1 Epilli 23 - Mawu a Mulluku

¹ Davide uulluvanlle aamukeraatthiha mwanaye Solomoni okhalla mwene a Israele.

Mitteko dda Alevi

² Davide ahaatthukumaniha oohoollella attheene a Israele, allupa mukutho ni Alevi.

³ Nave aaweerenga Alevi a miyakha 30 oya muhoollo. Echiwerengerwiiwa attheene yaarivo 38,000.

⁴ Nave Davide aallota wi, “Mwa athwaalla 24,000 enaakhalle oowehera mitteko dda mu enyumba ya Apwiya, 6,000 enaakhalle enduna ni aweeruza,

⁵ 4,000 enaakhalle alonda avamullakoni nave 4,000 enaakhalle owaallapella Apwiya voopharihani mutteko ezida ddawiipella nnddo kiddipangilleemi.”

⁶ Vano ahaakawa Alevi m'millokoni moollikana ni anamwani a Levi monga Geroshomo, Kohati ni Merari.

⁷ Geroshomo aamuyara Ladani ni Shimei.

⁸ Anamwani a Ladani yaari araru, Yehiyele oohoollella, Zetamu ni Yowele.

⁹ Anamwani a Shimei yaari araru, Shelomoti, Haziyele ni Harani. Alla sika yaari oohoollella mabanja a makhollo a Ladani.

¹⁰ Shimei aamuyara Yahati, Ziza, Yeushi ni Beriya moollikana ni wunnuwa wiwa. Koma Yeushi ni Beriya kheyaarina anamwani anchichi aallopwana, sika ekaambiiwa yaweerengille wonanko nibanja nimodda.

¹¹ Yahati aari oohoollella nave Ziza aari aneepiillaaye. Koma Yeushi ni Beriya kheyaarina anamwani aallopwana anchichi, sika ekaambiiwa yaweerengille wonanko a nibanja nimodda.

¹² Kohati aamuyara Amuramu, Izara, Hebroni ni Uziyele.

¹³ Amuramu aamuyara Aroni ni Mose. Aroni aapatuliwa wi awehereke ddeko ddaweellesesa mwawi olliye ni anaaye yavelleellesesa mikutho ddawoosa lubani* vamiitthoni va Apwiya ni orumeyella ni waadalisa athu mu nnddina na Apwiya wa enthawi yoohimalla.

¹⁴ Koma anamwani a Mose, muthu a Mulluku, yattakanyiheriwe ni nlloko na Levi.

¹⁵ Mose aamuyara Geroshomo ni Eliyezere.

¹⁶ Oohoollella a anamwani a Geroshomo aari Shebuele.

¹⁷ Eliyezere aari ni mwaana aamullopwana mmoddave nnddina naye Rehabiya koma Rehabiya aakhalla ni anamwani aallopwana anchichi.

¹⁸ Oohoollella a anamwani a Izara aari Shelomiti.

¹⁹ Hebroni aamuyara Yeriya oohoollella navettho Amariya, Yehaziele ni Yekameamu moollikana ni oyariwa wiwa.

²⁰ Uziyele aamuyara Mika oohoollella, navettho ni Ishiya moollikana ni oyariwa wiwa.

²¹ Merari aamuyara Mali ni Mushi. Mali aamuyara Eleazara ni Kishi.

²² Eleazara aakhwa ahiri ni anamwani aallopwana koma aatthiyanave. Arokoriwa, anamwani a Kishi sika yaatthenlle.

²³ Anamwani araru a Mushi yaari Mali, Edere ni Yeremoti.

²⁴ Alla sika yaari anamwani a Levi moollikana ni oohoollella a mabanja a makhollwiiwa moollikana ni mmo yalembelelliiwa. Yathwara echiwerengero ya manddina a athu waambeella a miyakha 20 oya muhoollo ayo yaphwanella orumeyella o enyumba ya Apwiya.

²⁵ Vawi Davide aallota wi, “Apwiya Mulluku a Israele ohaavaha athwaaye murendelle nave eneerokhalla mu Yerusalemu wa enthawi yoohimalla.

²⁶ Sika khe woopaalleyattho wi Alevi etukhulleke musasa wa ophwanyeya wa Apwiya apaalle eziwiya dda mallapello.”

²⁷ Moollikana ni mawu oomallihella a Davide, yaalla sika yaari a echiwerengero ya Alevi waambeella athu a miyakha 20 oya muhoollo.

²⁸ “Koma muttekwiiwa onaakhalle wookavihera edduullu dda Aroni voorumeyellani o enyumba ya Apwiya. Aneerekowehera mathato ni ezipinda, weelliha ddittheddene ddiri ddoopatuleya navettho orive mutteko orumeyella o enyumba ya Mulluku.

²⁹ Yookhallanattho odindo woowehera buledi oovelleelliwa wa Mulluku, othu wa mukutho wa yoocha, mitthi dda buledi oohikhalla ni yisiti, ddoovelleella ddawaapeyiwa, mukutho woottakanyihera ni makhura a olivi. Yookhallanattho odindo woolinga ollemella wa ddoovelleella dda mu enyumba.

³⁰ Nave eneerekewaatitimihamo Apwiya orive ohinase ni orive misikuwa

³¹ erive enthawi mikutho ddooshellelliha ddaavelleelliwaka wa Apwiya dda masabata, dda wooneya wa mweeri navettho dda erive ehakallallo ya mallapello. Mitteko ddawaarumeyella Apwiyanndda eneeroddeera wa enthawi yoohimalla.

³² Mwawi eneerekowehera enyumba ya Apwiya. Nave eneerekewaakavihera anamwani a Aroni, abaliiwa vawaarumeyellani mwemmo.”