1 Epilli 5 - Mawu a Mulluku

Edduullu dda Rubeni

¹ Alla sika anamwani a Rubeni mwaana awaamba a Yakobo. Rubeni aari mwaana awaamba koma ekaamba yawi aakona ni mmodda mwa awariwa ang'onong'ono a attiitthinnya, ottekweenaaye waavahiwa wa Yosefe mwanamunne. Sika ekaambiiwa ahinaphwanyeyeeye va ntthopoollo na anamwani awaamba.

² Koma a nlloko na Yuda yaari amasiva variyari va malloko a Israele nave mwene avenyenre wa alliwa naari ottekweene waari wa Yosefe.

³ Vano Rubeni mwaana awaamba a Yakobo aamuyara Hanoki, Palu, Hezironi ni Karimi.

⁴ Yowele aamuyara Shemaya, Gogi, Shimei,

⁵ Mika, Reaya, Baala,

⁶ ni Beera oyo Tigilati Pilesere, mwene a o Asiriya amphanreeye okaporo. Beera aari mmodda a oohoollella a Arubeni.

⁷ Oohoollella a nlloko na Rubeni, voothwarani ntthopoollo na manddiniiwa yaari Yeiyele, Zekariya

⁸ ni Bela mwaana a Azazi mwaana a Shema a nibanja na Yowele. Attheenaayo yakhalla ovenyera o Aroere ophiya o Nebo ni o Baala Meoni ompoto.

⁹ Nave wookhuma nndduwa yakhalla voovollowella mu echipululu mukhwipi mwa muhinje wa Yufurate ekaamba yawi eziweto ddiwa ddahaata wunchichi mu echigawo ya Giliyadi.

¹⁰ Va enthawi ya mwene Saulo, Arubeni yaawana ni Ahagiri nave yahaagonjiha. Sika yaakhalla m'misasani mwiwa mu echigawo ettheene wookhuma nndduwa wa Giliyadi.

Edduullu dda Gadi

¹¹ Edduullu dda Gadi ddakhalla ompoto wa Arubeni o echigawo ya Bashani ophiya o Saleka wookhuma nndduwa.

¹² Oohoollelliiwa aari Yowele nave aneepiilli aari Shafamu. Oohoollella amodda yaari Yanai ni Shafati ayo yaari awaambiha malloko mamodda o Bashani.

¹³ Nave abaliiwa voothwarani mabanja a makhollwiiwa yaari Mikaele, Meshulamu, Sheba, Yorai, Yakani, Ziya ni Eberi. Yaalla sika yaari mabanjiiwa matthanu ni meelli.

¹⁴ Yaalla sika yaari edduullu dda Abihaili mwaana a Huri mwaana a Yarowa mwaana a Giliyadi mwaana a Mikaele mwaana a Yeshishai mwaana a Yado mwaana a Buzi.

¹⁵ Vano Ahi mwaana a Abidiyele mwaana a Guni sika aari oohoollella a mabanjiiwa.

¹⁶ Alliwa yaakhalla o mizi dda o Giliyadi ni o Bashani navettho o mapuro mattheene oochihellawo enama mu echigawo ya Sharoni ophiya o mamallihello wiwa.

¹⁷ Attheenaalla yalembiwe moollikana ni ntthopoollo na manddiniiwa va enthawi ya Yotamu mwene a o Yuda navettho va enthawi ya Yerobowamu mwene a o Israele.

Akhoto a malloko a wookhuma nndduwa

¹⁸ Arubeni, Agadi ni hafu a nlloko na Manase yaakhalla ni athu amasiva akhoto ni ezishango, masupada ni miira. Attheene vamodda yaarivo 44,760 ookhozekella owana ekhoto.

¹⁹ Yaawana ni malloko a Ahagiri monga Yeturi, Nafishi ni Nodabu.

²⁰ Yaamuroromella Mulluku ni oveka nikavihero wa olliye nave Mulluku ahaakhulla oveka wiwa nave ahaapambaniha wa Ahagiri ni awiiwananiiwa.

²¹ Yaawaakha eziweto ddiwa monga ekamira* 50,000, enkhosa 250,000 ni abulu 2,000. Yahaapharattho athu 100,000.

²² Adani amodda anchichi yahiiphiwa vawi ekhotweeyo yaari ya Mulluku. Sika athwaayo yaakhallawo phaama ophiyera enthawi yoophariwa okaporo.

Edduullu dda Manase dda wookhuma nndduwa

²³ Hafu a nlloko na Manase akhallesa mu ellapo ya wookhuma nndduwa ovenyera o Bashani ophiya o Baala Heremoni, Seniri ni o mwaango wa Heremoni. Athwaayo yaari awaata.

²⁴ Oohoollella a mabanjiiwa yaari Efere, Ishi, Eliyele, Aziriele, Yeremiya, Hodaviya ni Yadiyele. Yaalla yaari akhoto amasiva, oohoollella oovuwa a mabanjiiwa.

Malloko a wookhuma nndduwa enaphariwa okaporo

²⁵ Koma athwaalle kheyaaroromelleye wa Mulluku a makhollwiiwa vawi yahiivelleella wa milluku dda athu a mwiillaponimmo ayo Mulluku awoonongilleeye vamiitthoni viwa.

²⁶ Sika Mulluku a Aisraele aamweeriha Pulo mwene a o Asiriya oyo nnddina naye nimodda naari Tigilati Pilesere wi aaphare Arubeni, Agadi navettho hafu a nlloko na Manase ni oyaana o Hala, Habori, Hara ni o muhinje wa Gozani nave anakhalla wenko ophiyera ollello.