1 Mamwene 1 - Mawu a Mulluku

Wuulluvalla wa mwene Davide

¹ Mwene Davide ahuulluvalla wunchichi wawi naari emukhuneelle ni mabulangete khiiwa oviha.

² Sika enduna ddaye ddaamulleella wi, “Amwene, naakhullelleni wi nuuphwanyelleni namwalli wi akhalleke ni nyuwaano ni wuupwathani. Anaakoneke vakhuviru ni nyuwaano wi mooneke oviha.”

³ Vano yaamwaashaasha namwalli ooreera mu Israele mutthemwene nave yaamuphwanya Abishagi Mushunamu emuyaana wa mwene.

⁴ Namwallooyo aari ooreera wunchichi. Sika aanamupwatha ni omurumeyella mwene koma mwenooyo khaakonillena.

Adoniya anapaalla omwene

⁵ Vano Adoniya mwaana a Davide ni Hagiti ahaamba wiitukhulla wi, “Mi sika kinaakhalle mwene.” Ahiikhozella magareta ni athu oowella va akavalo navettho akhoto makhumi matthanu oowehera.

⁶ Attiitthinnyaayo kheyaamuhumullullalle naari omodda voomukohani wi, “Kaambiiwa tini oneereewe ddiidda?” Adoniya aari mullopwana ooreera nave amuthwarellelle Abishalomu vooyariwani.

⁷ Adoniya aallota ni Yowabu mwaana a Zeruya ni mullupa mukutho Abiyatara nave yahiiwanana omukavihera.

⁸ Koma mullupa mukutho Zadoki, Benaya mwaana a Yehoyada, namallotella Natani, Shimeyi, Reyi ni akhoto amasiva a Davide kheyaamuthwanre Adoniya.

⁹ Nllapo nimodda Adoniya aavelleella mukutho wa enkhosa, eng'ombe ni asaanaang'ombe ooneneva va Nlluku na Enowa nno niri vakhuviru ni Neetuutu a Enirogele. Aawiithana asinne attheene sika anamwani attheene a mwene ni enduna dda Davide ddoovenyera o Yuda

¹⁰ koma khaamwiithanille namallotella Natani apaalle Benaya apaalle akhoto amasiva naari mwanamunne Solomoni.

Solomoni anavollowa omwene

¹¹ Vano Natani aamukoha Batesheba amennya a Solomoni wi, “Ethiyo khewiiwalle wi Adoniya mwaana a Hagiti ohiivollochiha omwene koma Davide apwiihu khenadduwella?

¹² Sika vano ngawa kuulangize wi ovulluse okumaawo ni wa mwanawo Solomoni.

¹³ Khawe veneva wa mwene Davide wamukohe wi, ‘Nyu apwiyaaka ni mwenaaka, ethiyo khamwaakilonjezille moollupella mi oorumeyellaanyu wi mwanaka Solomoni sika anaavollowe omwene munipuroni mwanyu ni okhalla va mpandwaanyu? Vano kaambiiwa tini Adoniya avollowilleeye omwene?’

¹⁴ Vano waallotaka ni mwenooyo, kineerovollowa wi kikhallelle omboni mawaawo.”

¹⁵ Sika Batesheba aaya avollowa mu echipinda ya mwene. Mwenooyo aari awuulluvalla wunchichi nave Abishagi Mushunamu aanamurumeyella.

¹⁶ Batesheba aakokhora moovelleella olemu wa mwene nave mwenooyo aamukoha wi, “Onapaalla tini?”

¹⁷ Batesheba ahaakhulla wi, “Nyu Apwiyaaka, mwaakilonjeza moollupella vamiitthoni va Apwiya Mullukwaanyu wi mwanaka Solomoni sika anaavollowe omwene munipuroni mwanyu ni okhalla va mpandwaanyu.

¹⁸ Koma vano Adoniya oovollowa khalle omwene naari nyu apwiyaaka muhidduwellaka.

¹⁹ Olliye aavelleella mukutho wa eng'ombe, asaanaang'ombe ooneneva ni enkhosa ddinchichi. Aawiithana aniinyu attheene, mullupa mukutho Abiyatara ni akhoto muullupalli Yowabu koma khaamwiithanille mwaninyu Solomoni.

²⁰ Vano nyu apwiyaaka ni mwenaaka, Aisraele attheene ennuuwehani wi mwaalleelle oyo anaavollowe omwene munipuroni mwanyu.

²¹ Mwaaheera ddiiddo nyu apwiyaaka amwene, mi ni mwanaka Solomoni ninooniwe wonanko oowukila mwakhwa.”

²² Vano Batesheba allotaka ni mwene, namallotella Natani aaphiya.

²³ Sika athu yaamulleella mwene wi, “Namallotella Natani oophiya.” Nave Natani aphiyalleeye vamiitthoni va mwene aakokhora moovelleella olemu.

²⁴ Nave Natani aallota wi, “Apwiyaaka ni mwenaaka, ethiyo khemwaalonjezille wi, ‘Adoniya aneerovollowa munipuroni mwaka’?

²⁵ Vawi ollello vaava oovelleella mukutho wa eng'ombe, asaanaang'ombe ooneneva ni enkhosa ddinchichi. Aawiithana aniinyu attheene, akhoto muullupalli Yowabu ni mullupa mukutho Abiyatara. Nave enimacha ni owirya ni olliye ellotaka wi, ‘Ekhalle ni okumi woorekama amwene Adoniya!’

²⁶ Koma mi oorumeyellaanyu, mullupa mukutho Zadoki, Benaya mwaana a Yehoyada ni mwaninyu Solomoni khaaniithanille.

