiya.

Eli anaachenjeza anaaye

²² Vano Eli ahuulluvalla wunchichi nave aaniiwa ddittheddene anaaye yaweerelliiwa Aisraele owaaka ddawi yaanararuwa ni atthiyana oowehera vamullakoni va musasa wamutthukumano.

²³ Vano ahaakoha anaayaayo wi, “Kaambiiwa tini muneereenyu ddenndda? Kinniiwa ovenyera wa athu nnddo muneereenyu.

²⁴ Iyaayi anaaka nndda kinawiiweemi athu a Apwiya ellotaka ni ovuwiha khe ddaphaama.

²⁵ Muthu amulakwella mukhwaaye Apwiya ttuuwaattaniha koma waachimwella Apwiya anaawaattaniheni ttaani?” Koma anamwanaayo kheyaawiwelleelle attiitthiiwaayo vawi waari opaalla wa Apwiya wi anamwanaayo yiiphiwe.

²⁶ Musombwe Samuele aavirellella wunnuwa ni waattana ni Apwiya owaaka athu attheene.

Namallotella anallota ni Eli

²⁷ Nllapo nimodda namallotella aawa wa Eli amulleella wi, “Apwiya enallota wi, ‘Ngaawiidduwellihalle meekhaami wa nibanja na nikhollo nanyu Aroni valle yaariiwa akaporo a mwene Farao a o Iguputo?

²⁸ Nave kaatthoolla nlloko nanyu variyari va malloko mattheene a Aisraele wi nikhalle allupa mukuthwaaka nave wi eyeeke onikuwani naka namukutho yathuwiheke lubani* nave yawareke yoowara yoopangiwa ni ekuwo yaweella wunchichi yookhalla ni efodi ni odduwella nnddo kinapaalleemi wi athwaaka yeereke. Kaanaakawella embali emodda ya ddoovelleella mukutho ddawoosiwa viikho nnddo Aisraele yavelleelliiwa mukutho wa miyaano.

²⁹ Vano kaambiiwa tini munavevulleenyu mikutho ddaka ni ddoovelleella nnddo kalamulelleemi mookhallamo mwaka? Ethiyo onaariiha anaawo okikhwaranya miyaano vawiinenevihani ni ddoocha ddooddiva wunchichi dda vamukuthoni vaka nnddo athwaaka Aisraele enavelleelliiwa.

³⁰ Miyaano kiri Apwiya Mulluku a Aisraele. Kaalonjeza wi nibanja nawo ninaakhalleke allupa mukutho woohimalla. Koma vano kinallota wi ddennddo ddoomalla. Kinaavaha olemu ayo enakititimiha koma kinnaatembelela ayo enakivevulla.

³¹ Kinallota ddawoona wi kineerowiipha asombwe attheene a munibanjani nawo ni a mu nlloko nawo. Vawi khaavo anaawuulluvalle.

³² Nibanja nawo nineerokhalla ni ddoohoosa ddinchichi. Oneerekoweha mwahache ddeko ddaphaama nnddo kinaaweerellekeemi Aisraele amodda. Koma khaviwa vikhalla awuulluvalla vanibanjani vawo

³³ Koma kineeromusunga mmodda a munibanjani nawo wi arumeyelleke va nikuwa naka. Miitthwaaye eneeronanara nave aneerotathilla murima. Koma amodda anchichi eneerewiiphelliwa okhotoni eri asombwe.

³⁴ Wi odduwelle ddawi kinalloteeminndda tti ddawoona. Anaawo eelli Hofini ni Finehasi enaakhwe nllapo nimodda.

³⁵ Vatulli viwa kineeromutthoolla mullupa mukutho oyo anaakhalle oororomelleya wa miyaano ni weera nnddo ddiri m'murimani mwaka ni ddoopaalla ddaka. Kineeromwinnya edduullu nnddo ddinaarumeyelleke vamiitthoni va mwenaaka oozoziwa enthawi ddittheddene.

³⁶ Koma oyo anaahalle a munibanjani nawo aneeroya wa mullupa mukuthwaaka omuveka makobiri apaalle mwanayoocha. Aneerollota wi, “Kaakhullelleni wi kikhalle mullupa mukutho wi kiphwanyekevo yoocha.” ’ ”