²⁷ Nyu apwiyaaka ni amwenaaka, ethiyo mwahaakhullella ddenndda ohaalleella oorumeyellaanyu dda oyo anaavollowe omwenaanyu?”

²⁸ Mwene ahaakhulla wi, “Mukiithanelle Batesheba awe wuno.” Sika aawa iimella vamiitthoni va mwenooyo.

^29-30 Nave mwene aallupella wi, “Apwiya Mulluku Ookumi a Israele yaakoopolla o ddoohoosa ddaka ddittheddene. Sika vano ollello kineerosunga nnddo kallupenlleemi mu nnddina niwa wi Solomoni sika anaavollowe omwenaaka.”

³¹ Vano Batesheba aakokhora moovelleella olemu wa mwene allota wi, “Apwiyaaka, mwene Davide ekhalle ni okumi wa enthawi yoohimalla!”

³² Mwene Davide aallota wi, “Mukiithanelle mullupa mukutho Zadoki, namallotella Natani ni Benaya mwaana a Yehoyada ewe wuno.” Sika yaawa vamiitthoni va mwene.

³³ Nave mwenooyo aallota wi, “Mwaakuse allupa muttekwaaka nave mumuwellihe mwanaka Solomoni va bulwaaka nave muweena o Gihoni.

³⁴ Wenko mullupa mukutho Zadoki ni namallotella Natani yamuzoze wi akhalle mwene a Israele. Vatulli viwa moope nipallapata ni okhuwa wi, ‘Mwene Solomoni akhalle ni okumi woorekama!’

³⁵ Vano mumuthwareke voohokolleellani wuno wi akeraatthi va mpandwaaka woomwene vawi olliye sika anaakhalle mwene munipuroni mwaka. Nave koomutthoolla wi akhalle oolamulella Israele ni Yuda.”

³⁶ Vano Benaya mwaana a Yehoyada aamwaakhulla mwenooyo wi, “Amen! Apwiya Mulluku a apwiyaaka amwene ekwakhwanihelle ddenndda.

³⁷ Monga mmo Apwiya ekhallelliiwa ni nyu apwiyaaka amwene ekhallettho ni Solomoni nave omwenaaye ewunnuwihe naari okhwaranya omwenaanyu, apwiyaaka amwene Davide.”

³⁸ Vano Zadoki, Natani, Benaya mwaana a Yehoyada, Akereti ni Apeleti, yaamuwelliha Solomoni va bulu a Davide emuvelleella o Gihoni.

³⁹ Zadoki aakusa nnyaka na makhura a olivi ovenyera mu musasa wamutthukumano amuzoza Solomoni. Vatulli viwa yahoopa nipallapata nave athu attheene yaakhuwa wi, “Akhalle ni okumi woorekama Solomoni!”

⁴⁰ Nave athu attheene yaatimulla enamuthwara yiipaka ezitoliro ni ohakallalla wunchichi mwawi ellapo yaatikheya ekaamba ya okhuwa.

⁴¹ Adoniya ni athu attheene yahiiwa okhuwanko emallihalle ocha. Nave Yowabu iiwalleeye woopa wa nipallapata aakoha wi, “Ethiyo okhuwa oniiweya m'muzindanimmu tti wa tini?”

⁴² Ahinamallihe ollota, Yonatani mwaana a Abiyatara aakhumellella. Adoniya aamulleella wi, “Vollowa, kaambiiwa we tti muthu aphaama apaalle onawa ni othenga waphaama.”

⁴³ Yonatani aamwaakhulla Adoniya wi, “Iyaayi, khe waphaama vawi apwiihu mwene Davide aamuvollochiha Solomoni omwene.

⁴⁴ Ahaarumiha mullupa mukutho Zadoki, namallotella Natani, Benaya mwaana a Yehoyada, Akereti ni Apeleti emuwellihe va bulu a mwene.

⁴⁵ Nave Zadoki ni namallotella Natani yaamuzoza omwene o Gihoni. Sika ovenyera wenko ekhanlle ehakallallaka mwawi m'muzindani mutthemwene mookhalla okhuwa.

⁴⁶ Vano Solomoni ookeraatthi va mpando woomwene.

⁴⁷ Navettho oomurumeyella mwene yaamuriiha pwiihu mwene Davide voollotani wi, ‘Mullukwaanyu avuwihe nnddina na Solomoni okhwaranya naanyu nave mpandwaaye woomwene wunnuwe okhwaranya waanyu.’ Nave mwene aakokhora vabedini vaye avekella wi,

⁴⁸ ‘Kinnuutitimihani nyu Apwiya Mulluku a Israele ayo mweerihalle wi mmodda a anaaka avollowe omwenaaka ollello mi kiri mukumi.’ ”

⁴⁹ Vano awiithaniwa attheene a Adoniya yahoova nave yaavenya arive muthu aya waayewaaye.

⁵⁰ Sika Adoniya aamoova Solomoni nave aaya o musasa wamutthukumano aphara manyaka a nikuwa.

⁵¹ Vano athu amodda yaamulleella Solomoni wi, “Adoniya animawoovani nave oophara etthoka dda nikuwa anallota wi, ‘Kinapaalla mwene Solomoni allupelle wi khakiipha mi oorumeyellaanyu.’ ”

⁵² Nave Solomoni ahaakhulla wi, “Olliye akhalla muthu ooreera murima khanimweerella erive ello yoonanara naari vang'ono koma akhalla oonanara murima aneerewiiphiwa.”

⁵³ Vano mwene Solomoni ahaaruma athu yamukusa Adoniya onikuwani wulle. Aawa akokhora moovelleella olemu wa mwene Solomoni nave Solomoni aamulleella wi, “Khawe owaninyu.”